ಟ್ರಂಪ್ ಭೇಟಿಯಿಂದ ಏನೆಲ್ಲ ಆಗಬಹುದು, ಅಂತಾರಾಷ್ಟ್ರೀಯ ವಲಯದ ಮೇಲೆ ಯಾವ ರೀತಿ ಪರಿಣಾಮ ಬೀರಬಹುದು ಎಂಬ ಬಗ್ಗೆ ಈಗಾಗಲೇ ಹಲವು ಆಯಾಮಗಳಲ್ಲಿ ಚರ್ಚೆ ನಡೆದಿದೆ. ಮುಖ್ಯವಾಗಿ, ಭಯೋತ್ಪಾದನೆ ವಿರುದ್ಧ ಹೋರಾಟ ತೀವ್ರಗೊಳಿಸುವಿಕೆ, ಈ ಸಂಬಂಧ ಪಾಕಿಸ್ತಾನದ ಮೇಲೆ ಒತ್ತಡ, ಭಾರತದಲ್ಲಿ ಅಮೆರಿಕದಿಂದ ಹೂಡಿಕೆ ಹೆಚ್ಚಳ, ವ್ಯಾಪಾರನೀತಿ ಸರಳ, ದ್ವಿಪಕ್ಷೀಯ ಒಪ್ಪಂದಗಳಿಗೆ ಒತ್ತು ಸೇರಿ ಹಲವು ವಿಷಯಗಳು ಮುನ್ನೆಲೆಗೆ ಬಂದು ಮಹತ್ವದ ತೀರ್ಮಾನ ಆಗುವ ನಿರೀಕ್ಷೆ ಇದೆ. ವಾಣಿಜ್ಯ ರಂಗಕ್ಕೆ ಸಂಬಂಧಿಸಿ ದೊಡ್ಡ ಒಡಂಬಡಿಕೆ ಏರ್ಪಡುವ ಸಾಧ್ಯತೆ ಸದ್ಯಕ್ಕಿಲ್ಲವಾದರೂ, ಆ ನಿಟ್ಟಿನಲ್ಲಿ ಭೂಮಿಕೆ ಸಿದ್ಧವಾಗಲಿದೆ ಎಂಬುದು ತಜ್ಞರ ಅಭಿಪ್ರಾಯ. ಟ್ರಂಪ್ ಈ ಬಾರಿಯ ಚುನಾವಣೆಯಲ್ಲಿ ಮತ್ತೊಮ್ಮೆ ಅಧಿಕಾರಕ್ಕೆ ಏರಿದರೆ, ಆ ಅವಧಿಯಲ್ಲಿ ಉಭಯ ರಾಷ್ಟ್ರಗಳ ಸಂಬಂಧ ಹೇಗಿರಲಿದೆ ಎಂಬುದಕ್ಕೆ ಈ ಭೇಟಿ ದಿಕ್ಸೂಚಿಯಾಗಲಿದೆ.
