ಇಸ್ರೋ VS ಪಾಕ್ ಬಾಹ್ಯಾಕಾಶ ಸಂಸ್ಥೆ: SUPARCO ಹಿಂದುಳಿದದ್ದು ಏಕೆ?

ನವದೆಹಲಿ: ಭಾರತದ ಚಂದ್ರಯಾನ 3 ಯಶಸ್ಸಿನ ಬಗ್ಗೆ ವಿಶ್ವದಾದ್ಯಂತ ಚರ್ಚಿಸಲಾಗುತ್ತಿದೆ. ಚಂದ್ರಯಾನ 3 ಅನ್ನು ಚಂದ್ರನ ಮೇಲೆ ಯಶಸ್ವಿಯಾಗಿ ಇಳಿಸಿದ ಬಗ್ಗೆ ಎಲ್ಲರೂ ಮಾತನಾಡುತ್ತಿದ್ದಾರೆ. ಅಮೆರಿಕ, ರಷ್ಯಾ ಮತ್ತು ಚೀನಾ ಮಾಡಲಾಗದ ಕೆಲಸವನ್ನು ಭಾರತ ಮಾಡಿದೆ. ಭಾರತದ ಈ ಧ್ಯೇಯೋದ್ದೇಶವನ್ನು ನೆರೆಯ ರಾಷ್ಟ್ರವಾದ ಪಾಕಿಸ್ತಾನದಲ್ಲಿ ಹೆಚ್ಚು ಚರ್ಚಿಸಲಾಗುತ್ತಿದೆ.

ಪಾಕಿಸ್ತಾನದಲ್ಲಿ ಭಾರತದ ಈ ಮಿಷನ್‌ ನೋಡಿ ಎಲ್ಲರೂ ತಮ್ಮದೇ ದೇಶವನ್ನು ಗೇಲಿ ಮಾಡುತ್ತಿದ್ದಾರೆ. ಸಾಮಾನ್ಯ ಜನರಿರಲಿ, ಮಾಧ್ಯಮಗಳಿರಲಿ ಎಲ್ಲರೂ ಪಾಕಿಸ್ತಾನ ಸರ್ಕಾರವನ್ನು ಶಪಿಸುವುದರಲ್ಲಿ ನಿರತರಾಗಿದ್ದಾರೆ.

ಏತನ್ಮಧ್ಯೆ, ಭಾರತದ ಇಸ್ರೋಗಿಂತ ಮುಂಚೆಯೇ ಪಾಕಿಸ್ತಾನದಲ್ಲಿ ಬಾಹ್ಯಾಕಾಶ ಸಂಸ್ಥೆಯನ್ನು ಸ್ಥಾಪಿಸಲಾಯಿತು. 62 ವರ್ಷಗಳಲ್ಲಿ 5 ಉಪಗ್ರಹಗಳ ಉಡಾವಣೆ ಮಾಡಿರುವ SUPARCO ಏಕೆ ಹದಗೆಟ್ಟಿತು? ಇದಕ್ಕೆ ಕಾರಣವೇನು ನೋಡೋಣ ಬನ್ನಿ...

1961 ರಲ್ಲಿ ಪಾಕ್‌ನಲ್ಲಿ ಬಾಹ್ಯಾಕಾಶ ಸಂಸ್ಥೆ ಸ್ಥಾಪನೆ

ಭಾರತದ ಬಾಹ್ಯಾಕಾಶ ಸಂಸ್ಥೆ (ISRO) ಗಿಂತ ಮುಂಚೆಯೇ ಬಾಹ್ಯಾಕಾಶ ಸಂಸ್ಥೆ SUPARCO ಅನ್ನು ಪಾಕಿಸ್ತಾನದಲ್ಲಿ ಸ್ಥಾಪಿಸಲಾಯಿತು. SUPARCO ಅನ್ನು 16 ಸೆಪ್ಟೆಂಬರ್ 1961 ರಂದು ಸ್ಥಾಪಿಸಲಾಯಿತು, ಆದರೆ ISRO ಅನ್ನು 1969 ರಲ್ಲಿ ಸ್ಥಾಪಿಸಲಾಯಿತು.

ಭಾರತಕ್ಕಿಂತ ಮೊದಲು ಉಡಾವಣೆ

SUPARCO 1962 ರಲ್ಲಿ ಇಸ್ರೋಗಿಂತ ಮುಂಚೆಯೇ ಬಾಹ್ಯಾಕಾಶಕ್ಕೆ ರಾಕೆಟ್ ಉಡಾವಣೆ ಮಾಡಿತ್ತು. ಇದಾದ ಬಳಿಕ ಇಸ್ರೋ ನಿಧಾನವಾಗಿ ಪ್ರಗತಿಯ ಹಾದಿ ಹಿಡಿದಿದ್ದು, ಮುಂದೆ ಸಾಗುತ್ತಲೇ ಇತ್ತು. ಆದರೆ ಪಾಕಿಸ್ತಾನ ಸರ್ಕಾರ ಮಾತ್ರ SUPARCO ನತ್ತ ಗಮನಹರಿಸುವುದನ್ನು ಕಡಿಮೆ ಮಾಡಿತು.

62 ವರ್ಷಗಳಲ್ಲಿ ಕೇವಲ 5 ಉಪಗ್ರಹಗಳ ಉಡಾವಣೆ

62 ವರ್ಷಗಳ ಬಾಹ್ಯಾಕಾಶ ಸಂಸ್ಥೆ ಇತಿಹಾಸದಲ್ಲಿ ಪಾಕಿಸ್ತಾನ ಕೇವಲ 5 ಉಪಗ್ರಹಗಳನ್ನು ಉಡಾವಣೆ ಮಾಡಿದೆ. ಮೊದಲ ಉಪಗ್ರಹವನ್ನು 19 ಜುಲೈ 1990 ರಂದು ಉಡಾವಣೆ ಮಾಡಲಾಯಿತು, ಇದನ್ನು ಬದ್ರ್ 1 ಎಂದು ಹೆಸರಿಸಲಾಯಿತು. ಈ ಉಪಗ್ರಹ ಕೇವಲ 6 ತಿಂಗಳು ಮಾತ್ರ ಕೆಲಸ ಮಾಡಿತು. ಇದರ ನಂತರ, ಎರಡನೇ ಉಪಗ್ರಹವನ್ನು 10 ಡಿಸೆಂಬರ್ 2001 ರಂದು ಉಡಾವಣೆ ಮಾಡಲಾಯಿತು, ಅದಕ್ಕೆ ಬದ್ರ್-ಬಿ ಎಂದು ಹೆಸರಿಸಲಾಯಿತು.

ಮೂರನೇ PAKAT-1 ಅನ್ನು ಚೀನಾದ ಸಹಾಯದಿಂದ 11 ಆಗಸ್ಟ್ 2011 ರಂದು ಉಡಾವಣೆ ಮಾಡಲಾಯಿತು. ನಾಲ್ಕನೇ ಉಪಗ್ರಹ iCube-1 ಅನ್ನು 21 ನವೆಂಬರ್ 2013 ರಂದು ಉಡಾವಣೆ ಮಾಡಲಾಯಿತು. ಪಾಕಿಸ್ತಾನವು ಚೀನಾದ ಸಹಾಯದಿಂದ 9 ಜುಲೈ 2018 ರಂದು ಕೊನೆಯ ಮತ್ತು ಐದನೇ ಉಪಗ್ರಹವನ್ನು ಉಡಾವಣೆ ಮಾಡಿತು. ಇದಾದ ನಂತರ ಪಾಕಿಸ್ತಾನ ಯಾವುದೇ ಉಪಗ್ರಹ ಉಡಾವಣೆ ಮಾಡಿಲ್ಲ.

ಏಕೆ ಹದಗೆಟ್ಟಿತು?

ವಾಸ್ತವವಾಗಿ, ಆರಂಭದಲ್ಲಿ, ಪಾಕಿಸ್ತಾನವು ತನ್ನನ್ನು ತಾನು ಸೂಪರ್ ಪವರ್ ಎನಿಸಿಕೊಳ್ಳಲು ನಿರ್ಧರಿಸಿತು. ಇದೇ ಕಾರಣಕ್ಕೆ ಅವರು ಬಾಹ್ಯಾಕಾಶ ಸಂಸ್ಥೆ ಸ್ಥಾಪಿಸಿ ರಾಕೆಟ್ ಉಡಾವಣೆಯಲ್ಲಿ ತೊಡಗಿದ್ದರು. ಪಾಕಿಸ್ತಾನವು ಅಮೆರಿಕದ ಸಹಾಯವನ್ನೂ ತೆಗೆದುಕೊಂಡಿತು. ಆದರೆ ನಂತರ ಅಸ್ಥಿರ ಸರ್ಕಾರ ಮತ್ತು ಸೈನ್ಯದ ದಂಗೆ ಎಲ್ಲವನ್ನೂ ಮುಳುಗಿಸಿತು. ಪಾಕಿಸ್ತಾನವು ಮಿಲಿಟರಿ ಶಕ್ತಿಯನ್ನು ಹೆಚ್ಚಿಸಲು ಮತ್ತು ಕ್ಷಿಪಣಿಗಳನ್ನು ಪರೀಕ್ಷಿಸಲು ತನ್ನ ಹೆಚ್ಚಿನ ಹಣವನ್ನು ಖರ್ಚು ಮಾಡಿತು. ಇಂದು ಭಾರತದ ಬಾಹ್ಯಾಕಾಶ ಸಂಸ್ಥೆಯ ನಿಧಿಯು ಪಾಕಿಸ್ತಾನಕ್ಕಿಂತ ಸುಮಾರು 70 ಪಟ್ಟು ಹೆಚ್ಚಿದೆ.

https://www.vijayavani.net/who-is-iit-bombay-alumnus-who-donated-rs-160-crore-rupees