1.1 ಲಕ್ಷ ರೂಪಾಯಿಯ ಆ್ಯಪಲ್​ ಐಫೋನ್​ ಆರ್ಡರ್​ ಮಾಡಿದವಳಿಗೆ ಬಂದಿದ್ದು ಆ್ಯಪಲ್​ ಜ್ಯೂಸ್​!

ಬೀಜಿಂಗ್: ಆನ್​ಲೈನ್​ನಲ್ಲಿ ಚಂದ ಕಾಣುವ ಬಟ್ಟೆಯನ್ನು ಆರ್ಡರ್​ ಮಾಡಿದರೆ ಹರಕು ಬಟ್ಟೆ ಮನೆಗೆ ಬರುವ ಎಷ್ಟೋ ಸುದ್ದಿಗಳನ್ನು ಕೇಳಿರುತ್ತೀರಿ. ಆದರೆ ಇಲ್ಲೊಬ್ಬ ಮಹಿಳೆಯ ಕಥೆಯೇ ಬೇರೆ. ಇತ್ತೀಚೆಗೆ ಬಿಡುಗಡೆಯಾಗಿರುವ 1.1 ಲಕ್ಷ ಮೌಲ್ಯದ ಐಫೋನ್​ ಆರ್ಡರ್​ ಮಾಡಿದ ಮಹಿಳೆಗೆ ಬಂದಿದ್ದು ಆ್ಯಪಲ್​ ಜ್ಯೂಸ್​!

ಚೀನಾದ ಲಿಯು ಈ ರೀತಿ ಮೋಸಕ್ಕೆ ಒಳಗಾದ ಮಹಿಳೆ. ಆ್ಯಪಲ್​ ಸಂಸ್ಥೆ ಇತ್ತೀಚೆಗೆ ಬಿಡುಗಡೆ ಮಾಡಿದ ಐಫೋನ್​ 12 ಪ್ರೋ ಮ್ಯಾಕ್ಸ್​ ಫೋನನ್ನು ನೋಡಿ ಅದನ್ನು ತೆಗೆದುಕೊಳ್ಳುವ ಮನಸ್ಸು ಆಕೆಗಾಗಿದೆ. ಆ ಹಿನ್ನೆಲೆಯಲ್ಲಿ ಆ್ಯಪಲ್​ನ ಅಧಿಕೃತ ವೆಬ್​ಸೈಟ್​ನಲ್ಲಿ ಐಫೋನ್​ 12 ಪ್ರೋ ಮ್ಯಾಕ್ಸ್​ ಫೋನನ್ನು ಆರ್ಡರ್​ ಮಾಡಿದ್ದಾಳೆ. ಅದಕ್ಕೆ 1500 ಡಾಲರ್​ ಅಂದರೆ ಸರಿ ಸುಮಾರು 1.10 ಲಕ್ಷ ರೂಪಾಯಿ ಪಾವತಿಯನ್ನೂ ಮಾಡಿದ್ದಾಗಿದೆ.

ಫೋನ್​ ಆರ್ಡರ್​ ಮಾಡಿದ ನಂತರ ಆ ಫೋನಿನ ಬರುವಿಕೆಗಾಗಿ ಲಿಯು ಕಾದಿದ್ದಾಳೆ. ನಿಗದಿತ ದಿನದಂದು ಫೋನು ಆಕೆಯ ಮನೆಗೆ ಬಂದು ತಲುಪಿದೆ. ಆದರೆ ಫೋನಿರಬೇಕಿದ್ದ ಜಾಗದಲ್ಲಿ ಆ್ಯಪಲ್​ ಜ್ಯೂಸ್​ ಕಂಡಿದೆ. ದುಬಾರಿ ಬೆಲೆಯ ಫೋನಿನ ಬದಲಾಗಿ ಕನಿಷ್ಠ ಬೆಲೆಯ ಜ್ಯೂಸನ್ನು ಪಾರ್ಸೆಲ್​ ಮಾಡಲಾಗಿದೆ.

ಈ ವಿಚಾರವನ್ನು ಮಹಿಳೆ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾಳೆ. ಆದರೆ ಆ್ಯಪಲ್​ ಸಂಸ್ಥೆ ಮತ್ತು ಅದನ್ನು ಪಾರ್ಸೆಲ್​ನಲ್ಲಿ ತಂದುಕೊಟ್ಟ ಎಕ್ಸ್ ಪ್ರೆಸ್ ಮೇಲ್ ಸಂಸ್ಥೆಯು ತಾವು ಫೋನನ್ನೇ ಪಾರ್ಸೆಲ್ ಕಳುಹಿಸಿದ್ದಾಗಿ ವಾದಿಸಿವೆ. ಮಹಿಳೆಯು ನೇರವಾಗಿ ಮನೆಗೆ ಆರ್ಡರ್​ ಮಾಡದೆಯೇ ಪಾರ್ಸೆಲ್​ ಲಾಕರ್​ಗೆ ಆರ್ಡರ್​ ಮಾಡಿದ್ದಳು ಎಂದು ತಿಳಿಸಲಾಗಿದೆ. ಈ ಕುರಿತಾಗಿ ಹೆಚ್ಚಿನ ವಿಚಾರಣೆ ನಡೆಸಲು ಎಕ್ಸ್ ಪ್ರೆಸ್ ಮೇಲ್ ಸಂಸ್ಥೆಯು ಪ್ರತ್ಯೇಕ ಸಿಬ್ಬಂದಿಯನ್ನು ನಿಯೋಜಿಸಿದೆ. (ಏಜೆನ್ಸೀಸ್​)

https://www.vijayavani.net/rahul-gandhi-push-up-video-in-tamilnadu/

https://www.vijayavani.net/two-former-kerala-high-court-judges-joined-the-bjp/