ದೈಹಿಕ, ಮಾನಸಿಕ ವಿಕಾಸಕ್ಕೆ ಪೂರಕವಾಗಿರುವ, ವ್ಯಕ್ತಿತ್ವವನ್ನು ಗಟ್ಟಿಗೊಳಿಸುವ, ಸಕಾರಾತ್ಮಕ ಮನೋಭಾವ ಬೆಳೆಸುವ ಯೋಗ ಉತ್ತಮ ಜೀವನಶೈಲಿಯ ಕೀಲಿಕೈ ಇದ್ದಂತೆ. ಯೋಗವನ್ನು ನಿಯಮಿತವಾಗಿ ಮುಂದುವರಿಸಿದಂತೆಲ್ಲ ಮಾನಸಿಕ ಶಾಂತಿ, ಮನಸ್ಸಿನ ನಿರಾಳತೆ, ಸಕಾರಾತ್ಮಕ ಚಿಂತನೆಗಳು ಒಡಮೂಡಿ ವ್ಯಕ್ತಿ, ಆ ಮೂಲಕ ಸಮುದಾಯದ ಸ್ವಾಸ್ಥ್ಯ ಉತ್ತಮಗೊಳ್ಳುತ್ತದೆ. ಯೋಗ ಜೀವನಕ್ರಮದಿಂದ ಉತ್ತಮ ಆರೋಗ್ಯವನ್ನಷ್ಟೇ ಅಲ್ಲ, ಆರೋಗ್ಯದ ಪರಮಸ್ಥಿತಿಯಾದ ಪರಿಪೂರ್ಣ ಆನಂದವನ್ನೂ ಪಡೆಯಲು ಸಾಧ್ಯ ಎಂಬುದು ಕ್ಷೇತ್ರತಜ್ಞರ ಅಭಿಮತ. ಜನಜೀವನಕ್ಕೆ ಸಂಜೀವಿನಿಯಾಗಿ ಕೆಲಸ ಮಾಡುವ ಯೋಗ, ಜೀವನಮಂತ್ರವಾಗಿ ಬದಲಾಗಬೇಕಿದೆ. ಭಾರತದ ಈ ವಿದ್ಯೆಯನ್ನು ಹಲವು ರಾಷ್ಟ್ರಗಳು ಯಶಸ್ವಿಯಾಗಿ ಜೀವನಶೈಲಿಯಲ್ಲಿ ಅಳವಡಿಸಿ ಕೊಂಡಿವೆ. ಹಾಗಾಗಿ, ಯೋಗದ ಅನುಷ್ಠಾನ ಎಲ್ಲ ವಲಯಗಳಿಗೂ ವ್ಯಾಪಿಸಬೇಕು. ಈ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ತಳೆದಿರುವ ನಿರ್ಧಾರ ಮಹತ್ವಪೂರ್ಣವಾಗಿದೆ. ಕ್ರೀಡಾರಂಗದಲ್ಲೂ ಈ ಕ್ಷೇತ್ರಕ್ಕೆ ಮನ್ನಣೆ ದೊರೆತಿರುವುದರಿಂದ, ಹೊಸ ಪ್ರತಿಭೆಗಳ ಆಗಮನಕ್ಕೆ ಅನುಕೂಲವಾಗಲಿದೆ.
