ಇಂಥ ಇಕ್ಕಟ್ಟು-ಬಿಕ್ಕಟ್ಟಿನ ಸಂದರ್ಭದಲ್ಲಿ ಇದು ಕೆಲಮಟ್ಟಿಗೆ ಪ್ರಯೋಜನಕಾರಿಯಾಗಬಲ್ಲದು. ಏಕೆಂದರೆ ಈಗ ಜನರಿಗೆ ತುರ್ತಾಗಿ ದೈನಂದಿನ ಜೀವನ ನಡೆಸಲು ಅಗತ್ಯವಾದ ಕೆಲಸ ಬೇಕಾಗಿದೆ. ನರೇಗಾ ಯೋಜನೆಯು ಹಿಂದೆ ಯುಪಿಎ ಸರ್ಕಾರದ ಅವಧಿಯಲ್ಲಿ, ಮನಮೋಹನ್ ಸಿಂಗ್ ಪ್ರಧಾನಿಯಾಗಿದ್ದಾಗ 2005ರಲ್ಲಿ ಬಂದ ಯೋಜನೆ. ಗ್ರಾಮೀಣ ಪ್ರದೇಶಗಳಲ್ಲಿ, ಈ ಯೋಜನೆಯಲ್ಲಿ ನೋಂದಣಿಯಾದವರಿಗೆ ವರ್ಷಕ್ಕೆ ಕನಿಷ್ಠ 100 ದಿನಗಳ ಕೆಲಸದ ಖಾತರಿ ಕೊಡುವುದು ಈ ಯೋಜನೆಯ ಒಟ್ಟಾರೆ ಸಾರಾಂಶವಾಗಿದ್ದು, ದಿನಕ್ಕೆ ಕನಿಷ್ಠ 202 ರೂ. ದಿನಗೂಲಿ ನೀಡಲಾಗುತ್ತದೆ. ಈ ಮೊತ್ತ ರಾಜ್ಯ ರಾಜ್ಯಗಳಲ್ಲಿ ವ್ಯತ್ಯಾಸವಾಗುವುದೂ ಇದೆ. ರಸ್ತೆ, ಕೆರೆ, ಕಾಲುವೆ ಇತ್ಯಾದಿ ಸ್ಥಳೀಯ ಅಗತ್ಯದ ಕಾಮಗಾರಿಗಳನ್ನು ಈ ಮೂಲಕ ಮಾಡಿಸಲಾಗುತ್ತದೆ. ಈ ಯೋಜನೆಯಿಂದ ಗ್ರಾಮೀಣ ಪ್ರದೇಶದ ಕೋಟ್ಯಂತರ ಜನರಿಗೆ ಅನುಕೂಲವಾಗಿದೆ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ ಈ ಯೋಜನೆಯಲ್ಲಿ ಅವ್ಯವಹಾರ ನಡೆಯುವ ಬಗ್ಗೆ ಮತ್ತು ಯೋಜನೆ ದುರುಪಯೋಗದ ಬಗ್ಗೆಯೂ ದೂರುಗಳಿವೆ.
