ಇತ್ತೀಚೆಗೆ ಪೂರ್ವ ಲಡಾಖ್ ಪ್ರದೇಶದ ಗಲ್ವಾನ್ ಕಣಿವೆಯಲ್ಲಿ ಗಡಿತಂಟೆ ತೆಗೆದಿದ್ದ ಚೀನಾ, ವಾಸ್ತವ ನಿಯಂತ್ರಣ ರೇಖೆಯಲ್ಲಿ ಉದ್ವಿಗ್ನ ಸ್ಥಿತಿ ಸೃಷ್ಟಿಸಿತ್ತು. ಅದರ ಆಕ್ರಮಣಕಾರಿ ಬುದ್ಧಿಯ ಪರಿಚಯ ಇರುವ ಭಾರತ ಈ ಬಾರಿ ತಕ್ಕ ಪ್ರತ್ಯುತ್ತರ ನೀಡಿತಲ್ಲದೆ, ಸೇನೆ ವಾಪಸ್ ಪಡೆಯಲು ಪಟ್ಟು ಹಿಡಿಯಿತು. ರಾಜತಾಂತ್ರಿಕ ಮಾರ್ಗಗಳನ್ನೂ ಸಮರ್ಥವಾಗಿ ಬಳಸಿತು. ಅಂತಿಮವಾಗಿ ಮಣಿದ ಚೀನಾ ತನ್ನ ಸೇನೆಯನ್ನು ವಿವಾದಿತ ಪ್ರದೇಶದಿಂದ ಹಿಂದಕ್ಕೆ ಕರೆಯಿಸಿಕೊಂಡಿತು. ಅಲ್ಲದೆ, ವಾಸ್ತವ ನಿಯಂತ್ರಣ ರೇಖೆಯಲ್ಲಿ ಸೇನೆ ನಿಯೋಜಿಸುವ ಆದೇಶವನ್ನು ಅಧ್ಯಕ್ಷ ಷಿ ಜಿನ್ಪಿಂಗ್ ಅವರೇ ನೀಡಿದ್ದರು ಎಂಬ ಸಂಗತಿ ಬಳಿಕ ಬಹಿರಂಗಗೊಂಡಿತಲ್ಲದೆ, ಆ ರಾಷ್ಟ್ರದ ನಾಯಕರ ಅಪಾಯಕಾರಿ ಮಾನಸಿಕತೆಯನ್ನು ಬಯಲಿಗೆಳೆಯಿತು. ಈ ಬೆಳವಣಿಗೆಗಳನ್ನೆಲ್ಲ ಸೂಕ್ಷ್ಮವಾಗಿ ಗಮನಿಸುತ್ತಲೇ ಬಂದಿರುವ ಅಮೆರಿಕ ಈಗ ಬಹಿರಂಗವಾಗಿ ಭಾರತದ ಪರವಾಗಿ ನಿಲ್ಲುವ ಮೂಲಕ, ಚೀನಾಗೆ ಬಿಸಿ ಮುಟ್ಟಿಸಿದೆ.
