ಗೋಡೆಯಿಲ್ಲ, ಸೂರಿಲ್ಲ, ಟಾಯ್ಲೆಟ್​ ಕೂಡ ಇಲ್ಲ! ಆದರೂ ಇದು ಎಲ್ಲರ ಫೇವರಿಟ್ ಹೋಟೆಲ್!

ಬರ್ನ್​: ಫೈವ್ ಸ್ಟಾರ್, ಥ್ರೀ ಸ್ಟಾರ್ ಹೀಗೆ ಎಂತೆಂತದ್ದೋ ಅದ್ಭುತ ಹೋಟೆಲ್​ಗಳನ್ನು ನೋಡಿರುತ್ತೀರ. ಆದರೆ ಈ ಒಂದು ಹೋಟೆಲ್ ಮಾತ್ರ ನಿಮ್ಮೆಲ್ಲರ ಕಲ್ಪನೆಯನ್ನೇ ತಲೆ ಕೆಳಗೆ ಮಾಡುವಂತಹ ಹೋಟೆಲ್. ಈ ಹೋಟೆಲ್​ನಲ್ಲಿ ಗೋಡೆಯಿಲ್ಲ, ಛಾವಣಿಯೂ ಇಲ್ಲ, ಕೊನೆ ಪಕ್ಷ ಒಂದು ಟಾಯ್ಲೆಟ್ ಕೂಡ ಇಲ್ಲ. ಆದರೂ ಈ ಹೋಟೆಲ್ ಎಲ್ಲರ ಹಾಟ್ ಫೇವರಿಟ್ ಅಂತೆ.

ಇಂತದ್ದೊಂದು ಹೋಟೆಲ್ ಇರುವುದು ಸ್ವಿಜರ್ಲೆಂಡ್​ನ ಸ್ವಿಸ್ ಆಲ್ಪ್ಸ್ ಪರ್ವತಗಳಲ್ಲಿ. ಜೀರೋ ಸ್ಟಾರ್ ಹೆಸರಿನ ಈ ಹೋಟೆಲ್​ನಲ್ಲಿ ಇರುವುದು ಒಂದೇ ಒಂದು ಬೆಡ್ ಮತ್ತು ಅದರ ಅಕ್ಕ ಪಕ್ಕ ಎರಡು ಬೆಡ್ ಲ್ಯಾಂಪ್​ಗಳು ಮಾತ್ರ. ಏನೂ ಸೌಲಭ್ಯವಿಲ್ಲದ ಈ ಹೋಟೆಲ್ ಸುತ್ತಮುತ್ತ ಪರ್ವತಗಳಿಂದ ಆವರಿಸಿದೆ. ಎತ್ತ ಕಣ್ಣು ಹಾಯಿಸಿದರೂ ಬರೀ ಹಸಿರೇ ಕಾಣುವಂತಹ ಹೋಟೆಲ್ ಅದು. ಮಲಗಿ ಮೇಲೆ ನೋಡಿದರೆ ನೀಲಿ ಆಗಸ, ಸುತ್ತ ನೋಡಿದರೆ ಹಸಿರ ಪರ್ವತ! ಇದೇ ಆ ಹೋಟೆಲ್​ನ ವಿಶೇಷತೆ.

ಅಂದ ಹಾಗೆ ಈ ಹೋಟೆಲ್​ನಲ್ಲಿ ತಂಗುವವರಿಗೆ ದಿನವೊಂದಕ್ಕೆ 17 ಸಾವಿರ ರೂಪಾಯಿ ಶುಲ್ಕ ಹಾಕಲಾಗುತ್ತದೆ. ಹತ್ತಿರದಲ್ಲೇ ಸಣ್ಣದೊಂದು ಮನೆಯ ರೀತಿಯಲ್ಲಿ ಮಾಡಿಕೊಂಡಿದ್ದು, ಅಲ್ಲಿ ಅಡುಗೆ ಮಾಡಿ, ಹೋಟೆಲ್​ಗೆ ಬರುವ ಪ್ರವಾಸಿಗರಿಗೆ ಕೊಡಲಾಗುತ್ತದೆ. ಅವರು ಒಂದು ವೇಳೆ ಟಾಯ್ಲೆಟ್ ಬಳಸಬೇಕೆಂದರೆ ಸುಮಾರು ಐದು ನಿಮಿಷ ನಡೆದರೆ ಸಿಗುವ ಸಾರ್ವಜನಿಕ ಟಾಯ್ಲೆಟ್​ ಅನ್ನೇ ಬಳಸಬೇಕು.

ಅಂದ ಹಾಗೆ ಈ ಹೋಟೆಲ್​ಗ ಮುಂಗಡವಾಗಿ ಬುಕ್ಕಿಂಗ್ ಮಾಡಿಟ್ಟುಕೊಳ್ಳಬೇಕು. ಹಾಗಿದ್ದರೂ ಕೆಲವೊಮ್ಮೆ ಹವಾಮಾನ ಕೈ ಕೊಟ್ಟರೆ ಬುಕ್ಕಿಂಗ್ ಕ್ಯಾನ್ಸಲ್ ಆಗುವ ಸಾಧ್ಯತೆ ಇರುತ್ತದೆ. ಈ ವರ್ಷ ಕರೊನಾದ ಕಾಟದಿಂದಾಗಿ ಬುಕ್ಕಿಂಗ್​ ಅನ್ನು ಸಂಪೂರ್ಣವಾಗಿ ನಿಲ್ಲಿಸಲಾಗಿದೆ. ಮುಂದಿನ ವರ್ಷವೇ ಮತ್ತೆ ಬುಕ್ಕಿಂಗ್ ತೆರೆಯುವುದಾಗಿ ತಿಳಿಸಲಾಗಿದೆ. (ಏಜೆನ್ಸೀಸ್)

https://www.vijayavani.net/karnataka-new-cm-basavaraja-bommai-life-story/

https://www.vijayavani.net/this-man-can-increase-your-height/