ಬೇಕರಿ ತಿಂಡಿಗಳನ್ನು ತಿಂದರೆ ಕರೊನಾ ವೈರಸ್​ ಬಹುಬೇಗ ಬರುತ್ತದೆಯಾ? ಏನು ಹೇಳಿದೆ ವಿಶ್ವ ಆರೋಗ್ಯ ಸಂಸ್ಥೆ?

ಕರೊನಾ ವೈರಸ್​ ಬಾರದಂತೆ ತಡೆಯಬೇಕು ಎಂದರೆ ಇಂಥದ್ದನ್ನು ಸೇವಿಸಬೇಕು..ಅಂಥದ್ದನ್ನು ಮುಟ್ಟಬಾರದು, ಹೀಗೆ ಮಾಡಬೇಕು..ಹಾಗೆ ಮಾಡಬೇಕು ಎಂಬಿತ್ಯಾದಿ ವಿವಿಧ ಸಲಹೆ ಸೂಚನೆಗಳು ಸೋಷಿಯಲ್​ ಮೀಡಿಯಾದಲ್ಲಿ ತುಂಬಿ ತುಳುಕುತ್ತಿವೆ.

ಕೆಲವರಂತೂ ವಿಶ್ವ ಆರೋಗ್ಯ ಸಂಸ್ಥೆ (WHO) ಯ ಲೋಗೋ ಹಾಕಿಯೇ ಪೋಸ್ಟ್​​ಗಳನ್ನು ಹಾಕುತ್ತಿದ್ದಾರೆ. ಮನಸಿಗೆ ಬಂದಂತಹ ವಿಚಾರಗಳನ್ನು, ಸಲಹೆಗಳನ್ನು ಡಬ್ಲ್ಯೂಎಚ್​​ಒ ಹೇಳಿದೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಮಾಡಲಾಗುತ್ತಿದೆ.

ಆದರೆ ಹೀಗೆ ಸೋಷಿಯಲ್​ ಮೀಡಿಯಾಗಳಲ್ಲಿ ಹೇಳಲಾಗುವ ಮನೆ ಮದ್ದು, ಅನಧಿಕೃತ ಪೋಸ್ಟ್​​ಗಳನ್ನು ನಂಬಬಾರದು ಎಂಬುದಕ್ಕೆ ಈ ಸ್ಟೋರಿ ಸಾಕ್ಷಿ.

ಫೇಸ್​ಬುಕ್​ ಬಳಕೆದಾರರೋರ್ವರು WHO ದ ಲೋಗೋ ಇರುವ ಒಂದು ಪೋಸ್ಟ್​ ಹಾಕಿ, ಬೇಕರಿ ತಿನಿಸುಗಳನ್ನು ತಿನ್ನುವುದರಿಂದ ಕರೊನಾ ಬಲುಬೇಗನೇ ಬರುತ್ತದೆ ಎಂದು ಪ್ರತಿಪಾದಿಸಿದ್ದರು.

ಈಗಲೇ ಬೇಕರಿ ತಿಂಡಿಗಳನ್ನು ತಿನ್ನುವುದನ್ನು ನಿಲ್ಲಿಸಿ. ಈ ತಿನಿಸುಗಳು ತೊಳೆದು ತಿನ್ನುವಂಥವುಗಳಲ್ಲ. ಹಾಗಾಗಿ ಈ ತಿಂಡಿಗಳು ಬಹುಬೇಗ ವೈರಸ್​ ಸೋಂಕಿಗೆ ಒಳಗಾಗಿ ಕಲುಷಿತಗೊಂಡಿರುತ್ತವೆ ಎಂದು ಬರೆದುಕೊಂಡಿದ್ದ ಒಂದು ಪೋಸ್ಟ್​ ಸಿಕ್ಕಾಪಟೆ ವೈರಲ್​ ಆಗುತ್ತಿತ್ತು. ಡಬ್ಲ್ಯೂಎಚ್​ಒದ ಲೋಗೋದಡಿ ಪ್ರಕಟಿಸಿದ್ದ ಈ ಸಾಲುಗಳನ್ನು ನೋಡಿದರೆ ಎಂಥವರಿಗಾದರೂ ಅದನ್ನು ವಿಶ್ವ ಆರೋಗ್ಯ ಸಂಸ್ಥೆಯೇ ಹೇಳಿದೆ ಎಂದು ಅನ್ನಿಸುತ್ತದೆ.

ಆದರೆ ಇಂಡಿಯಾ ಟುಡೆ ಆ್ಯಂಟಿ ನ್ಯೂಸ್​ ವಾರ್​ ರೂಂ ನಡೆಸಿದ ಫ್ಯಾಕ್ಟ್​ಚೆಕ್​ನಲ್ಲಿ ಗೊತ್ತಾಗಿದ್ದು ಬೇರೆಯದೇ ಸತ್ಯ. ಕರೊನಾ ವೈರಸ್​ ಹರಡುತ್ತಿರುವ ಈ ಸಂದರ್ಭದಲ್ಲಿ ಬೇಕರಿ ತಿಂಡಿಗಳನ್ನು ತಿನ್ನಬೇಡಿ ಎಂದು ಡಬ್ಲ್ಯೂಎಚ್​ಒ ಯಾವುದೇ ಸಲಹೆಯನ್ನೂ ನೀಡಿಲ್ಲ.
ಹಾಗೇ ಬೇಕರಿಯಲ್ಲಿರುವ ಆಹಾರಗಳ ಮೇಲೆ ಕರೊನಾ ವೈರಸ್​ಗಳು ಸುಲಭಕ್ಕೆ ಬಂದು ಅಂಟಿಕೊಳ್ಳುತ್ತವೆ ಎಂಬುದಕ್ಕೆ ಯಾವುದೇ ಪುರಾವೆಯೂ ಇಲ್ಲ, ಸಾಬೀತೂ ಆಗಿಲ್ಲ ಎಂಬ ವಿಚಾರ ಫ್ಯಾಕ್ಟ್​ಚೆಕ್​ನಲ್ಲಿ ಬಯಲಾಗಿದೆ.

ಆದಾಗ್ಯೂ ಕೂಡ ಡಬ್ಲ್ಯೂಎಚ್​ಒದ ಆರೋಗ್ಯ ತಜ್ಞರು ನೊವೆಲ್​ ಕರೊನಾದಿಂದ ಕಾಪಾಡಿಕೊಳ್ಳಲು ಕೆಲವು ಸಲಹೆಗಳನ್ನು ನೀಡಿದ್ದಾರೆ. ಆದರೆ ಅದರಲ್ಲಿ ಎಲ್ಲೂ ಬೇಕರಿ ತಿಂಡಿಗಳು ಕರೊನಾ ವೈರಸ್​ನಿಂದ ಬಹುಬೇಗನೇ ಕಲುಷಿತಗೊಳ್ಳುತ್ತವೆ. ಹಾಗಾಗಿ ತಿನ್ನಬೇಡಿ ಎಂದು ಹೇಳಿದ ಉಲ್ಲೇಖವಿಲ್ಲ.

ಆಹಾರಗಳಿಂದ ಕರೊನಾ ವೈರಸ್​ ಪ್ರಸರಣ ಆಗುತ್ತದೆ ಎಂಬುದಕ್ಕೆ ಪುರಾವೆ ಇಲ್ಲ. ಆದರೆ ಯಾರಾದರೂ ಕರೊನಾ ಸೋಂಕಿತರು ತಮ್ಮ ಕಣ್ಣು, ಮೂಗು, ಬಾಯಿಯನ್ನು ಸ್ಪರ್ಶಿಸಿ, ತಿಂಡಿಯನ್ನು ಅಥವಾ ತಿಂಡಿಯ ಪ್ಯಾಕೆಟ್​​ನ್ನು ಮುಟ್ಟಿ, ಬಳಿಕ ನಾವದನ್ನು ತಿಂದರೆ ನಮಗೂ ಕರೊನಾ ಬರಬಹುದು ಎಂದು ಯುಎಸ್​​ನ ಆಹಾರ ಮತ್ತು ಔಷಧ ಸಂಸ್ಕರಣಾ ಕೇಂದ್ರ ತಿಳಿಸಿದೆ.

ಆಹಾರಗಳ ಪ್ಯಾಕೇಟ್​ನ ಮೇಲ್ಮೈನ ಮೇಲೆ ಕರೊನಾ ವೈರಸ್​ ಸುದೀರ್ಘ ಕಾಲದವರೆಗೆ ಇರಲಾರದು. ಹಾಗಾಗಿ ಅವುಗಳಿಂದ ಸೋಂಕು ತಗುಲುವ ಪ್ರಮಾಣ ತೀರ ಕಡಿಮೆ ಎಂದು ಸಿಡಿಸಿ ಹೇಳಿದೆ.(ಏಜೆನ್ಸೀಸ್​)

ಫೇಸ್​ಬುಕ್​ನಲ್ಲಿ ವೈರಲ್​ ಆಗಿರುವ ನಕಲಿ ಪೋಸ್ಟ್​