ಏಕಾಂಗಿ, ಜಂಟಿ ಹೋರಾಟ: ಈ ಬಾರಿ ಲೋಕಸಭೆ ಚುನಾವಣೆಯಲ್ಲಿ ಕಾಂಗ್ರೆಸ್ ಏಕಾಂಗಿಯಾಗಿ ಹೋರಾಡಲಿದೆ. 28 ಅಭ್ಯರ್ಥಿಗಳಿಗೆ ಸಿಎಂ ಸಿದ್ದರಾಮಯ್ಯ, ಡಿಸಿಎಂ ಡಿ.ಕೆ.ಶಿವಕುಮಾರ್ ಪ್ರಚಾರದ ಟ್ರಂಪ್ ಕಾರ್ಡ್ ಆಗಲಿದ್ದಾರೆ. ಜತೆಗೆ ಪಕ್ಷದ ರಾಷ್ಟ್ರೀಯ ನಾಯಕರು, ಸಿನಿ ತಾರೆಯರು ಸೇರಿ ಪ್ರಭಾವಿ ನಾಯಕರ 40 ಜನ ಸ್ಟಾರ್ ಪ್ರಚಾರಕರು ಮತಬೇಟೆಗೆ ಇಳಿಯಲಿದ್ದಾರೆ. ಮತ್ತೊಂದೆಡೆ ಬಿಜೆಪಿ, ಜೆಡಿಎಸ್ ಮೈತ್ರಿ ಪಕ್ಷಗಳು ಪ್ರಧಾನಿ ಮೋದಿ, ಮಾಜಿ ಪ್ರಧಾನಿ ಎಚ್.ಡಿ. ದೇವೇಗೌಡರ ವರ್ಚಸ್ಸನ್ನು ನಂಬಿವೆ. ಇವರಿಬ್ಬರ ಖ್ಯಾತಿಯ ಅಲೆ ಪರಿಣಾಮಬೀರಿ, ಗುರಿ ತಲುಪಲು ನೆರವಾಗಲಿವೆ ಎಂದೇ ದೋಸ್ತಿ ಪಡೆ ನಂಬಿದೆ. ಇನ್ನು ಬಿಜೆಪಿ ರಾಷ್ಟ್ರೀಯ ನಾಯಕರು, ಮಾಜಿ ಸಿಎಂಗಳಾದ ಯಡಿಯೂರಪ್ಪ, ಎಚ್.ಡಿ. ಕುಮಾರಸ್ವಾಮಿ ಒಳಗೊಂಡು 40 ಜನ ಸ್ಟಾರ್ ಪ್ರಚಾರಕರ ರಾಜ್ಯ ಪ್ರವಾಸದ ಪಟ್ಟಿ ಸಿದ್ಧಗೊಂಡಿದೆ.
