ಹೊಸ ನೀತಿಯಿಂದ ವಾಟ್ಸ್​ಆ್ಯಪ್​ಗೆ ಸಂಕಷ್ಟ; ಬಳಕೆದಾರರ ಎದುರು ಹೊಸ ಆಯ್ಕೆಯಾಗಿ ‘ಸಿಗ್ನಲ್’

ವಾಟ್ಸ್​ಆ್ಯಪ್ ತನ್ನ ಸೇವಾ ನಿಯಮ ಮತ್ತು ಗೌಪ್ಯತೆ ನೀತಿಯನ್ನು ಪರಿಷ್ಕರಿಸಿದ್ದು, ಅದನ್ನು ಫೆಬ್ರವರಿ 8ರ ಒಳಗೆ ಅಂಗೀಕರಿಸುವಂತೆ ಬಳಕೆದಾರರಿಗೆ ಸಂದೇಶ ರವಾನಿಸುತ್ತಿದೆ. ತಪ್ಪಿದರೆ, ವಾಟ್ಸ್​ಆ್ಯಪ್​ ಕೆಲಸ ಮಾಡಲ್ಲ ಎಂಬ ಮುನ್ನೆಚ್ಚರಿಕೆಯನ್ನೂ ನೀಡುತ್ತಿದೆ. ಇದು ವ್ಯಾಪಕ ಟೀಕೆಗೆ ಗುರಿಯಾಗಿದೆ. ಅಲ್ಲದೆ, ವಾಟ್ಸ್​ಆ್ಯಪ್​ನಿಂದ ಬೇರೆ ಆ್ಯಪ್​ಗಳಿಗೆ ವಲಸೆ ಪರ್ವ ಶುರುವಾಗಿದೆ. ಈ ವಿದ್ಯಮಾನದ ಕುರಿತು ವಿವರವಾದ ಮಾಹಿತಿ ನೀಡಿದ್ದಾರೆ ಉಮೇಶಕುಮಾರ್ ಶಿಮ್ಲಡ್ಕ.

ಪರಿಷ್ಕೃತ ಪ್ರೖೆವೆಸಿ ಪಾಲಿಸಿಯನ್ನು ಪ್ರಕಟಿಸಿರುವ ವಾಟ್ಸ್​ಆ್ಯಪ್​ಗೆ ದೊಡ್ಡ ಪೆಟ್ಟು ಬಿದ್ದಿದೆ. ಪ್ರತಿಸ್ಪರ್ಧಿ ಆ್ಯಪ್​ಗಳು ಪರಿಸ್ಥಿತಿಯ ಲಾಭ ಪಡೆಯಲು ಯತ್ನಿಸಿವೆ. ಹೀಗಾಗಿ, ವಾಟ್ಸ್​ಆ್ಯಪ್​ ತನ್ನ ನೀತಿಯ ಬಗ್ಗೆ ಸ್ಪಷ್ಟೀಕರಣ ನೀಡಬೇಕಾಗಿ ಬಂದಿದೆ. ಸ್ನೇಹಿತರು ಮತ್ತು ಕುಟುಂಬವರ್ಗದವರೊಂದಿಗಿನ ಸಂವಹನ, ಚಾಟ್, ಗ್ರೂಪ್​ಗಳ ನೀತಿಯಲ್ಲಿ ಯಾವುದೇ ಬದಲಾವಣೆ ಮಾಡಿಲ್ಲ. ಈಗ ಬಿಜಿನೆಸ್ ಬಳಕೆಯ ವಿಚಾರದಲ್ಲಷ್ಟೇ ನೀತಿ ಬದಲಾಗಿದೆ. ಪರಿಷ್ಕೃತ ನೀತಿ ಅದಕ್ಕೆ ಸಂಬಂಧಿಸಿದ್ದು ಎಂದು ವಾಟ್ಸ್​ಆ್ಯಪ್​ ಸ್ಪಷ್ಟೀಕರಣ ನೀಡಿದೆ. ಅದರ ಪ್ರಮುಖಾಂಶಗಳು ಹೀಗಿವೆ.

• ಸ್ನೇಹಿತರು, ಕುಟುಂಬದ ಜತೆಗಿನ ಚಾಟ್ ಅಂದರೆ ವೈಯಕ್ತಿಕ ಸಂದೇಶಗಳಾಗಿದ್ದು ಅದನ್ನು ವಾಟ್ಸ್​ಆಪ್ ಆಗಲೀ ಫೇಸ್​ಬುಕ್ ಆಗಲೀ ನೋಡುವುದಿಲ್ಲ. ಕರೆಗಳನ್ನು ಆಲಿಸುವುದಿಲ್ಲ. ಈ ಸಂದೇಶಗಳು ಎಂಡ್ ಟು ಎಂಡ್ ಎನ್ಕ್ರಿಪ್ಟೆಡ್ ಆಗಿರುತ್ತವೆ.
• ಬಳಕೆದಾರರ ಸಂದೇಶ, ಕರೆಗಳ ಡೇಟಾವನ್ನು ಸಂಗ್ರಹಿಸಿಡುವುದು ಎಂದರೆ ಡೇಟಾ ಡಂಪ್ ಮಾಡುವುದು ಎಂದರ್ಥ. ಇದರಿಂದ ಪ್ರೖೆವೆಸಿ ಮತ್ತು ಸೆಕ್ಯುರಿಟಿ ರಿಸ್ಕ್ ಹೆಚ್ಚು.
• ಬಳಕೆದಾರರು ಫ್ರೆಂಡ್ಸ್ ಜತೆಗೆ ಹಂಚಿಕೊಂಡ ಲೊಕೇಶನ್ ಕೂಡ ವಾಟ್ಸ್​ಆಪ್​ಗೆ ಗೊತ್ತಾಗುವುದಿಲ್ಲ. ಯಾಕೆಂದರೆ ಅದನ್ನು ಎಂಡ್ ಟು ಎಂಡ್ ಎನ್​ಸ್ಕ್ರಿಪ್ಶನ್ ಕಾಪಾಡುತ್ತದೆ.
• ಬಳಕೆದಾರರ ಸಂಪರ್ಕವನ್ನು ಫೇಸ್​ಬುಕ್ ಅಥವಾ ಬೇರಾವುದೇ ಆಪ್ ಜತೆಗೆ ವಾಟ್ಸ್​ಆಪ್ ಹಂಚಿಕೊಳ್ಳುವುದಿಲ್ಲ.
• ಜಾಹೀರಾತಿನ ಕಾರಣಕ್ಕೆ ಯಾವುದೆ ಗ್ರೂಪ್​ಗಳ ಡೇಟಾವನ್ನು ಫೇಸ್​ಬುಕ್ ಜತೆಗೆ ಹಂಚಿಕೊಳ್ಳಲಾಗುವುದಿಲ್ಲ. ಎಂಡ್ ಟು ಎಂಡ್ ಎನ್ಕ್ರಿಪ್ಶನ್ ಇರುವ ಕಾರಣ ಕಚೇರಿ, ರೆಸಿಡೆಂಟ್ ವೆಲ್​ಫೇರ್ ಅಸೋಸಿಯೇಷನ್ ಅಥವಾ ಯಾವುದೇ ಸ್ಕೂಲ್ ಗ್ರೂಪ್​ನಲ್ಲಿ ಸದಸ್ಯರಾಗಿದ್ದರೂ ಅದರಿಂದ ಬಳಕೆದಾರರ ಮಟ್ಟಿಗೆ ಯಾವುದೇ ವ್ಯತ್ಯಾಸವಾಗುವುದಿಲ್ಲ.

ಬಿಜಿನೆಸ್ ಮೆಸೇಜ್ ಭಿನ್ನ

ವಾಟ್ಸ್​ಆಪ್ ಬಿಜಿನೆಸ್ ಆಯ್ಕೆ ಮಾಡಿಕೊಂಡವರ ಬಿಜಿನೆಸ್ ಮೆಸೇಜ್​ಗಳಿಗೆ ಸಂಬಂಧಿಸಿ ಹೊಸ ಸೇವಾ ನಿಯಮ ಮತ್ತು ಗೌಪ್ಯತೆ ನೀತಿ ಅನುಷ್ಠಾನಗೊಂಡಿದ್ದು, ಅಲ್ಲಿ ವಾಟ್ಸ್​ಆಪ್ ಮತ್ತು ಅದರ ಪೇರೆಂಟ್ ಕಂಪನಿ ಫೇಸ್​ಬುಕ್ ನಡುವೆ ಆಂತರಿಕ ಹೊಂದಾಣಿಕೆ ಇರುತ್ತದೆ. ಕೆಲ ದೊಡ್ಡ ಉದ್ಯಮಗಳು ತಮ್ಮ ವಾಟ್ಸ್​ಆಪ್ ಗ್ರೂಪ್​ಗಳ ಸುರಕ್ಷಿತ ಹೋಸ್ಟಿಂಗ್ ಸೇವೆಗಳಿಗೆ ಫೇಸ್​ಬುಕ್ ಅನ್ನು ಬಳಸಬೇಕಾಗಬಹುದು. ಫೇಸ್​ಬುಕ್​ನಲ್ಲಿನ ಜಾಹೀರಾತು ಸೇವೆಗೆ ವಾಟ್ಸ್​ಆಪ್ ಬಳಕೆ ಇತ್ಯಾದಿಗಳಿಗೂ ಇದು ಅನ್ವಯವಾಗುತ್ತದೆ. ಈ ಲೇಬಲ್​ಗಳು ಈಗಾಗಲೇ ಕಾಣಿಸಿಕೊಳ್ಳತೊಡಗಿವೆ. ಇನ್​ಸ್ಟಾಗ್ರಾಂ ಸೇವೆಗಳಲ್ಲೂ ಇದು ಕಾಣಿಸಿದೆ.

ಯುರೋಪ್ ರಾಷ್ಟ್ರಗಳ ನೀತಿ

ಸರ್ಕಾರ ಪರಿಶೀಲಿಸಲಿದೆ: ಮಾಹಿತಿ-ತಂತ್ರಜ್ಞಾನ ಸಚಿವಾಲಯ ಆಂತರಿಕವಾಗಿ ಫೇಸ್​ಬುಕ್ ಮಾಲೀಕತ್ವದ ವಾಟ್ಸ್ ಆಪ್ ನೀತಿಯನ್ನು ಪರಿಶೀಲನೆಗೆ ಒಳಪಡಿಸಿದೆ. ಆದಾಗ್ಯೂ, ಈ ಕುರಿತು ಸ್ಪಷ್ಟೀಕರಣ ನೀಡುವಂತೆ ವಾಟ್ಸ್​ಆಪ್ ಅನ್ನು ಸಚಿವಾಲಯ ಇದುವರೆಗೆ ಕೇಳಿಲ್ಲ ಎಂದು ಮೂಲಗಳು ತಿಳಿಸಿವೆ.

ಟೆಲಿಗ್ರಾಂಗೆ ಬೇಡಿಕೆ

ಇದು ಕೂಡ ಎನ್ಕ್ರಿಪ್ಟೆಡ್ ಮೆಸೇಜಿಂಗ್ ಆಪ್. ರಷ್ಯನ್ ಸಹೋದರರಾದ ನಿಕೋಲಾಯ್ ಮತ್ತು ಪವೆಲ್ ದುರೋವ್ ಇದರ ಸ್ಥಾಪಕರು. ವಾಟ್ಸ್​ಆಪ್ ಮಾದರಿಯ ಅಂಶಗಳನ್ನು ಇದು ಕೂಡ ಹೊಂದಿದೆ. 2013ರಿಂದಲೇ ಚಾಲ್ತಿಯಲ್ಲಿರುವ ಕಾರಣ ಸಿಗ್ನಲ್​ಗಿಂತ ಹೆಚ್ಚು ಅಂಶಗಳನ್ನು ಹೊಂದಿದೆ. ಗ್ರೂಪ್​ಗಳಲ್ಲಿ 2 ಲಕ್ಷ ಸದಸ್ಯರನ್ನು ಸೇರಿಸಬಹುದು. ವಾಟ್ಸ್ ಆಪ್​ನಲ್ಲಿ 257ರ ಮಿತಿ ಇದೆ. ವಾಟ್ಸ್​ಆಪ್​ನ ಹೊಸ ಸೇವಾ ನಿಯಮ ಮತ್ತು ಗೌಪ್ಯತೆ ನೀತಿ ವಿವಾದವೆಬ್ಬಿಸಿದ ಬೆನ್ನಿಗೆ ಟೆಲಿಗ್ರಾಂ ಬಳಕೆದಾರರ ಸಂಖ್ಯೆ 50 ಕೋಟಿ ಏರಿಕೆಯಾಗಿದೆ. ಕಳೆದ 72 ಗಂಟೆ ಅವಧಿಯಲ್ಲಿ 2.5 ಕೋಟಿ ಬಳಕೆದಾರರು ಸೇರ್ಪಡೆಯಾಗಿದ್ದಾರೆ.

ಹೀಗಿದೆ ಸಿಗ್ನಲ್ ಆಪ್

ವಾಟ್ಸ್​ಆಪ್ ಸಂಸ್ಥಾಪಕ ಬ್ರಿಯಾನ್ ಆಕ್ಟನ್ ಇದರ ಸಹಸಂಸ್ಥಾಪಕ. ಸಿಗ್ನಲ್​ನಲ್ಲಿ ಬಳಸುತ್ತಿರುವ ಎಂಡ್ ಟು ಎಂಡ್ ಪ್ರೊಟೊಕಾಲ್ ಅನ್ನು ವಾಟ್ಸ್​ಆಪ್ ಬಳಸುತ್ತಿದೆ. ವಾಟ್ಸ್​ಆಪ್​ನಲ್ಲಿರುವ ಅನೇಕ ಅಂಶಗಳು ಇದರಲ್ಲೂ ಇವೆ. ಆದರೆ, ವಿಡಿಯೋ ಕಾಲಿಂಗ್ ಮತ್ತು ಇತರ ಕೆಲವು ಅಂಶಗಳು ಇನ್ನೂ ಬೇಟಾ ಸ್ಥಿತಿಯಲ್ಲಿವೆ. ವಾಟ್ಸ್​ಆಪ್​ನಲ್ಲಿರುವಂತೆ ತೃತೀಯ ಪಕ್ಷದ ಸೇವೆಗಳಲ್ಲಿ ಅಂದರೆ ಗೂಗಲ್ ಡ್ರೖೆವ್ ಅಥವಾ ಐಕ್ಲೌಡ್​ನಲ್ಲಿ ಅಥವಾ ಇತರ ಬಿಜಿನೆಸ್ ಖಾತೆಗಳಿಗೆ ಜೋಡಿಸುವಲ್ಲಿ ಸಿಗ್ನಲ್ ಇನ್ನೂ ಹಿಂದಿದೆ.

ಭಾರತದ ಸ್ಥಿತಿ: ವೈಯಕ್ತಿಕ ಡೇಟಾ ರಕ್ಷಣಾ ಮಸೂದೆ ಸಂಸತ್ತಿನಲ್ಲಿ ಅಂಗೀಕಾರವಾಗುವ ತನಕ ಭಾರತೀಯರಿಗೆ ಸಂಕಷ್ಟ ತಪ್ಪಿದ್ದಲ್ಲ. ಭಾರತದಲ್ಲಿ ಈ ಸಂಬಂಧ ನಿಯಂತ್ರಣ ಪ್ರಾಧಿಕಾರದ ಕೊರತೆ ಇದೆ.

https://www.vijayavani.net/in-this-issue-bangalore-is-2n-worst-in-nation-and-6th-worst-in-world/

https://www.vijayavani.net/lady-who-cannot-stay-away-from-husband-jumped-from-court-building/