ಬೆಳಗ್ಗೆಯಿಂದ ಸಂಜೆಯವರೆಗೂ ಮರದ ಮೇಲೆಯೇ ಕುಳಿತಿರುತ್ತಾರೆ ಈ ಶಿಕ್ಷಕ...; ಮಕ್ಕಳ ಬಗ್ಗೆ ಇರುವ ಕಾಳಜಿಯೇ ಇದಕ್ಕೆ ಕಾರಣ

ಕೋಲ್ಕತ್ತ: ಲಾಕ್​ಡೌನ್​ ಇದ್ದುದರಿಂದ ಮಕ್ಕಳೆಲ್ಲ ಮನೆಯಲ್ಲಿಯೇ ಇದ್ದಾರೆ. ಸದ್ಯ ಕೆಲವು ತರಗತಿಗಳಿಗೆ ಆನ್​ಲೈನ್​ ಮೂಲಕ ಪಾಠ ಮಾಡಲಾಗುತ್ತಿದೆ. ಶಿಕ್ಷಕರು ಮನೆಯಲ್ಲೇ ಕುಳಿತು ಮೊಬೈಲ್​ ಮೂಲಕವೇ ಬೋಧನೆ ಮಾಡುತ್ತಿದ್ದರೆ, ಮಕ್ಕಳೂ ಮನೆಯಲ್ಲೇ ಕುಳಿತು ಕಲಿಯುತ್ತಿದ್ದಾರೆ.

ಆದರೆ ಪಶ್ಚಿಮ ಬಂಗಾಳದ ಬಂಕುರಾ ಎಂಬ ಗ್ರಾಮದ ಶಿಕ್ಷಕ ಮರವನ್ನೇರಿ ಕುಳಿತಿದ್ದಾರೆ...!

ಪಾಠ ಮಾಡುವುದನ್ನು ಬಿಟ್ಟು ಈ ಶಿಕ್ಷಕ ಮೊಬೈಲ್​ ಹಿಡಿದುಕೊಂಡು ಮರದ ಮೇಲೆ ಕುಳಿತಿದ್ದಾರೆ ಎಂದುಕೊಳ್ಳಬೇಡಿ. ಅವರು ಮರ ಹತ್ತಿ ಕುಳಿತಿದ್ದು, ಮಕ್ಕಳಿಗೆ ಮೊಬೈಲ್​ ಮೂಲಕ ಪಾಠ ಮಾಡಲು...

ಗೊಂದಲ ಬೇಡ..ಈ ಗ್ರಾಮದಲ್ಲಿ ಸರಿಯಾಗಿ ನೆಟ್​ವರ್ಕ್​ ಸಿಗುತ್ತಿಲ್ಲ. ಹಾಗಾಗಿ ಶಿಕ್ಷಕ ಸುಬ್ರತೋ ಪಾಠಿ ಎಂಬುವರು ನೆಟ್​ವರ್ಕ್​ಗಾಗಿ ಮರದ ಮೇಲೆ ಕುಳಿತೇ ಮಕ್ಕಳಿಗೆ ಪಾಠ ಮಾಡುತ್ತಿದ್ದಾರೆ.

ನಮ್ಮ ಹಳ್ಳಿಯಲ್ಲಿ ಎಲ್ಲ ಕಡೆಗಳಲ್ಲೂ ಸರಿಯಾಗಿ ನೆಟ್​ವರ್ಕ್​ ಸಿಗುವುದಿಲ್ಲ. ನನಗೆ ಬೆಳಗ್ಗೆ 9.30ರಿಂದ ಸಂಜೆ 6ಗಂಟೆವರೆಗೆ ವಿವಿಧ ತರಗತಿಗಳಿಗೆ ಆನ್​ಲೈನ್​ ಪಾಠ ಮಾಡಬೇಕಾಗಿದೆ. ಸಿಗ್ನಲ್​ ಪದೇಪದೆ ಕಟ್​ ಆಗುತ್ತಿದ್ದರೆ ತೊಡಕಾಗುತ್ತದೆ. ಮರದ ಮೇಲೆಯೇ ಕುಳಿತರೆ ನೆಟ್​ವರ್ಕ್​ ಸರಿಯಾಗಿ ಸಿಗುತ್ತದೆ ಎಂದು ಸುಬ್ರತೋ ತಿಳಿಸಿದ್ದಾರೆ. ನೆಟ್​ವರ್ಕ್​ ಸಮಸ್ಯೆಯಿಂದ ಮಕ್ಕಳ ಕಲಿಕೆಗೆ ಅಡ್ಡಿಯಾಗಬಾರದು ಎಂಬ ಕಾರಣಕ್ಕೆ ಶಿಕ್ಷಕ ಹೀಗೆ ಮರದ ಮೇಲೆ ಕುಳಿತು ಪಾಠ ಮಾಡುತ್ತಿರುವುದು ಮೆಚ್ಚುಗೆಗೆ ಪಾತ್ರವಾಗಿದೆ. (ಏಜೆನ್ಸೀರ್ಸ್​)