ಮತ್ತೊಂದೆಡೆ, ಈ ಸಂಬಂಧ ರಾಜ್ಯ ಸರ್ಕಾರ ಹೊರಡಿಸಿದ್ದ ಸುಗ್ರೀವಾಜ್ಞೆಗೆ ರಾಜ್ಯಪಾಲರು ಅಂಕಿತ ಹಾಕಿದ್ದಾರೆ. ಈ ಕಾನೂನಿಗೆ, ‘ಕರ್ನಾಟಕ ರಾಜ್ಯದಲ್ಲಿ ಸಾಂಕ್ರಾಮಿಕ ರೋಗಗಳ ಅಧ್ಯಾದೇಶ, 2020’ ಎಂದು ಕರೆಯಲಾಗಿದೆ. ಸರ್ಕಾರದ ಕಾರ್ಯಾಚರಣೆಗಳಿಗೆ ಅಡ್ಡಿ, ಕರ್ತವ್ಯನಿರತ ಅಧಿಕಾರಿಗಳು ಮತ್ತು ಸಿಬ್ಬಂದಿ ಮೇಲೆ ದೌರ್ಜನ್ಯ, ಹಲ್ಲೆ ಎಸಗುವವರಿಗೆ ಮೂರು ವರ್ಷ ಜೈಲು ಶಿಕ್ಷೆ ಮತ್ತು 50 ಸಾವಿರ ದಂಡ ವಿಧಿಸುವ ಕಾನೂನು ಸುಗ್ರೀವಾಜ್ಞೆ ಮೂಲಕ ಜಾರಿಯಾಗಿದೆ. ಹಾಗಾಗಿ, ಇನ್ನಾದರೂ, ಪುಂಡಾಟಿಕೆಗೆ ತಡೆ ಬೀಳಬಹುದು, ಕರೊನಾ ವಿರುದ್ಧ ಸಮರಕ್ಕೆ ಅಸಹಕಾರ ತೋರುತ್ತಿರುವವರ ಮನಸ್ಥಿತಿ ಬದಲಾಗಬಹುದು ಎಂದು ಆಶಿಸಬಹುದು. ಇಂಥದ್ದೊಂದು ಪ್ರಬಲ ಕಾನೂನು ಇಲ್ಲದಿದ್ದಲ್ಲಿ ಹಲ್ಲೆಯಂಥ ಘಟನೆಗಳನ್ನು ನಿಯಂತ್ರಿಸುವುದು ತುಂಬ ಕಷ್ಟಸಾಧ್ಯವಾಗುತ್ತಿತ್ತು. ಪ್ರಸಕ್ತ ಕಾನೂನಿನ ಬಲವು ಕರೊನಾ ವಿರುದ್ಧ ಹೋರಾಡುವವರ ಸ್ಥೈರ್ಯವನ್ನು ಹೆಚ್ಚಿಸಲು ಅನುವಾಗಲಿದೆ.
