ಸಂಪುಟ ವಿಸ್ತರಣೆಗೆ ಅನುಮತಿ ಪಡೆಯಲು ಕಳೆದೊಂದು ತಿಂಗಳಿಂದಲೂ ಪಕ್ಷದ ಅಧ್ಯಕ್ಷ ಅಮಿತ್ ಷಾ ಭೇಟಿ ಮಾಡಲು ಸಿಎಂ ಬಿಎಸ್ವೈ ಅನೇಕ ಬಾರಿ ಪ್ರಯತ್ನ ನಡೆಸಿದರೂ, ಫಲಕಾರಿಯಾಗಿಲ್ಲ. ಅನ್ಯ ರಾಜ್ಯಗಳಲ್ಲಿ ಸರ್ಕಾರ ಕಳೆದುಕೊಂಡ ಸಂದರ್ಭ ಪೂರ್ಣ ಬಹುಮತದ ಸರ್ಕಾರ ಕರ್ನಾಟಕದಲ್ಲಿ ರಚನೆಯಾಗಿದೆ. ಆದರೂ ಆ ಖುಷಿಯನ್ನು ಹಂಚಿಕೊಳ್ಳಲು ತಯಾರಿಲ್ಲದ ವರಿಷ್ಠರು, ಸಂಪುಟ ವಿಸ್ತರಣೆ ಬಗ್ಗೆ ಚಕಾರವೆತ್ತಿಲ್ಲ. ಆರಂಭದಲ್ಲಿ ಜಾರ್ಖಂಡ್ ಚುನಾವಣೆ ನೆಪ, ಬಳಿಕ ಪೌರತ್ವ ಕಾಯ್ದೆ ಬೆಳವಣಿಗೆ ಹೀಗೆ ಒಂದಾದ ಮೇಲೊಂದು ನೆಪ ಹೇಳಿಕೊಂಡೇ ಕಾಲ ತಳ್ಳುತ್ತಿರುವುದು ರಾಜ್ಯ ಬಿಜೆಪಿ ನಾಯಕರಿಗೂ ಬಿಸಿತುಪ್ಪವಾಗಿ ಪರಿಣಮಿಸಿದೆ. ಪಕ್ಷದ ಉನ್ನತ ಮೂಲಗಳ ಪ್ರಕಾರ, ಯಡಿಯೂರಪ್ಪ ಅವರನ್ನು ಹಿಡಿತದಲ್ಲಿಟ್ಟುಕೊಳ್ಳಲು ಸತಾಯಿಸಲಾಗುತ್ತಿದೆ ಎಂಬ ಮಾತಿದೆ. ಉಪಚುನಾವಣೆ ಫಲಿತಾಂಶ ಬಳಿಕ ಅವರ ಪ್ರಭಾವ ಮತ್ತಷ್ಟು ವೃದ್ಧಿಯಾಗಿದ್ದು, ಅವರನ್ನು ನಿಯಂತ್ರಿಸಲು ಪರೋಕ್ಷವಾಗಿ ಈ ರೀತಿ ಮಾಡಲಾಗುತ್ತಿದೆ ಎಂದು ಹೇಳಲಾಗುತ್ತಿದೆ. ಒಂದು ಹಂತದಲ್ಲಿ ಸಿಎಂ ಸಚಿವಾಲಯದ ಅಧಿಕಾರಿಗಳ ಬಗ್ಗೆ ಮತ್ತು ಕುಟುಂಬದಿಂದ ಅಂತರ ಕಾಯ್ದುಕೊಳ್ಳುವ ಕುರಿತು ಸಲಹೆಗಳು ಬಂದಿದ್ದವು. ಸಲಹೆಯನ್ನು ವಿನಮ್ರವಾಗಿ ಸ್ವೀಕರಿಸಿದ್ದ ಬಿಎಸ್ವೈ ಅಧಿಕಾರಿಗಳನ್ನು ಬದಲಿಸಿದ್ದರು. ಇಷ್ಟರ ನಡುವೆಯೂ ಸರ್ಕಾರದೊಳಗೆ ಸಂಬಂಧಪಡದವರ ‘ಹಸ್ತಕ್ಷೇಪ’ ವರಿಷ್ಠರಿಗೆ ರುಚಿಸಿಲ್ಲ. ಬಿಎಸ್ವೈ ಕಾರ್ಯವೈಖರಿ, ಬದ್ಧತೆ, ಕಾಳಜಿ, ನಡೆಗಳ ಬಗ್ಗೆ ವರಿಷ್ಠರಿಗೆ ಯಾವುದೇ ತಕರಾರು ಇಲ್ಲವಾದರೂ, ಸರ್ಕಾರದೊಳಗಿನ ಬೆಳವಣಿಗೆ, ತೀರ್ವನಗಳ ಕುರಿತು ‘ಅನ್ಯರ ಹಸ್ತಕ್ಷೇಪ’ ಸಹ್ಯವೆನಿಸಿಲ್ಲ. ಅಷ್ಟೇ ಅಲ್ಲದೇ ಪ್ರಧಾನಿ ನರೇಂದ್ರ ಮೋದಿ ಅವರ ರಾಜ್ಯ ಪ್ರವಾಸದ ವೇಳೆ ತುಮಕೂರಿನಲ್ಲಿ ಸಿಎಂ ಮಾಡಿದ ಭಾಷಣ ಕೇಂದ್ರಕ್ಕೆ ಚುರುಕುಮುಟ್ಟಿಸಿತ್ತು. ಅದೇ ಮುನಿಸು ಮುಂದುವರಿಸಿರುವ ವರಿಷ್ಠರು, ಸಂಪುಟ ವಿಸ್ತರಣೆಗೆ ಚಕಾರವೆತ್ತಿಲ್ಲ ಎಂದು ಮೂಲಗಳು ತಿಳಿಸಿವೆ.
