ಕೊವಿಡ್​-19 ಟೆಸ್ಟ್​​​ಗೆ ಕ್ಯೂದಲ್ಲಿ ನಿಂತಿದ್ದಾಗಲೇ ಮಗುವಿಗೆ ಜನ್ಮ ನೀಡಿದ ಮಹಿಳೆ; ಆಸ್ಪತ್ರೆ ಅಮಾನವೀಯತೆ ಇದು..!

ಲಖನೌ: ಗರ್ಭಿಣಿಯೋರ್ವಳು ಕೊವಿಡ್​-19 ಟೆಸ್ಟ್​ ಮಾಡಿಸಲು ಸರತಿ ಸಾಲಿನಲ್ಲಿ ನಿಂತಾಗಲೇ ಅವರಿಗೆ ಹೆರಿಗೆಯಾಗಿರುವ ಮನಕಲಕುವ ಘಟನೆ ಉತ್ತರ ಪ್ರದೇಶದಲ್ಲಿ ನಡೆದಿದೆ.

22 ವರ್ಷದ ತುಂಬು ಗರ್ಭಿಣಿ ಹೆರಿಗೆಗಾಗಿ ರಾಮ್​ ಮನೋಹರ್​ ಲೋಹಿಯಾ ಮೆಡಿಕಲ್​ ಸೈನ್ಸ್​ ಇನ್ಸ್ಟಿಟ್ಯೂಟ್​​ಗೆ ಆಗಮಿಸಿದ್ದರು. ಆದೆರ ಆಸ್ಪತ್ರೆ ಅವರನ್ನು ಅಡ್ಮಿಟ್​ ಮಾಡಿಕೊಳ್ಳಲು ನಿರಾಕರಿಸಿದೆ. ಮೊದಲು ಕೊವಿಡ್​-19 ಟೆಸ್ಟ್​ ಮಾಡಿಸಬೇಕು. ವರದಿ ನೆಗೆಟಿವ್​ ಬಂದರೆ ಮಾತ್ರ ಆಸ್ಪತ್ರೆಯಲ್ಲಿ ದಾಖಲು ಮಾಡಿಕೊಳ್ಳುತ್ತೇವೆ ಎಂದು ಹೇಳಿದ್ದರು.

ಆಗ ಅನಿವಾರ್ಯವಾಗಿ ಗರ್ಭಿಣಿ ಕೊವಿಡ್​-19 ಟೆಸ್ಟ್ ಮಾಡಿಸಲು ಹೋಗಬೇಕಾಯಿತು. ಸೋಮವಾರ ಕ್ಯೂದಲ್ಲಿ ನಿಂತಾಗಲೇ ಹೆರಿಗೆ ನೋವು ಕಾಣಿಸಿಕೊಂಡು, ಅಲ್ಲಿಯೇ ಮಗುವಿಗೆ ಜನ್ಮ ನೀಡಿದ್ದಾರೆ.

ಮಹಿಳೆಯ ಹೆಸರು ಪಾಲಾಕ್​. ಕೂಲಿ ಕಾರ್ಮಿಕಳು. ಆಗಲೇ ದಿನ ತುಂಬಿದ್ದರಿಂದ ಆಸ್ಪತ್ರೆಗೆ ದಾಖಲಾಗಲು ಬಂದಿದ್ದಳು. ನಿಂತಿದ್ದಾಗಲೇ ಆಕೆಯ ಗರ್ಭಚೀಲದಿಂದ ನೀರು ಹರಿಯಲು ಪ್ರಾರಂಭವಾಗಿ, ಅಲ್ಲೇ ಮಗು ಜನಿಸಿದೆ.
ಈ ಘಟನೆಯಿಂದ ಉಳಿದವರೂ ಗಾಬರಿಗೊಂಡರು. ಅಲ್ಲೇ ಕೊವಿಡ್​-19 ಟೆಸ್ಟ್​ ಮಾಡುತ್ತಿದ್ದ ವೈದ್ಯಕೀಯ ಸಿಬ್ಬಂದಿ ಕೂಡಲೇ ಮಹಿಳೆಯನ್ನು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಇದನ್ನೂ ಓದಿ:  ಹೆಬ್ಬಾಳ್ಕರ್ ಕೊಟ್ಟ ಕುಕ್ಕರ್ ಇನ್ನೂ ಚೆನ್ನಾಗಿದೆಯಾ?: ರಮೇಶ್​ ಜಾರಕಿಹೊಳಿ ಟಾಂಗ್​

ಹೆರಿಗೆ ವಿಭಾಗದ ವೈದ್ಯರನ್ನು ಘಟನೆಯ ಬಗ್ಗೆ ವರದಿ ಕೇಳಲಾಗಿದೆ ಎಂದು ರಾಮ್​ ಮನೋಹರ್​ ಲೋಹಿಯಾ ಮೆಡಿಕಲ್​ ಸೈನ್ಸ್​ ಇನ್ಸ್ಟಿಟ್ಯೂಟ್​​ನ ಹಿರಿಯ ವೈದ್ಯಾಧಿಕಾರಿಗಳು ತಿಳಿಸಿದ್ದಾರೆ. ಅಲ್ಲದೆ ಐವರು ವೈದ್ಯ ಸಿಬ್ಬಂದಿಯನ್ನು ಕರ್ತವ್ಯದಿಂದ ಅಮಾನತಿನಲ್ಲಿ ಇಡಲಾಗಿದೆ. ಸಂಪೂರ್ಣ ವರದಿ ನೀಡಲು ಸೂಚಿಸಲಾಗಿದೆ ಎಂದು ಸಂಸ್ಥೆಯ ನಿರ್ದೇಶಕ ನುಜಾಹತ್​ ಹುಸೇನ್​ ತಿಳಿಸಿದ್ದಾರೆ.
ಸದ್ಯ ತಾಯಿ, ಮಗು ಇಬ್ಬರೂ ಆರೋಗ್ಯವಾಗಿದ್ದಾರೆ ಎಂದು ಆಸ್ಪತ್ರೆಯ ವಕ್ತಾರ ಡಾ. ಶ್ರಿಕೇಶ್​ ಸಿಂಗ್​ ಹೇಳಿದ್ದಾರೆ. (ಏಜೆನ್ಸೀಸ್​) 

https://www.vijayavani.net/pannaga-bharana-welcome-his-dear-friend-chiru-to-his-home/