ನಾಯ್ಕೂ ಹುಟ್ಟಿದ್ದು ಪುಲ್ವಾಮಾದ ಅವಂತಿಪುರ ತಾಲೂಕಿನ ಬೇಗ್ಪುರದಲ್ಲಿ. ತಂದೆ ಅಸಾದುಲ್ಲ ಹೊಲಿಗೆಯಂತ್ರವನ್ನಿಟ್ಟುಕೊಂಡಿದ್ದವರು. ಶಿಕ್ಷಣ ಮುಗಿಸಿದ ನಂತರ ಗಣಿತದ ಶಿಕ್ಷಕನಾಗಿ ಕೆಲಸ ಮಾಡುತ್ತಿದ್ದ ನಾಯ್ಕೂ. 2010 ರಿಂದ 12ರ ನಡುವೆ ಭಯೋತ್ಪಾದಕರ ಸಂಪರ್ಕಕ್ಕೆ ಬಂದು ಅವರ ಹಿತೈಷಿಯಾಗಿ ಅವರಿಗೆ ಸ್ಥಳೀಯ ಸಹಕಾರಗಳನ್ನು ಒದಗಿಸಲಾರಂಭಿಸಿದ. 2012ರ ಮೇ ತಿಂಗಳಲ್ಲಿ ಹಿಜ್ಬುಲ್ ಮುಜಾಹಿದ್ದೀನ್ಗೆ ಅಧಿಕೃತವಾಗಿ ಸೇರಿಕೊಂಡ. ಮುಂದಿನ ಐದು ವರ್ಷಗಳಲ್ಲಿ ಸಂಘಟನೆಯನ್ನು ಬಲಪಡಿಸುವಲ್ಲಿ ತನ್ನನ್ನು ತೊಡಗಿಸಿಕೊಂಡ. ಬುಹ್ರಾನ್ ವಾನಿಗೂ ನಾಯ್ಕೂಗೂ ಚಟುವಟಿಕೆಯ ಶೈಲಿಯಲ್ಲಿ ಒಂದು ಭಿನ್ನತೆಯಿತ್ತು. ಆತ ಫೇಸ್ಬುಕ್ನಲ್ಲಿ, ಟ್ವಿಟರ್ನಲ್ಲಿ ತನ್ನ ಚಿತ್ರಗಳನ್ನು ಹಾಕಿಕೊಂಡು ತರುಣರನ್ನು ಆಕರ್ಷಿಸುತ್ತ ಸಂಘಟನೆಯನ್ನು ವಿಸ್ತಾರಗೊಳಿಸುವ ವಿಚಾರದಲ್ಲಿ ನಂಬಿಕೆ ಇಟ್ಟಿದ್ದರೆ, ನಾಯ್ಕೂ ಪ್ರತಿಯೊಬ್ಬರ ಜೊತೆ ಸಂಪರ್ಕ ಬಲಪಡಿಸಿಕೊಳ್ಳುವ ಮೂಲಕ ಮತ್ತು ಶತ್ರುಗಳಲ್ಲಿ ಹೆದರಿಕೆ ಹುಟ್ಟಿಸುವ ಕ್ರಿಯೆಗಳಿಗೆ ಪ್ರೇರೇಪಣೆ ಕೊಡುವ ಮೂಲಕ ತರುಣರನ್ನು ತನ್ನವರನ್ನಾಗಿಸಿಕೊಳ್ಳುತ್ತಿದ್ದ. ಬುಹ್ರಾನ್ ವಾನಿಯೊಂದಿಗೆ ಯಾವ ಫೋಟೋದಲ್ಲೂ ಈತ ಕಾಣಿಸಿಕೊಂಡವನೇ ಅಲ್ಲ. ಈತ ಓದಿಕೊಂಡವನೆಂಬ ಗೌರವ ಇದ್ದುದರಿಂದ ಜೊತೆಗಾರರೆಲ್ಲ ಇವನ ಬಗ್ಗೆ ವಿಶೇಷವಾದ ಅಭಿಮಾನ ಹೊಂದಿದ್ದರು. ಅದೂ ಕೂಡ ಸಂಘಟನೆಯಲ್ಲಿ ವೇಗವಾಗಿ ಬೆಳೆಯಲು ಇವನಿಗೆ ಅನುವು ಮಾಡಿಕೊಟ್ಟಿತು. 2016ರಲ್ಲಿ ಬುಹ್ರಾನ್ ವಾನಿ ಪೊಲೀಸ್ ಎನ್ಕೌಂಟರ್ನಲ್ಲಿ ಹತನಾದ ಬಳಿಕ, ಹಿಜ್ಬುಲ್ ಮುಜಾಹಿದ್ದೀನ್ ಸಂಘಟನೆ ಅಲುಗಾಡುವಂತೆ ಕಾಣುತ್ತಿತ್ತು. ಬುಹ್ರಾನ್ ವಾನಿಯ ನಂತರ ಅಧಿಕಾರ ಸ್ವೀಕರಿಸಿದ ಜಾಕಿರ್ ಮೂಸಾ ಸಂಘಟನೆಯ ನಿಷ್ಠೆಯನ್ನು ಪಾಕಿಸ್ತಾನಕ್ಕಿಡಬೇಕೋ ಅಥವಾ ವೈಶ್ವಿಕ ಮಟ್ಟದ್ದಾಗಿರಬೇಕೋ ಎಂಬ ವಿಚಾರದಲ್ಲಿ ಹಿಜ್ಬುಲ್ನಿಂದ ಹೊರಬಂದ. ತನ್ನದ್ದೇ ಆದ ಅನ್ಸರ್-ಉಲ್ ಗಜ್ವಾತ್-ಉಲ್-ಹಿಂದ್ ಎಂಬ ಸಂಘಟನೆಯನ್ನು ಕಟ್ಟಿಕೊಂಡು ಆ ಮೂಲಕ ಚಟುವಟಿಕೆ ನಡೆಸಲಾರಂಭಿಸಿದ. ಇಂತಹ ವಿಷಮ ಪರಿಸ್ಥಿತಿಯಲ್ಲಿ ಸಂಘಟನೆಯನ್ನು ಕೈಗೆತ್ತಿಕೊಂಡವ ನಾಯ್ಕೂ. ತನ್ನ ನಿಷ್ಠೆಯನ್ನು ಪಾಕಿಸ್ತಾನಕ್ಕೆ ಬಲವಾಗಿರಿಸಿ ಜೊತೆಗಾರರು ಈ ದಿಸೆಯಲ್ಲಿ ಹಾದಿ ತಪ್ಪದಂತೆ ನೋಡಿಕೊಂಡ ಆತ ಜಾಕಿರ್ ಮೂಸಾನ ಸಂಘಟನೆ ಬೆಳೆಯದಂತೆ ನೋಡಿಕೊಂಡ! ಮೇಲ್ನೋಟಕ್ಕೆ ಭಯೋತ್ಪಾದಕರೆಲ್ಲ ಒಂದೇ ಎಂದು ನಮಗೆ ಕಂಡರೂ ಅವರಲ್ಲಿಯೂ ಅಧಿಕಾರ ದಾಹ, ಹಣದ ವ್ಯಾಮೋಹ, ಹೆಣ್ಣಿನ ಗೀಳು ಕಡಿಮೆಯೇನಿಲ್ಲ.
