ಒಂಬತ್ತು ಗುಂಪುಗಳು ಸಕ್ರಿಯ: ಪೆನ್ಸೆಲ್ವೇನಿಯಾ, ಜಾರ್ಜಿಯಾ, ಮಿಚಿಗನ್, ವಿಸ್ಕಾನ್ಸಿನ್ ರಾಜ್ಯಗಳಲ್ಲಿ ಸಂಘರ್ಷಮಯ ಸನ್ನಿವೇಶ ಇದೆ ಎಂದು ‘ಶಸ್ತ್ರ ಸಂಘರ್ಷ ಪ್ರದೇಶ ಮತ್ತು ಇವೆಂಟ್ ಡೇಟಾ ಯೋಜನೆ (ಎಸಿಎಲ್ಇಡಿ) ಹಾಗೂ ಬಂಡುಕೋರ ಚಟುವಟಿಕೆ ಮೇಲಿನ ನಿಗಾ ಸಂಸ್ಥೆಗಳು ಎಚ್ಚರಿಸಿವೆ. ಈ ಪ್ರದೇಶದಲ್ಲಿ ಸಮಾಜಘಾತುಕ ಚಟುವಟಿಕೆಗಳು ಚುನಾವಣಾ ವೇಳೆ ಹೆಚ್ಚಾಗಬಹುದು ಎಂದು ವರದಿ ನೀಡಿವೆ. ಪರ್ಯಾಯ ಪೊಲೀಸ್ ಅಥವಾ ಸಾರ್ವಜನಿಕರ ರಕ್ಷಣೆ ಹೆಸರಿನಲ್ಲಿ ಒಂಬತ್ತು ಗುಂಪುಗಳು ಸಕ್ರಿಯವಾಗಿವೆ. ಪ್ರೌಡ್ ಬಾಯ್ಸ್ನ ಪೇಟ್ರಿಯಾಟ್ ಪ್ರೇಯರ್ಸ್, ವೋಥ್ ಕೀಪರ್ಸ್, ಲೈಟ್ ಫೂಟ್ ಮಿಲ್ಟಿಯಾ, ಸಿವಿಲ್ ಡಿಫೆನ್ಸ್ ಫೋರ್ಸ್, ಅಮೆರಿಕನ್ ಕಂಟಿಂಜನ್ಸಿ, ಬೂಗಲೂ ಬೋಯಿಸ್ ಸಂಘಟನೆಗಳು ಹೆಚ್ಚು ಸಕ್ರಿಯವಾಗಿವೆ. ಇವುಗಳಲ್ಲಿ ಕೆಲವು ಅಧ್ಯಕ್ಷ ಟ್ರಂಪ್ಗೆ ಬಹಿರಂಗವಾಗಿ ಬೆಂಬಲ ಸೂಚಿಸಿವೆ. ಹೀಗಾಗಿ ಚುನಾವಣಾ ದಿನ ಅಥವಾ ನಂತರದಲ್ಲಿ ಈ ಗುಂಪುಗಳು ಸಂಘರ್ಷ ನಡೆಸುವ ಸಾಧ್ಯತೆ ಇದೆ ಎಂದು ವರದಿಯಲ್ಲಿ ಉಲ್ಲೇಖಿಸಿದೆ. ಈ ಚುನಾವಣೆಯಲ್ಲಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ವಿರುದ್ಧ ಫಲಿತಾಂಶ ಬಂದರೆ ಅವರನ್ನು ಬೆಂಬಲಿಸುವ ಬಲಪಂಥೀಯ ಹೋರಾಟಗಾರರು ಹಿಂಸಾಚಾರ ನಡೆಸುವ ಸಾಧ್ಯತೆ ಇದೆ ಎಂದು ಟ್ರಂಪ್ ಆಡಳಿತವೇ ಸುಳಿವು ನೀಡಿದೆ.
