ಸಂಪಾದಕೀಯ: ಹೊಸ ಬದುಕು ಸಿಗಲಿ

90ರ ದಶಕದಲ್ಲಿ ನಡೆದ ದೌರ್ಜನ್ಯ, ಅತ್ಯಾಚಾರದ ಪರಿಣಾಮ ಲಕ್ಷಾಂತರ ಕಾಶ್ಮೀರಿ ಪಂಡಿತರ ಬದುಕೇ ಶೋಚನೀಯವಾಯಿತು. ಸಿರಿವಂತ, ಮರ್ಯಾದಸ್ತ ಕುಟುಂಬಗಳಿಗೆ ಸೇರಿದ್ದ ಈ ಪಂಡಿತರು ತಮ್ಮದೆಲ್ಲವನ್ನೂ ಕಳೆದುಕೊಂಡು ನಿರ್ಗತಿಕರಾದರು. ಜೀವ ಉಳಿದರೆ ಸಾಕು ಎಂಬ ಧಾವಂತದಿಂದ ದೇಶದ ಬೇರೆ ಬೇರೆ ಭಾಗಗಳಿಗೆ ಹೋಗಿ ನೆಲೆಸಿದರು. ಆಸ್ತಿಪಾಸ್ತಿ ಸೇರಿ ತಾಯ್ನಾಡಿನ ನಂಟನ್ನು ಕಳೆದುಕೊಂಡು ಗುಳೆ ಹೋದ ಈ ಜನರ ಬದುಕು ಹಲವು ಸಂಕಷ್ಟಗಳನ್ನು ಕಂಡಿತು. ಕೆಲವರು ಜಮ್ಮು-ಕಾಶ್ಮೀರದಲ್ಲೇ ಟೆಂಟ್ ನಿರ್ವಿುಸಿಕೊಂಡು ವಾಸಿಸಿದರು. ಪುನರ್ ವಸತಿಗಾಗಿ ಆಗ್ರಹಿಸಿ ಹಲವು ಬಗೆಯ ಹೋರಾಟ ಮಾಡಿದರು. ಸರ್ಕಾರಗಳ ಗಮನ ಸೆಳೆದರು. ಆದರೆ, ಪ್ರಯೋಜನ ಮಾತ್ರ ಶೂನ್ಯ. ಇವರ ಯಾವುದೇ ಬೇಡಿಕೆ, ಮನವಿಗೂ ಸರ್ಕಾರಗಳು ಸ್ಪಂದಿಸಲಿಲ್ಲ.

ಜಮ್ಮು- ಕಾಶ್ಮೀರದಿಂದ ಸಂವಿಧಾನದ 370ನೇ ವಿಧಿಯನ್ನು ಹಿಂಪಡೆದ ಈಗಿನ ಕೇಂದ್ರ ಸರ್ಕಾರದ ನಿರ್ಣಯ ಸಂಚಲನವನ್ನೇ ಸೃಷ್ಟಿಸಿತು. ಹಲವು ರಾಜಕೀಯ ಪಕ್ಷಗಳು ಈ ನಿರ್ಧಾರಕ್ಕೆ ಭಾರಿ ವಿರೋಧ ತೋರಿದವಾದರೂ, ಕೇಂದ್ರ ತನ್ನ ನಿರ್ಧಾರದಿಂದ ಹಿಂದೆ ಸರಿಯಲಿಲ್ಲ. ಈ ಬದಲಾವಣೆ ಕಾಶ್ಮೀರಿ ಪಂಡಿತರಲ್ಲೂ ಹೊಸ ನಿರೀಕ್ಷೆ ಮೂಡಿಸಿತು. ಅಲ್ಲದೆ, ಜಮ್ಮು-ಕಾಶ್ಮೀರ ಮತ್ತು ಲಡಾಖ್ ಅನ್ನು ಕೇಂದ್ರಾಡಳಿತ ಪ್ರದೇಶವಾಗಿ ಘೋಷಿಸಿ, ಆ ನಿರ್ಣಯ ಕಳೆದ ಅಕ್ಟೋಬರ್ 31ರಿಂದ ಜಾರಿಗೆ ಬಂದದ್ದು ಆಶಾದಾಯಕ ಬೆಳವಣಿಗೆಯಾಗಿ ಪರಿಣಮಿಸಿತು. ಇದೆಲ್ಲದರ ಬೆನ್ನಲ್ಲೇ, ಕಾಶ್ಮೀರಿ ಪಂಡಿತರ ಪುನರ್ ವಸತಿಗಾಗಿ ವಿಶೇಷ ಟೌನ್​ಶಿಪ್​ಗಳನ್ನು ನಿರ್ವಿುಸುವ ಆಶ್ವಾಸನೆಯನ್ನು ಕೇಂದ್ರ ಸರ್ಕಾರ ನೀಡಿದೆ.

ಕಾಶ್ಮೀರಿ ಪಂಡಿತರ ನಿಯೋಗ ಗೃಹ ಸಚಿವ ಅಮಿತ್ ಷಾರನ್ನು ದೆಹಲಿಯಲ್ಲಿ ಭೇಟಿ ಮಾಡಿ, ಹಲವು ಮನವಿಗಳನ್ನು ಸಲ್ಲಿಸಿದಾಗ ಷಾ ಈ ಭರವಸೆ ನೀಡಿದ್ದಾರೆ. ‘ಕಾಶ್ಮೀರದ ಹತ್ತು ಜಿಲ್ಲೆಗಳಲ್ಲಿ ಟೌನ್​ಶಿಪ್ ನಿರ್ವಿುಸಲಾಗುವುದು ಮತ್ತು ಭಯೋತ್ಪಾದಕರಿಂದ ಹಾಳಾದ, ಅಪವಿತ್ರಗೊಂಡ ದೇವಸ್ಥಾನಗಳ ಮರುನಿರ್ವಣ ಮಾಡಲಾಗುವುದು. ಹೊಸದಾಗಿ ಬದುಕು ಕಟ್ಟಿಕೊಳ್ಳಲು ಪೂರಕ ಸೌಲಭ್ಯಗಳನ್ನು ಕಲ್ಪಿಸಲಾಗುವುದು’ ಎಂದು ಷಾ ಹೇಳಿದ್ದಾರೆ. ಅಲ್ಲದೆ, ಕಾಶ್ಮೀರಿ ಪಂಡಿತ ಸಮುದಾಯದ ಅಭ್ಯರ್ಥಿಗಳಿಗೆ ಸರ್ಕಾರಿ ಉದ್ಯೋಗಕ್ಕೆ ಅರ್ಹತೆಯ ವಯಸ್ಸನ್ನು ಏರಿಸಲು ಪೂರಕವಾಗಿ ಸ್ಪಂದಿಸಿದ್ದಾರೆ. ಈ ಮೂಲಕ ಕಾಶ್ಮೀರಿ ಪಂಡಿತರ ಹಲವು ದಶಕಗಳ ಬೇಡಿಕೆ ಈಡೇರುವ ಕಾಲ ಸಮೀಪಿಸಿದೆ. ತಮ್ಮದೇ ನೆಲದಲ್ಲಿ ಅವರು ಮತ್ತೆ ಬದುಕು ರೂಪಿಸಿಕೊಳ್ಳುವ ಆಶಾವಾದ ಚಿಗುರಿದೆ. ಅಲ್ಲಿನ ವಿಧಾನಸಭಾ ಕ್ಷೇತ್ರಗಳ ಪುನರ್ ವಿಂಗಡಣೆಯೂ ನಡೆಯಲಿದ್ದು, ಈ ಬದಲಾವಣೆ ಅಲ್ಲಿ ರಾಜಕೀಯವಾಗಿಯೂ ದೊಡ್ಡ ಪರಿವರ್ತನೆ ತರಲಿದೆ ಎಂಬ ನಿರೀಕ್ಷೆ ಇದೆ. ಶಾಂತಿ, ಸೌಹಾರ್ದದಿಂದ ಬದುಕುವ ಕಾಶ್ಮೀರಿ ಪಂಡಿತರು ಕಳೆದ ಏಳು ದಶಕಗಳಲ್ಲಿ ಪಟ್ಟಿರುವ ಬವಣೆ ಅಷ್ಟಿಷ್ಟಲ್ಲ. ಸುಮಾರು ಎರಡು-ಮೂರು ಪೀಳಿಗೆಗಳೇ ಅನಾಥಸ್ಥಿತಿಯಲ್ಲಿ ಮರುಗಿವೆ. ಅದೆಲ್ಲವೂ ದೂರವಾಗುವ, ಪಂಡಿತರಿಗೆ ನ್ಯಾಯ ಒದಗುವ ದಿನಗಳು ಹತ್ತಿರದಲ್ಲಿವೆ ಎಂದು ಆ ಸಮುದಾಯದವರು ಸಂತಸಪಟ್ಟಿದ್ದಾರೆ. ಟೌನಶಿಪ್ ನಿರ್ಮಾಣ ಸೇರಿ ಅವರಿಗೆ ಮೂಲಸೌಕರ್ಯ ಕಲ್ಪಿಸುವ, ಮತ್ತೆ ಮುಖ್ಯವಾಹಿನಿಯಲ್ಲಿ ತಲೆ ಎತ್ತಿ ಬದುಕುವಂಥ ಸ್ಥಿತಿ ನಿರ್ವಣವಾಗಬೇಕಿದ್ದು, ಆ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ತನ್ನ ಇಚ್ಛಾಶಕ್ತಿ ಪ್ರದರ್ಶಿಸಬೇಕಿದೆ.