ರೈತರು ಮುಂಗಾರು ಆಗಮನಕ್ಕೆ ಕೆಲ ತಿಂಗಳ ಮುನ್ನವೇ ಸಿದ್ಧತೆ ಆರಂಭಿಸುತ್ತಾರೆ. ಕೃಷಿ ಚಟುವಟಿಕೆಗಳನ್ನು ಕೈಗೊಳ್ಳಲು ಅಗತ್ಯವಾದ ತಯಾರಿ ಮಾಡಿಕೊಂಡು, ಸಕಾಲದಲ್ಲಿ ಮಳೆ ಸುರಿದರೆ ಅವರ ಶ್ರಮ ಸಾರ್ಥಕ. ಈ ಬಾರಿ ಸಾಮಾನ್ಯ ಮುಂಗಾರು ಇರುವುದಾಗಿ ಹವಾಮಾನ ಇಲಾಖೆ ಹೇಳಿರುವುದರಿಂದ ರೈತರಲ್ಲಿ ನಿರೀೆಗಳು ಗರಿಗೆದರಿವೆ. ಉತ್ತಮ ಸಲು, ಅದಕ್ಕೆ ಸೂಕ್ತ ಬೆಲೆ ದೊರೆಯಲಿ ಎಂಬ ಆಶಾಭಾವದಿಂದ ಮುಂಗಾರನ್ನು ಹರ್ಷದಿಂದ ಬರಮಾಡಿಕೊಳ್ಳಲು ಸಜ್ಜಾಗಿದ್ದಾರೆ. ಕೃಷಿ ಚಟುವಟಿಕೆಗಳು ನಿರಾಂತಕವಾಗಿ ಸಾಗುವಂತೆ ಮಾಡಲು ಸರ್ಕಾರ ಅಗತ್ಯ ಸಿದ್ಧತೆಗಳನ್ನು ಮಾಡಿಕೊಳ್ಳಬೇಕಿದೆ ಮತ್ತು ಸೌಲಭ್ಯಗಳು ರೈತರವರೆಗೆ ಪರಿಣಾಮಕಾರಿಯಾಗಿ ತಲುಪಿಸಬೇಕಿದೆ. ಬಿತ್ತನೆಬೀಜಗಳ ಕೊರತೆಯಾಗದಂತೆ, ಕಾಳಸಂತೆ ಪ್ರವೇಶಿಸದಂತೆ, ರಸಗೊಬ್ಬರ ಸಕಾಲಕ್ಕೆ ಸಿಗುವಂತೆ ಮಾಡಬೇಕಿದೆ. ಜತೆಗೆ, ಸಹಾಯಧನ, ಬೆಳೆಸಾಲದ ಸೌಲಭ್ಯಗಳು ಮಧ್ಯವರ್ತಿಗಳ ಕಿರಿಕಿರಿ ಇಲ್ಲದಂತೆ ರೈತರಿಗೆ ತಲುಪಬೇಕು. ಕೃಷಿ ಕ್ಷೇತ್ರದಲ್ಲಿ ಹಲವು ಸಮಸ್ಯೆಗಳಿವೆ ಎಂಬ ಕಳವಳದ ಮಧ್ಯೆಯೇ ಯುವಸಮುದಾಯ ಕೃಷಿಯತ್ತ ಒಲವು ತೋರುತ್ತಿದೆ. ಕಳೆದ ವರ್ಷದ ಲಾಕ್ಡೌನ್ ಹಲವು ಸ್ಥಿತ್ಯಂತರಗಳನ್ನು ಸೃಷ್ಟಿಸಿತು. ನಗರಪ್ರದೇಶಗಳಲ್ಲಿ ಅಭದ್ರತೆಯ ಭಾವದಲ್ಲಿ ಬದುಕು ಸಾಗಿಸುವುದಕ್ಕಿಂತ ಕೃಷಿಯನ್ನು ನಂಬಿ, ಊರುಗಳಲ್ಲಿ ನೆಮ್ಮದಿಯ ನಾಳೆಗಳನ್ನು ಕಂಡುಕೊಂಡರಾಯಿತು ಎಂದು ಸಾಕಷ್ಟು ಯುವಕರು ಗ್ರಾಮಗಳತ್ತ ಮರಳಿದ್ದಾರೆ. ಅಷ್ಟೇ ಅಲ್ಲ, ಕೃಷಿಯಲ್ಲಿ ಹೊಸ ಪ್ರಯೋಗಗಳ ಸಾಹಸಕ್ಕೂ ಮುಂದಾಗಿದ್ದಾರೆ. ಸಾಂಪ್ರದಾಯಿಕ ಪದ್ಧತಿಗಳನ್ನೇ ನೆಚ್ಚಿಕೊಳ್ಳುವುದಕ್ಕಿಂತ ಆದಾಯ ಹೆಚ್ಚಿಸುವ ಕ್ರಮಗಳತ್ತಲೂ ಗಮನ ಹರಿಸುತ್ತಿದ್ದಾರೆ.
