ಎಚ್-1ಬಿ ವೀಸಾ ನವೀಕರಣಕ್ಕೆ ಅಮೆರಿಕ ನಿರ್ಧಾರ; ಭಾರತೀಯರಿಗೆ ಹೆಚ್ಚು ಪ್ರಯೋಜನ

ವಾಷಿಂಗ್ಟನ್: ಡಿಸೆಂಬರ್‌ನಲ್ಲಿ ಕೆಲವು ವರ್ಗಗಳ ಎಚ್-1ಬಿ ವೀಸಾ ನವೀಕರಣಕ್ಕಾಗಿ ಪ್ರಾಯೋಗಿಕ ಕಾರ್ಯಕ್ರಮ ಪ್ರಾರಂಭಿಸಲು ಅಮೆರಿಕ ಸಿದ್ಧವಾಗಿದೆ. ಇದರಿಂದ ಭಾರತೀಯ ವೃತ್ತಿಪರರಿಗೆ ಹೆಚ್ಚು ಪ್ರಯೋಜನ ಆಗಲಿದೆ.

ಡಿಸೆಂಬರ್‌ನಿಂದ 3 ತಿಂಗಳ ಕಾಲ ಅಮೆರಿಕದಲ್ಲಿರುವ ಎಚ್-1ಬಿ ವೀಸಾದಾರರು ತಮ್ಮ ದೇಶಕ್ಕೆ ಹೋಗದೆ ವೀಸಾ ನವೀಕರಿಸಬಹುದು. ಪ್ರಸ್ತುತ ದೇಶದಲ್ಲಿರುವ ವಿದೇಶಿ ಪ್ರಜೆಗಳಿಗೆ 20,000 ವೀಸಾಗಳನ್ನು ನೀಡಲು ನಿರ್ಧರಿಸಲಾಗಿದೆ. ಅವರಲ್ಲಿ ಹೆಚ್ಚಿನವರು ಭಾರತೀಯರು. ಅವರು ವೀಸಾ ನೇಮಕಾತಿಗಾಗಿ ಭಾರತಕ್ಕೆ ಹೋಗಬೇಕಾಗಿಲ್ಲ. ಬದಲಿಗೆ ಭಾರತದಲ್ಲಿನ ಅಮೆರಿಕ ರಾಯಭಾರ ಕಚೇರಿಗಳ ಹೊಸ ಅಪ್ಲಿಕೇಶನ್‌ಗಳತ್ತ ಗಮನ ಹರಿಸಬಹುದು ಎಂದು ವೀಸಾ ಸೇವೆಗಳ ರಾಜ್ಯ ಉಪಸಹಾಯಕ ಕಾರ್ಯದರ್ಶಿ ಜೂಲಿ ಸ್ಟಫಟ್ ಹೇಳಿದ್ದಾರೆ. ಅಮೆರಿಕದಲ್ಲಿ ಉದ್ಯೋಗ ಮಾಡಲು ಇಚ್ಛಿಸುವವರಿಗೆ ಎಚ್-1ಬಿ ವೀಸಾ ಕಡ್ಡಾಯವಾಗಿದೆ. ಈ ವರ್ಷದ ಜೂನ್‌ನಲ್ಲಿ ಪ್ರಧಾನಿ ಮೋದಿಯವರ ಅಮೆರಿಕ ಪ್ರವಾಸದ ಸಮಯದಲ್ಲಿ ಶ್ವೇತಭವನ ಈ ಯೋಜನೆಯ ಅಧಿಕೃತ ಘೋಷಣೆ ಮಾಡಿತ್ತು. ಅಮೆರಿಕದ ವೀಸಾಗಳಿಗೆ ಭಾರತದಲ್ಲಿ ಭಾರಿ ಬೇಡಿಕೆ ಇದೆ.

ದಾಖಲೆ ಸೃಷ್ಟಿ
ಭಾರತೀಯರಿಗೆ ವೀಸಾ ನೀಡುವಲ್ಲಿ ಅಮೆರಿಕ ದಾಖಲೆ ಸೃಷ್ಟಿಸಿದೆ. ಕಳೆದ ವರ್ಷ ಭಾರತೀಯ ವಿದ್ಯಾರ್ಥಿಗಳಿಗೆ 1,40,000 ವೀಸಾಗಳನ್ನು ನೀಡಲಾಗಿದೆ. ಅಮೆರಿಕ 2022ರಲ್ಲಿ ಭಾರತೀಯ ವಿದ್ಯಾರ್ಥಿಗಳಿಗೆ ಅತಿ ಹೆಚ್ಚು ವೀಸಾಗಳನ್ನು ನೀಡಿದ ದೇಶವಾಗಿದೆ. 

https://www.vijayavani.net/telangana-election-2023-voting-owaisi-polling-centre-still-not-open-cast-a-vote