ಕರೊನಾ ಮಹಾಮರಿ ತಂದೊಡ್ಡಿರುವ ಸಂಕಷ್ಟಗಳು ಒಂದೇರಡಲ್ಲ. ಲಾಕ್ಡೌನ್ ಅವಧಿ ಒಂದು ತಿಂಗಳು ಮೀರಿರುವುದರಿಂದ ಆರ್ಥಿಕ ಚಟುವಟಿಕೆಗಳು ಬಹುತೇಕ ಸ್ತಬ್ಧವಾಗಿವೆ. ಎಲ್ಲ ಬಗೆಯ ಕೈಗಾರಿಕೆಗಳು ಅದರಲ್ಲೂ, ಸಣ್ಣ ಕೈಗಾರಿಕೆಗಳು ಭಾರಿ ಹಾನಿ ಅನುಭವಿಸಿರುವುದರಿಂದ ಭವಿಷ್ಯದ ಬಗ್ಗೆ ಅನಿಶ್ಚಿತತೆ ಮನೆಮಾಡಿದೆ. ಅಷ್ಟಕ್ಕೂ, ಕರೊನಾ ಹಾವಳಿ ಆರಂಭವಾಗುವುದಕ್ಕೂ ಮುನ್ನವೇ ಜಾಗತಿಕ ಆರ್ಥಿಕ ಹಿಂಜರಿತ ಕಾಣಿಸಿಕೊಂಡಿತು. ಅದರ ಪರಿಣಾಮ ಭಾರತದ ಮೇಲೂ ಆಗಿ, ನಿರುದ್ಯೋಗ ಪ್ರಮಾಣ ಏರಿಕೆ ಆಯಿತು. ಆ ಸ್ಥಿತಿಯೊಂದಿಗೆ ಹೋರಾಡಬೇಕು, ಉದ್ಯೋಗಸೃಷ್ಟಿಗೆ ಒತ್ತು ನೀಡಬೇಕು ಎಂಬ ನಿಟ್ಟಿನಲ್ಲಿ ಸರ್ಕಾರ ಪ್ರಯತ್ನಗಳು ಆರಂಭಿಸುವಷ್ಟರಲ್ಲೇ ಕರೊನಾದ ಸಂಕಷ್ಟ ಎಲ್ಲ ಲೆಕ್ಕಾಚಾರಗಳನ್ನೂ ತಲೆಕೆಳಗೆ ಮಾಡಿತು. ಒಂದೆಡೆ, ಈಗಾಗಲೇ ಉದ್ಯೋಗದಲ್ಲಿ ಇರುವವರು ಕೆಲಸ ಕಳೆದುಕೊಳ್ಳುವ ಭೀತಿ ಎದುರಿಸುತ್ತಿದ್ದಾರೆ. ಮತ್ತೊಂದೆಡೆ, ಶೈಕ್ಷಣಿಕ ಪಯಣ ಪೂರ್ಣಗೊಳಿಸಿ ಉದ್ಯೋಗಕ್ಕೆ ಕಾಯುತ್ತಿದ್ದ ಯುವಸಮುದಾಯಕ್ಕೂ ನಿರಾಸೆಯಾಗಿದೆ. ಈ ವರ್ಷ ಲಕ್ಷಾಂತರ ಪದವೀಧರರ ವೃತ್ತಿಜೀವನ ಅರಳುವ ಮುನ್ನವೇ ಬಾಡುವ ಅಪಾಯಕ್ಕೆ ಸಿಲುಕಿಕೊಂಡಿದೆ ಎಂಬುದು ಕಟುಸತ್ಯ.
