ಭಾರತದಲ್ಲಿ ಪ್ರತಿನಿತ್ಯ 100 ಕೋಟಿ ಮೌಲ್ಯದ ಹೆರಾಯಿನ್ ಡ್ರಗ್ಸ್ ಮಾರಾಟ ಆಗುತ್ತಿದ್ದರೆ, ಪೊಲೀಸರ ಅಂದಾಜಿನ ಪ್ರಕಾರ ಕರ್ನಾಟಕದಲ್ಲೇ ಮಾದಕವಸ್ತುಗಳ ವಾರ್ಷಿಕ -ಠಿ; 450 ರಿಂದ -ಠಿ; 500 ಕೋಟಿ ವಹಿವಾಟು ನಡೆಯುತ್ತದೆ. ಈ ಅಂಕಿಸಂಖ್ಯೆಗಳೇ ಪರಿಸ್ಥಿತಿಯ ಗಂಭೀರತೆಗೆ ಸಾಕ್ಷಿ. ಇಂಥ ವ್ಯಸನಕ್ಕೆ ಒಳಗಾದವರ ಪೈಕಿ ಗಂಭೀರ ಆರೋಗ್ಯ ಸಮಸ್ಯೆಗಳನ್ನು ಎದುರಿಸುತ್ತಿರುವವರ ಸಂಖ್ಯೆಯೂ ಹೆಚ್ಚಾಗಿದೆ. ಯುವಸಮುದಾಯವನ್ನು ಹಾಳುಗೆಡವುವ, ಸಾಮಾಜಿಕ ಸ್ವಾಸ್ಥ್ಯವನ್ನು ಕೆಡಿಸುವ ಮಾದಕವಸ್ತುಗಳ ಕರಾಳಜಾಲವನ್ನು ಹತ್ತಿಕ್ಕಲು ಕಠಿಣ ಕಾನೂನು ಇಲ್ಲದಿರುವುದು ವಿಪರ್ಯಾಸ. ಕಳ್ಳಸಾಗಾಣಿಕೆಯ ಪರಿಯಂತೂ ಆಘಾತಕಾರಿ. ವಿದೇಶಗಳಿಂದ ಯಾವುದೇ ಅಡ್ಡಿ-ಆತಂಕಗಳಿಲ್ಲದೆ ಮಾದಕವಸ್ತುಗಳು ಸಂಬಂಧಿತರ ಕೈಗಳಿಗೆ ಸೇರುವುದಾದರೂ ಹೇಗೆ ಎಂಬುದು ಯಕ್ಷಪ್ರಶ್ನೆ. ಸಾಮಾನ್ಯವಾಗಿ ವಿಮಾನ ನಿಲ್ದಾಣದಲ್ಲಿ ಎಲ್ಲ ಪ್ರಯಾಣಿಕರು ಬಿಗಿಯಾದ ತಪಾಸಣೆಗೆ ಒಳಪಡುತ್ತಾರೆ. ನಿಯಮಗಳಿಗೆ ವಿರುದ್ಧವಾದ ವಸ್ತುಗಳನ್ನು ಇರಿಸಿಕೊಂಡರೆ, ವಿಚಾರಣೆಯೂ ನಡೆಯುತ್ತದೆ. ಆದರೆ, ಹಲವು ದೇಶಗಳಿಂದ ವಿಮಾನಗಳ ಮೂಲಕವೇ ಮಾದಕವಸ್ತುಗಳು ಕರ್ನಾಟಕಕ್ಕೆ, ದೇಶದ ಬೇರೆ, ಬೇರೆ ಭಾಗಗಳಿಗೆ ತಲುಪುತ್ತಿದ್ದು, ಯಾರೆಲ್ಲ ಇದರಲ್ಲಿ ಶಾಮೀಲಾಗಿದ್ದಾರೆ ಎಂಬುದನ್ನು ತನಿಖೆ ಮೂಲಕ ಪತ್ತೆ ಹಚ್ಚಬೇಕಿದೆ. ಕರ್ನಾಟಕದಲ್ಲಿ ಡ್ರಗ್ಸ್ ಜಾಲ ನಿಯಂತ್ರಣ ಉದ್ದೇಶದಿಂದ 2019ರಲ್ಲೇ ಡಿಜಿಪಿ ಕಟ್ಟುನಿಟ್ಟಿನ ಆದೇಶ ಹೊರಡಿಸಿದ್ದರೂ, ಅದು ಪರಿಣಾಮಕಾರಿಯಾಗಿ ಜಾರಿಯಾಗಿಲ್ಲ. ಇನ್ನಾದರೂ, ಸರ್ಕಾರ, ಪೊಲೀಸ್ ಇಲಾಖೆ, ನಾಗರಿಕ ಸಮುದಾಯ ಒಟ್ಟಾಗಿ ಈ ಅಪಾಯಕಾರಿ ಪಿಡುಗಿನ ವಿರುದ್ಧ ಹೋರಾಡಿ, ಸಮಾಜದ ಸ್ವಾಸ್ಥ್ಯವನ್ನು ಕಾಪಾಡಬೇಕಿದೆ.
