ಗ್ರಾಮ ಪಂಚಾಯತ್ ಕಣ ಅಖೈರು: 1,06,069 ಕಲಿಗಳು ಅಖಾಡದಲ್ಲಿ...

ಬೆಂಗಳೂರು: ಗ್ರಾಮ ಪಂಚಾಯಿತಿ ಚುನಾವಣೆಗೆ ಅಖಾಡ ಅಖೈರಾಗಿದೆ. ಮೊದಲ ಹಂತದ ಚುನಾವಣೆಯಲ್ಲಿ 106069 ಅಭ್ಯರ್ಥಿಗಳು ಕಣದಲ್ಲಿದ್ದಾರೆ. ಒಟ್ಟು 3020 ಗ್ರಾಮ ಪಂಚಾಯಿತಿಗಳ 47581 ಸದಸ್ಯ ಸ್ಥಾನಗಳಿಗೆ ಡಿ.22ರಂದು ಮತದಾನ ನಡೆಯಲಿದೆ.ಅಚ್ಚರಿಯ ಸಂಗತಿ ಎಂದರೆ, ಮೊದಲ ಹಂತದಲ್ಲಿ ಸುಮಾರು 4364 ಮಂದಿ ಅವಿರೋಧ ಆಯ್ಕೆಯಾಗಿದ್ದಾರೆ. ಕರೊನಾ, ಸದಸ್ಯತ್ವ ಹರಾಜು, ಮೂರೂ ಪಕ್ಷಗಳ ನಾಯಕರ ಪ್ರಯತ್ನದ ಫಲವಾಗಿ ಈ ಬಾರಿ ಅತಿ ಹೆಚ್ಚು ಸದಸ್ಯರು ಅವಿರೋಧ ಆಯ್ಕೆಯಾಗಿದ್ದಾರೆ. ಹಳ್ಳಿಗಳಲ್ಲೂ ಭರ್ಜರಿ ರಾಜಕೀಯ ಪೈಪೋಟಿ ನಡುವೆಯೂ ಅವಿರೋಧ ಆಯ್ಕೆಯಾಗುವವರ ಸಂಖ್ಯೆ ಹಿಂದಿನ ಕೆಲ ಚುನಾವಣೆ ಗಳಿಗಿಂತ ಅತಿ ಹೆಚ್ಚಾಗಿದೆ. ಮತದಾನಕ್ಕೆ ಇನ್ನು ಏಳು ದಿನ ಬಾಕಿ ಇದ್ದು, ಅಭ್ಯರ್ಥಿಗಳು ಗೆಲುವಿಗೆ ಸರ್ಕಸ್ ಮಾಡುತ್ತಿದ್ದಾರೆ.

• ಬಳ್ಳಾರಿಯ ಸಿದ್ದಮ್ಮನಹಳ್ಳಿ ಗ್ರಾಪಂನ ಎಲ್ಲ 16 ಸದಸ್ಯರೂ ಅವಿರೋಧ ಆಯ್ಕೆಯಾಗಿದ್ದಾರೆ.
• ಬಳ್ಳಾರಿಯ ಸಿಂದಿಗೇರಿ ಗ್ರಾಪಂ ವ್ಯಾಪ್ತಿಯ ಬೈಲೂರಿನ ಎಲ್ಲ 13 ಸದಸ್ಯರು ಅವಿರೋಧ ಆಯ್ಕೆ ಆಗಿದ್ದಾರೆ. ಹರಾಜು ಮೂಲಕ ಆಯ್ಕೆ ನಡೆದಿದ್ದಕ್ಕೆ ಕ್ರಿಮಿನಲ್ ಪ್ರಕರಣ ದಾಖಲಾಗಿದೆ.

72 ವರ್ಷಗಳಿಂದ ಅವಿರೋಧ

ಬೆಳಗಾವಿ ಜಿಲ್ಲೆ ಹುಕ್ಕೇರಿ ತಾಲೂಕು ಬೆಲ್ಲದ ಬಾಗೇವಾಡಿ ಗ್ರಾಪಂಗೆ 1948ರಿಂದ ಈವರೆಗೆ ಒಂದು ಬಾರಿ ಮಾತ್ರ, ಅಂದರೆ 1977ರಲ್ಲಿ ಒಂದು ವಾರ್ಡ್​ಗೆ ಚುನಾವಣೆ ನಡೆದಿದ್ದು ಬಿಟ್ಟರೆ ಉಳಿದಂತೆ ಮತದಾನವೇ ನಡೆದಿಲ್ಲ. ಚುನಾವಣೆ ಘೊಷಣೆ ಮಾಡುತ್ತಿದ್ದಂತೆ ಗ್ರಾಮದ ಪ್ರಮುಖರಾದ ಉಮೇಶ್ ಕತ್ತಿ ಕುಟುಂಬದ ನೇತೃತ್ವದಲ್ಲಿ ಗ್ರಾಮಸ್ಥರು ಸಭೆ ಸೇರುತ್ತಾರೆ. ಕಳೆದ ಬಾರಿ ಯಾರಿಗೆ ಮತ್ತು ಯಾವ ಸಮುದಾಯಕ್ಕೆ ಪ್ರಾತಿನಿಧ್ಯ ಕೊಡಲಾಗಿತ್ತು ಹಾಗೂ ಯಾವುದಕ್ಕೆ ಕೊಟ್ಟಿರಲಿಲ್ಲ ಎಂಬುದನ್ನು ಪರಿಶೀಲಿಸುತ್ತಾರೆ. ಆಯಾ ಸಮುದಾಯದಲ್ಲಿ ಕ್ರಿಯಾಶೀಲ ವ್ಯಕ್ತಿಯನ್ನು ಗುರುತಿಸಿ ಆಯ್ಕೆ ಮಾಡುತ್ತಾರೆ. ನಂತರ ವಾರ್ಡ್ ಪ್ರಮುಖರನ್ನು ಸೇರಿಸಿ ಆಯ್ಕೆಯಾದ ವ್ಯಕ್ತಿ ಕುರಿತು ಆಕ್ಷೇಪಣೆ ಇದ್ದರೆ ಕೇಳಿ ರ್ಚಚಿಸುತ್ತಾರೆ. ಎಲ್ಲರ ಒಪ್ಪಿಗೆ ಮೇರೆಗೆ ಗ್ರಾಪಂ ಪ್ರತಿನಿಧಿ ಎಂದು ಘೊಷಿಸುತ್ತಾರೆ. ಅದೇ ರೀತಿ ಎಲ್ಲ ವಾರ್ಡ್​ಗಳಲ್ಲಿ ಆಯ್ಕೆಗೊಳಿಸಿದ ಬಳಿಕ ಅಧ್ಯಕ್ಷ, ಉಪಾಧ್ಯಕ್ಷರ ಆಯ್ಕೆಯಲ್ಲಿಯೂ ಮೀಸಲಾತಿಗೆ ಅನುಗುಣವಾಗಿ ಸರ್ವಸಮ್ಮತ ವ್ಯಕ್ತಿಯನ್ನು ಆಯ್ಕೆ ಮಾಡುತ್ತಾರೆ. ಈ ಬಾರಿ 33 ವಾರ್ಡ್​ಗಳಿಗೆ ಅವಿರೋಧ ಆಯ್ಕೆ ನಡೆದಿದೆ.

ಚಿಕ್ಕಮಗಳೂರಿನ 16 ಗ್ರಾಪಂಗಳಲ್ಲಿ ಬಹಿಷ್ಕಾರ

ಚಿಕ್ಕಮಗಳೂರು ಜಿಲ್ಲೆಯ ಮಲೆನಾಡು ಭಾಗದಲ್ಲಿ ಕಸ್ತೂರಿ ರಂಗನ್ ವರದಿ ಹಾಗೂ ಪರಿಸರ ಸೂಕ್ಷ್ಮ ವಲಯ ಜಾರಿ ವಿರೋಧಿಸಿ 16 ಗ್ರಾಪಂಗಳಲ್ಲಿ ಜನರು ಚುನಾವಣೆ ಬಹಿಷ್ಕರಿಸಿದ್ದಾರೆ. ವರದಿ ವಿರೋಧಿಸಿ ಎಲ್ಲರೂ ನಾಮಪತ್ರ ಹಿಂತೆಗೆದುಕೊಳ್ಳಬೇಕು ಎಂದು ಐಡಿ ಪೀಠ ಗ್ರಾಮದಲ್ಲೂ ನಿರ್ಣಯ ಮಾಡಲಾಗಿತ್ತು. 11 ಮಂದಿ ನಾಮಪತ್ರ ಸಲ್ಲಿಸಿದ್ದು, 10 ಜನ ಒಟ್ಟಿಗೆ ತೆರಳಿ ವಾಪಸ್ ಪಡೆದಿದ್ದರು. ಗರ್ಭಿಣಿಯಾಗಿದ್ದ ಸುಮಿತ್ರಾ ಅದೇ ದಿನ ಹೆರಿಗೆಗಾಗಿ ಆಸ್ಪತ್ರೆಗೆ ದಾಖಲಾಗಬೇಕಿತ್ತು. ಡಿ.14ರಂದು ಪತಿ ಜತೆ ಹೋಗಿ ನಾಮಪತ್ರ ವಾಪಸ್ ಪಡೆದು ಆಸ್ಪತ್ರೆಗೆ ತೆರಳಿದ ಕೆಲವೇ ಸಮಯದಲ್ಲಿ ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದಾರೆ.

ಕದನ ಕಣದಲ್ಲಿ ತಂದೆ-ತಾಯಿ-ಪುತ್ರ

• ಚಾಮರಾಜನಗರ ಜಿಲ್ಲೆ ಕಿನಕಹಳ್ಳಿ ಗ್ರಾಮದಲ್ಲಿ ಓರಗಿತ್ತಿಯರು ಚುನಾವಣೆಯಲ್ಲಿ ಸ್ಪರ್ಧಿಸುವ ಮೂಲಕ ಗಮನ ಸೆಳೆದಿದ್ದಾರೆ. ಗ್ರಾಮದ 1ನೇ ವಾರ್ಡ್​ನಿಂದ (ಪರಿಶಿಷ್ಟ ಜಾತಿ ಮಹಿಳೆ) ರಾಚಯ್ಯ ಪತ್ನಿ ಮಹಾದೇವಮ್ಮ ಹಾಗೂ 2ನೇ ವಾರ್ಡ್ (ಪರಿಶಿಷ್ಟ ಜಾತಿ ಮಹಿಳೆ)ನಿಂದ ನಂಜುಂಡಯ್ಯ ಪತ್ನಿ ಡಿ.ಎಲ್.ರಾಣಿ ನಾಮಪತ್ರ ಸಲ್ಲಿಸಿದ್ದಾರೆ.
• ದಾವಣಗೆರೆ ತಾಲೂಕಿನ ಅಣಬೇರು ಗ್ರಾಪಂ ಚುನಾವಣೆಗೆ ಒಂದೇ ಕುಟುಂಬದ ಮೂವರು ಕಣಕ್ಕಿಳಿದಿದ್ದಾರೆ.
• ಮಂಡ್ಯ ಜಿಲ್ಲೆ ಪಾಂಡವಪುರ ತಾಲೂಕು ಕೆನ್ನಾಳು ಗ್ರಾಪಂಗೆ ಆಯ್ಕೆ ಬಯಸಿ ತಂದೆ, ತಾಯಿ ಹಾಗೂ ಪುತ್ರ ನಾಮಪತ್ರ ಸಲ್ಲಿಸಿದ್ದಾರೆ. ಹರಳಹಳ್ಳಿ ಗ್ರಾಮದ ಎಸ್.ಸುಬ್ರಹ್ಮಣ್ಯ 1ನೇ ವಾರ್ಡ್​ನ ಸಾಮಾನ್ಯ ಕ್ಷೇತ್ರದಿಂದ, ಅವರ ಪತ್ನಿ ಸುಮಿತ್ರಾ ಸುಬ್ಬಣ್ಣ ವಿಶ್ವೇಶ್ವರಯ್ಯನಗರದ ಬಿಸಿಎಂ ಬಿ ಮಹಿಳಾ ಕ್ಷೇತ್ರದಿಂದ ಹಾಗೂ ಪುತ್ರ ಅಭಿಷೇಕ್ ಹರಳಹಳ್ಳಿಯ 2ನೇ ವಾರ್ಡ್​ನ ಸಾಮಾನ್ಯ ಕ್ಷೇತ್ರದಿಂದ ಕಣಕ್ಕಿಳಿದಿದ್ದಾರೆ.
• ಬಳ್ಳಾರಿ ಜಿಲ್ಲೆ ಹೂವಿನಹಡಗಲಿ ತಾಲೂಕಿನ ನಾಗತಿಬಸಾಪುರ ಗ್ರಾಪಂ ವ್ಯಾಪ್ತಿಯ ಮಿರಾಕೊರನಹಳ್ಳಿಯ ರೈತ ಹನುಮಂತಪ್ಪ 3 ಕಿ.ಮೀ.ದೂರದಿಂದ ಪಾದಯಾತ್ರೆ ಮೂಲಕ ಬಂದು ನಾಮಪತ್ರ ಸಲ್ಲಿಸಿದ್ದಾರೆ. ಕಳೆದ ಬಾರಿ ಚುನಾವಣೆಯಲ್ಲಿ 14 ಮತಗಳಿಂದ ಸೋತಿದ್ದ ಹನುಮಂತಪ್ಪ, ಮತ್ತೆ ಸ್ಪರ್ಧಿಸಿ ಚುನಾಯಿತನಾಗುವ ತನಕ ಪಾದರಕ್ಷೆ ಹಾಕುವುದಿಲ್ಲ ಎಂದು ಶಪಥ ಮಾಡಿದ್ದರು.
• ಹುಬ್ಬಳ್ಳಿ ತಾಲೂಕಿನ ನೂಲ್ವಿ ಗ್ರಾಪಂ ಸಹಾಯಕ ಚುನಾವಣಾಧಿಕಾರಿ ಆರ್.ಎಚ್. ರಾಠೋಡ ಮಂಗಳವಾರ ಕರ್ತವ್ಯದಲ್ಲಿ ನಿರತರಾಗಿದ್ದಾಗಲೇ ಕುಸಿದು ಬಿದ್ದು ನಿಧನ ಹೊಂದಿದ್ದಾರೆ.
• ಕೊಡಗು ಜಿಲ್ಲೆ ಹೆಬ್ಬಾಲೆ ಗ್ರಾಪಂನ ಪರಿಶಿಷ್ಟ ಪಂಗಡ (ಮಹಿಳೆ)ಗೆ ಮೀಸಲಾದ ಹುಲುಸೆ ಕ್ಷೇತ್ರದಲ್ಲಿ್ಲ ಇಂಜಿನಿಯರಿಂಗ್ ಪದವೀಧರೆ ಎಚ್.ವಿ. ಯಶಸ್ವಿನಿ ಕಣದಲ್ಲಿದ್ದಾರೆ. ಊರಿನವರ ಒತ್ತಡಕ್ಕೆ ಮಣಿದು ಸ್ಪರ್ಧಿಸಿರುವುದು ವಿಶೇಷ.