ಮುಖ್ಯವಾಗಿ, ಚಾಲಕರು, ರೈತರು, ಮಡಿವಾಳ ಮತ್ತು ಸವಿತಾ ಸಮಾಜ, ಕಟ್ಟಡ ಕಾರ್ವಿುಕ, ನೇಕಾರರಿಗೆ ಆಪತ್ಕಾಲದಲ್ಲಿ ನೆರವಾಗಲು ಮುಂದಾಗಿರುವ ಸರ್ಕಾರದ ಕ್ರಮವನ್ನು ಪ್ರತಿಪಕ್ಷಗಳೂ ಮುಕ್ತ ಮನಸ್ಸಿನಿಂದ ಸ್ವಾಗತಿಸಿವೆ. ಬೇಡಿಕೆ ಇಲ್ಲದೆ ಬೆಳೆಗಾರರು ತಾವು ಬೆಳೆದಿರುವ ಎಲ್ಲ ಹೂವುಗಳನ್ನು ಹೊಲದಲ್ಲೇ ನಾಶ ಮಾಡುವ ಪರಿಸ್ಥಿತಿ ಉದ್ಭವಿಸಿರುವುದರಿಂದ ಎಲ್ಲ ರೀತಿಯ ಹೂವುಗಳು ಬೆಳೆದಿರುವ ರೈತರಿಗೆ ನೆರವಾಗಲು ಹೆಕ್ಟೇರ್ಗೆ ಗರಿಷ್ಠ 25 ಸಾವಿರದಂತೆ ಪರಿಹಾರ ನೀಡಲು ನಿರ್ಧರಿಸಲಾಗಿದೆ. ತರಕಾರಿ ಹಾಗೂ ಹಣ್ಣು ಬೆಳೆಗಾರರಿಗೆ ಸೂಕ್ತ ಪರಿಹಾರ ನೀಡುವ ಬಗ್ಗೆ ಪ್ಯಾಕೇಜ್ ಘೊಷಣೆಯ ಭರವಸೆ ಸಿಕ್ಕಿದೆ. ಅಗಸರಿಗೆ ಹಾಗೂ ಕ್ಷೌರಿಕ ವೃತ್ತಿಯಲ್ಲಿ ತೊಡಗಿರುವವರಿಗೆ ಒಂದು ಬಾರಿಗೆ ತಲಾ ಐದು ಸಾವಿರ ರೂ., 7.75 ಲಕ್ಷ ಚಾಲಕರಿಗೆ ಒಂದು ಬಾರಿ ಪರಿಹಾರವಾಗಿ ಐದು ಸಾವಿರ ರೂ. ನೀಡಲು ನಿರ್ಧರಿಸಲಾಗಿದೆ. ನೇಕಾರರಿಗೂ ಹೊಸ ಯೋಜನೆ ಘೋಷಿಸಲಾಗಿದೆ. ಸಣ್ಣ, ಅತಿಸಣ್ಣ ಹಾಗೂ ದೊಡ್ಡ ಕೈಗಾರಿಕೆಗಳ ನೆರವಿಗೆ ಬಂದಿರುವುದರಿಂದ ಆರ್ಥಿಕ ಚಟುವಟಿಕೆಗಳಿಗೆ ಪುನಶ್ಚೇತನ ದೊರೆಯಲಿದೆ. ಆರ್ಥಿಕ ಪ್ಯಾಕೇಜ್ನಿಂದ ರೈತರಿಗೆ, ವಿವಿಧ ವ್ಯಾಪಾರಿವರ್ಗದವರಿಗೆ ಅನುಕೂಲವಾಗಲಿದೆ. ಸರ್ಕಾರದ ಈ ನೆರವು, ಪ್ರೋತ್ಸಾಹವನ್ನು ಸಮರ್ಪಕವಾಗಿ ಉಪಯೋಗಿಸಿಕೊಂಡು, ಸದ್ಯ ಬಂದೋದಗಿರುವ ಸಮಸ್ಯೆ ಯಿಂದ ಹೊರಬರಲು ಜನರು ಯತ್ನಿಸಬೇಕು. ನಿಜವಾದ ಫಲಾನುಭವಿಗಳಿಗೇ ನೆರವು ತಲುಪುವಂತೆ ನೋಡಿಕೊಳ್ಳುವುದು ಅಧಿಕಾರಿವರ್ಗದ ಜವಾಬ್ದಾರಿ. ಈ ಘೋಷಣೆಗಳು ಪರಿಣಾಮಕಾರಿಯಾಗಿ ಹಾಗೂ ಪ್ರಾಮಾಣಿಕ ನೆಲೆಗಟ್ಟಿನಲ್ಲಿ ಜಾರಿಯಾದಲ್ಲಿ ಸಂಕಷ್ಟದಲ್ಲಿರುವ ಜನಜೀವನಕ್ಕೆ ಕೊಂಚ ನೆಮ್ಮದಿ.
