ಚಕುಂದ ದೇವತೆಗಳ ಸೈನ್ಯದ ನೇತೃತ್ವ ವಹಿಸಿಕೊಂಡು ಪರಾಕ್ರಮದಿಂದ ಯುದ್ಧ ಮಾಡಿ ದೈತ್ಯರನ್ನೆಲ್ಲ ಸೆದೆಬಡಿದ. ಇಂದ್ರ ಸಂತೋಷದಿಂದ ಕೃತಜ್ಞತೆ ಸೂಚಿಸುತ್ತ ಅವನಿಗೆ ‘ಏನು ವರ ಬೇಕು ಕೇಳು?’ ಎಂದ. ಮುಚಕುಂದ ವಿನಮ್ರತೆಯಿಂದ, ‘ಸಹಾಯ ಬೇಡಿ ಬಂದವರಿಗೆ ಅಭಯ ನೀಡುವ ನನ್ನ ಕ್ಷತ್ರಿಯ ಧರ್ಮ ಪಾಲಿಸಿದ್ದೇನೆ. ನನಗೆ ಏನೂ ಬೇಡ’ ಎಂದು ತನ್ನ ರಾಜ್ಯಕ್ಕೆ ಹೊರಡಲು ತಯಾರಾದ. ಆಗ ಇಂದ್ರ, ‘ಈಗ ಅಲ್ಲಿಗೆ ಹೋದರೆ ನಿನ್ನವರು ಯಾರೂ ಇರುವುದಿಲ್ಲ’ ಎಂದ. ಚಕಿತನಾದ ಮುಚಕುಂದ, ‘ಯಾಕೆ ನನ್ನ ರಾಜ್ಯಕ್ಕೆ ಅಂಥ ಸಂಕಟ ಏನು ಬಂದಿದೆ?’ ಎಂದು ಕೇಳಿದಾಗ, ‘ಏನೂ ಆಗಿಲ್ಲ. ನಮ್ಮ ದೇವಲೋಕದ ಕಾಲಗಣನೆಗೂ ಭೂಲೋಕದ ಕಾಲಗಣನೆಗೂ ವ್ಯತ್ಯಾಸ ಇರುವುದರಿಂದ ಇಲ್ಲಿಯ ಸ್ವಲ್ಪ ಅವಧಿಗೆ ಅಲ್ಲಿ ಎಷ್ಟೋ ವರ್ಷಗಳು ಗತಿಸಿ ಹೋಗಿರುತ್ತವೆ. ಈಗ ಅಲ್ಲಿ ನಿನ್ನ ಗುರುತು ಹಿಡಿಯುವವರು ಯಾರೂ ಇರುವುದಿಲ್ಲ’ ಎಂದ ಇಂದ್ರ. ‘ಹಾಗಾದರೆ ದೇವೇಂದ್ರನೇ ಮೋಕ್ಷದ ವರ ಕೊಟ್ಟು ಬಿಡು’ ಎಂದ. ಅದಕ್ಕೆ ಇಂದ್ರ, ‘ಅದನ್ನು ದಯಪಾಲಿಸುವ ಶಕ್ತಿ ಪರಮಾತ್ಮನಿಗೊಬ್ಬನೇ ಇರುವುದು. ಬೇರೆ ಏನಾದರೂ ಕೇಳು’ ಎಂದ. ‘ನಾನೀಗ ತುಂಬ ದಣಿದಿದ್ದೇನೆ. ಮಲಗಿ ವಿಶ್ರಾಂತಿ ಪಡೆಯಬೇಕಾಗಿದೆ’. ಇಂದ್ರನು ಭೂಲೋಕದಲ್ಲಿ ಸುರಕ್ಷಿತವಾದ ಗುಹೆಯಲ್ಲಿ ಅವನಿಗೆ ವ್ಯವಸ್ಥೆ ಮಾಡಿಸಿ, ‘ಯಾರಾದರೂ ನಿನ್ನ ನಿದ್ರಾಭಂಗ ಮಾಡಿದರೆ ನಿನ್ನ ದೃಷ್ಟಿಗೆ ಬಿದ್ದ ತಕ್ಷಣ ಅವರು ಸುಟ್ಟು ಬೂದಿಯಾಗುತ್ತಾರೆ’ ಎಂಬ ವರವನ್ನೂ ಕೊಟ್ಟ. ಯುಗಗಳೇ ಕಳೆದವು.
