ಚಾರ್ಲಿ ಚಾಪ್ಲಿನ್ ಪ್ರಕಾರ- ನಗದೇ ಕಳೆದ ದಿನ ಅದು ವ್ಯರ್ಥ ದಿನ! ದಿನದ ಇಪ್ಪತ್ನಾಲ್ಕು ಗಂಟೆಗಳಲ್ಲಿ ಕೆಲವು ನಿಮಿಷಗಳಾದರೂ ನಗೆ, ಹಾಸ್ಯ, ತುಂಟತನದಿಂದ ಕೂಡಿದ್ದರೆ ಗಂಭೀರ ಬದುಕಿನ ಒತ್ತಡ ದೂರವಾಗಿ, ದೇಹ-ಮನಸ್ಸುಗಳು ಹಗುರಗೊಂಡು ಉಲ್ಲಾಸಕ್ಕೆಡೆಮಾಡಿಕೊಡುತ್ತವೆ, ಆರೋಗ್ಯಭಾಗ್ಯವನ್ನು ಒದಗಿಸುತ್ತವೆ. ಇಂದಿನ ಪೀಳಿಗೆಯಂತೂ ಒತ್ತಡದ ಬದುಕಿಗೇ ಒಗ್ಗಿಹೋಗಿದೆ. 247 ಸೂತ್ರಕ್ಕೆ ತಲೆಬಾಗಿ, ವಿಕೆಂಡ್ ಬಂದರೂ ಇನ್ನೇನೋ ಅಂಟಿಸಿಕೊಂಡು ಆಕಾಶವೇ ಕಳಚಿ ಬಿದ್ದಂತೆ ವರ್ತಿಸುತ್ತಾರೆ. ಅದರ ಫಲವೇ ಲಾಫ್ಟರ್ ಕ್ಲಬ್, ನಗೆಹಬ್ಬಗಳು, ಹಾಸ್ಯೋತ್ಸವ ಇತ್ಯಾದಿಗಳು. ಮುಂಬೈನ ಖ್ಯಾತ ವೈದ್ಯ ಮದನ್ ಕಟಾರಿಯಾ ಮಹಾನಗರಿಯ, ಒತ್ತಡ ಬದುಕಿಗೆ ವಿದಾಯ ಹೇಳಲಾಗದಿದ್ದರೂ, ತುಸು ವಿರಾಮವನ್ನಾದರೂ ಹೇಳಲು, ನಗೆ-ಯೋಗಕ್ಕೆ ಒತ್ತು ಕೊಡುವ ಲಾಫ್ಟರ್ ಕ್ಲಬ್ಗಳನ್ನು ಆರಂಭಿಸಿದರು. ಮಾತ್ರವಲ್ಲ, 1998ರಿಂದ ಮೇ ತಿಂಗಳ ಮೊದಲ ಭಾನುವಾರದಂದು ವಿಶ್ವ ನಗೆ ದಿನವನ್ನೂ ಪ್ರಾರಂಭಿಸಿದರು. ಈಗ ಅದಕ್ಕೆ ಬೆಳ್ಳಿ ಹಬ್ಬದ ಸಂಭ್ರಮ. ಸುಮಾರು ನೂರೈದಕ್ಕೂ ಹೆಚ್ಚು ದೇಶಗಳು ವಿಶ್ವ ನಗೆ ದಿನವನ್ನು ನಗು-ನಗುತ್ತ ಆಚರಿಸಿಕೊಂಡು ಬರುತ್ತಿವೆ. ಈ ಲಾಫ್ಟರ್ ಕ್ಲಬ್ಗಳು ತಮಾಷೆ, ನಗೆಗಷ್ಟೇ ಸೀಮಿತವಾಗದೆ ವೈಜ್ಞಾನಿಕ ಹಿನ್ನೆಲೆಯನ್ನೂ ಹೊಂದಿ ನಗುವಿನಿಂದ ದೇಹದಲ್ಲಿ ಬಿಡುಗಡೆಯಾಗುವ ಹಾರ್ವೇನ್ಗಳು ದೇಹ-ಮನಸ್ಸುಗಳ ಉಲ್ಲಾಸಕ್ಕೆ ಪೂರಕ ಎಂಬುದನ್ನು ದೃಢೀಕರಿಸಿವೆ.
