ಬೆಂಗಳೂರಿನ ಕೆಜಿ ಹಳ್ಳಿ ಮತ್ತು ಡಿ.ಜೆ ಹಳ್ಳಿ ಗಲಭೆ ಪ್ರಕರಣದ ತನಿಖೆ ಮುಂದುವರಿದಂತೆ ದಿನಕ್ಕೊಂದು ತಿರುವು ಪಡೆಯುತ್ತಿದ್ದು, ಮುಂದೇನು ಎಂಬ ಪ್ರಶ್ನೆ ಹುಟ್ಟು ಹಾಕಿದೆ. ಗಲಭೆಗೆ ಸ್ಥಳೀಯ ರಾಜಕೀಯ ವೈಷಮ್ಯ ಕಾರಣವೆಂಬ ಅನುಮಾನದ ಬೆನ್ನಲ್ಲೇ ಇಸ್ಲಾಮಿಕ್ ಸ್ಟೇಟ್ ಆಫ್ ಇರಾಕ್ ಆಂಡ್ ಸಿರಿಯಾ (ಐಸಿಸ್) ಉಗ್ರ ಸಂಘಟನೆಯ ಕೈವಾಡವಿರುವ ಬಗ್ಗೆ ಪ್ರಾಥಮಿಕ ಸಾಕ್ಷ್ಯಗಳು ಲಭಿಸಿರುವುದು ಆತಂಕ ಮೂಡಿಸಿದೆ. ಗಲಭೆ ಸಂಬಂಧ ನ್ಯಾಯಾಂಗ ತನಿಖೆಗೆ ಆದೇಶಿಸಲಾಗಿದೆ. ಪ್ರಮುಖ ಆರೋಪಿಗಳ ಬಂಧನವೂ ಆಗಿದೆ. ಆದರೆ, ಘಟನೆಯ ಆಳ ಹೊಕ್ಕಿದಂತೆ ಗಲಭೆಗೆ ಹಲವು ಬಗೆಯ ನಂಟುಗಳು ಇರುವುದು ಸ್ಪಷ್ಟವಾಗುತ್ತಿದ್ದು, ಒಟ್ಟಾರೆ ಪ್ರಕರಣ ಮತ್ತಷ್ಟು ಕಗ್ಗಂಟಾಗುತ್ತಿದೆ. ಎಲ್ಲ ಆಯಾಮಗಳಲ್ಲಿ ತನಿಖೆ ನಡೆಯಬೇಕು, ಗಲಭೆ ಸೃಷ್ಟಿಸಿದವರ ಹಿಂದೆ ಯಾರಿದ್ದಾರೆ? ಅವರ ನೆರವಿಗೆ ನಿಂತ ಶಕ್ತಿಗಳು ಯಾವವು? ಪೂರ್ವತಯಾರಿ, ಯೋಜನೆ ಇಲ್ಲದೆ ರಾತ್ರೋರಾತ್ರಿ ಮೂರು-ನಾಲ್ಕು ಸಾವಿರ ಜನ ಒಟ್ಟಾಗಲು ಹೇಗೆ ಸಾಧ್ಯ? ಈ ಎಲ್ಲ ಅಂಶಗಳು ತನಿಖೆಗೆ ಒಳಪಡಬೇಕು ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ, ಉಗ್ರ ನಂಟಿನ ಸಾಕ್ಷ್ಯಗಳು ಲಭ್ಯ ಆಗಿರುವ ಪ್ರಯುಕ್ತ ಇಡೀ ಪ್ರಕರಣವನ್ನು ಇನ್ನಷ್ಟು ಎಚ್ಚರಿಕೆಯಿಂದ ನಿಭಾಯಿಸಬೇಕಿದೆ ಎಂಬುದು ವಾಸ್ತವ.
