ಆದರೆ, ತನಿಖೆಯ ಬೇರು ಆಳವಾದಷ್ಟು ಬೇರೆ ಬೇರೆ ಪ್ರಶ್ನೆಗಳು ಮೂಡಲಾರಂಭಿಸಿವೆ. ಆತ್ಮಾಹುತಿ ಬಾಂಬ್ ದಾಳಿಯ ಬಗ್ಗೆಯೇ ಸಂಶಯ ಮೂಡಿದೆ. ಏಕೆಂದರೆ, ಸ್ಫೋಟ ಸಂಭವಿಸುವ ಕೆಲವೇ ಕ್ಷಣಗಳ ಮೊದಲು ಕಾರಿನ ಒಳಗೆ ಮೂವರು ಇದ್ದರು ಎನ್ನಲಾಗುತ್ತಿದೆ. ಸಿಸಿಟಿವಿ ದೃಶ್ಯಾವಳಿಗಳು ಕೂಡ ಇದಕ್ಕೆ ಪೂರಕವಾಗಿವೆ. ಅಲ್ಲದೆ, ವಿಧಿವಿಜ್ಞಾನದ ಸುಳಿವುಗಳು ಕೂಡ ಇದನ್ನೇ ಸೂಚಿಸುತ್ತಿವೆ. ಒಂದು ವೇಳೆ ವಾಹನದಲ್ಲಿ ಮೂರು ಮಂದಿ ಇದ್ದಿದ್ದರೆ ಅವರೆಲ್ಲರೂ ಸೂಸೈಡ್ ಬಾಂಬರ್ಗಳಾಗಿರುವ ಸಾಧ್ಯತೆ ತುಂಬಾ ಕಡಿಮೆ ಎಂಬ ವಾದವನ್ನು ತನಿಖಾಧಿಕಾರಿಗಳೇ ಮಾಡುತ್ತಿದ್ದಾರೆ. ಸಾಮಾನ್ಯವಾಗಿ, ಫಿದಾಯೀನ್ ಕಾರ್ಯಾಚರಣೆಯಲ್ಲಿ ಒಬ್ಬರು ಅಥವಾ ಇಬ್ಬರು ಮಾತ್ರ ಭಾಗವಹಿಸುತ್ತಾರೆ ಎನ್ನುವುದು ಕೆಲವರ ವಾದ.
