ಇರಲಿ ವ್ಯವಸ್ಥಿತ ಯೋಜನೆ: ಆದಾಯಕ್ಕೆ ತಕ್ಕಂತೆ ಖರ್ಚು-ವೆಚ್ಚಗಳನ್ನು ಯೋಚಿಸಬೇಕು. ಭವಿಷ್ಯದ ಜೀವನದ ಗುರಿಗೆ ಇಂತಿಷ್ಟು ಎಂದು ಉಳಿತಾಯ ಮಾಡಬೇಕು. ಮಕ್ಕಳ ವಿದ್ಯಾಭ್ಯಾಸ, ಮದುವೆ ಮುಂತಾದವುಗಳಿಗೆ ಹಣ ಕೂಡಿಡುವ ಪ್ರವೃತ್ತಿ ಇರಬೇಕು. ಆದಾಯ ಮತ್ತು ಖರ್ಚಿನ ಸ್ಪಷ್ಟ ಚಿತ್ರಣ ಇರಬೇಕು. ಉತ್ಪಾದಕ ಮತ್ತು ಅನುತ್ಪಾದಕ ವೆಚ್ಚಗಳ ಬಗ್ಗೆ ಮಾಹಿತಿ ಇರಬೇಕು. ಅತಿಯಾಗಿ ಹೊರಗೆ ಹೋಟೆಲ್ನಲ್ಲಿ ತಿನ್ನುವುದು, ಅನವಶ್ಯಕ ಪ್ರವಾಸ, ಬಟ್ಟೆಗಳ ಖರೀದಿ, ಕೈಯಲ್ಲಿ ದುಡ್ಡಿಲ್ಲದಿದ್ದರೂ ಕ್ರೆಡಿಟ್ ಕಾರ್ಡ್ಬಳಸುವುದು ಇತ್ಯಾದಿ ಬಲು ಅಪಾಯಕಾರಿ. ನಿವೇಶನ, ಮ್ಯುಚುವಲ್ಫಂಡ್ನಲ್ಲಿ ಹೂಡಿಕೆ ಸುರಕ್ಷಿತ ಮತ್ತು ಇದು ಉತ್ಪಾದಕ ವೆಚ್ಚ. ಇತ್ತೀಚೆಗೆ ಚಿನ್ನದ ಮೇಲಿನ ಹೂಡಿಕೆಯೂ ಲಾಭದಾಯಕವಾಗಿದೆ. ಬ್ಯಾಂಕ್ಗಳಲ್ಲಿ ಠೇವಣಿಗೆ ಬಡ್ಡಿ ದರ ಕಡಿಮೆ ಇದೆ ಎಂದು ಉಳಿತಾಯ ಮಾಡದೇ ಇರುವ ಪ್ರಕರಣಗಳು ಹಲವಿವೆ. ಯಾರನ್ನೋ ನಂಬಿ ಹೂಡಿಕೆ ಮಾಡಿ ಕೈ ಸುಟ್ಟುಕೊಂಡವರೂ ಇದ್ದಾರೆ. ಇನ್ನು ಸಾಲ ಮಾಡುವವರು ಅದನ್ನು ತೀರಿಸಲು ಆಗುತ್ತದೆಯೋ ಇಲ್ಲವೋ ಮನೆಯ ಮಾಸಿಕ ಖರ್ಚು ವೆಚ್ಚಗಳನ್ನೆಲ್ಲಾ ನಿಭಾಯಿಸಿ ಕಂತು ಕಟ್ಟಲು ಸಾಧ್ಯವೋ ಇಲ್ಲವೋ ಎಂಬುದನ್ನು ವಿಚಾರಿಸಿ ಸಾಲ ಮಾಡುವುದು ಒಳಿತು. ಇಲ್ಲದೇ ಹೋದರೆ ಕಂತು ತುಂಬಲು ಮತ್ತೆ ಸಾಲ ಮಾಡುವ ಸ್ಥಿತಿ ಖಚಿತ. ಭವಿಷ್ಯವನ್ನು ಊಹಿಸಲು ಯಾರಿಂದಲೂ ಸಾಧ್ಯವಿಲ್ಲ. ಸಮಯ, ಸಂದರ್ಭ ಹೀಗೆ ಇರುತ್ತದೆ ಎಂದು ಹೇಳಲು ಆಗುವುದಿಲ್ಲ. ಜೀವನದಲ್ಲಿ ಕೆಲವೊಮ್ಮೆ ಅನಿರೀಕ್ಷಿತ ಖರ್ಚು ವೆಚ್ಚಗಳು ದಿಢೀರ್ ಎದುರಾಗಬಹುದು. ಆಗ ಕೈಯಲ್ಲಿ ಉಳಿತಾಯದ ಹಣ ಇದ್ದರೆ ಆಪದ್ಬಾಂಧವವಾಗುತ್ತದೆ.
