ಕರೊನಾ ಸೋಂಕು ಹರಡದಂತೆ ತಡೆಯಲು ಸಾಮಾಜಿಕ ಅಂತರವೇ ಉತ್ತಮ ಮತ್ತು ಏಕೈಕ ಪರಿಹಾರ ಎಂದು ಸರ್ಕಾರ ಮತ್ತು ವೈದ್ಯಕೀಯಲೋಕ ಪದೇಪದೆ ಹೇಳುತ್ತಿದೆ. ಈ ಬಗ್ಗೆ ಜನರಲ್ಲಿ ಅರಿವು ಮೂಡಿಸಲೆಂದೆ ಭಾನುವಾರ ‘ಜನತಾ ಕರ್ಫ್ಯೂ’ಗೆ ಕರೆ ನೀಡಲಾಗಿತ್ತು. ಇದಕ್ಕೆ ಜನರು ಉತ್ತಮ ಬೆಂಬಲ ನೀಡಿದರಾದರೂ, ಅದೇ ವಿವೇಚನೆ, ತಾಳ್ಮೆಯನ್ನು ಮುಂದುವರಿಸಿಲ್ಲ ಎಂಬುದು ದುರದೃಷ್ಟಕರ. ಚೀನಾದಲ್ಲಿನ ಪರಿಸ್ಥಿತಿ ನೋಡಿಯೂ ಇಟಲಿ ಕ್ರಮಕ್ಕೆ ಮುಂದಾಗಲಿಲ್ಲ. ತನ್ನ ದೇಶದಲ್ಲಿ ಸೋಂಕು ಹಬ್ಬುವಾಗಲೂ ಅದು ತಕ್ಷಣ ಎಚ್ಚೆತ್ತುಕೊಳ್ಳಲಿಲ್ಲ. ಆ ನಿರ್ಲಕ್ಷ್ಯಕ್ಕೆ ಇಟಲಿ ಬೆಲೆ ತೆರುತ್ತಿದ್ದು, ‘ಸಾವಿನ ಮನೆ’ ಆಗಿ ಪರಿವರ್ತನೆಯಾಗಿದೆ. ಕಳೆದ ಕೆಲ ದಿನಗಳಿಂದ ಅಲ್ಲಿ ನಿತ್ಯ ಸರಾಸರಿ 600-700 ಜನರು ಕರೊನಾದಿಂದ ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ. ಇದನ್ನೆಲ್ಲ ಗಮನಿಸಿಯೇ, ಭಾರತದಲ್ಲಿ ಸಾಕಷ್ಟು ಕಠಿಣ ಕ್ರಮಗಳನ್ನು ಕೈಗೊಳ್ಳಲಾಗಿದೆ. ಆದರೆ, ಇದಕ್ಕೆ ಜನರೇ ಸಹಕರಿಸದಿದ್ದರೆ ಹೇಗೆ? ‘ಜನರು ಲಾಕ್ಡೌನ್ ಅನ್ನು ಗಂಭೀರವಾಗಿ ಪರಿಗಣಿಸಿಲ್ಲ’ ಎಂದು ಪ್ರಧಾನಿ ನರೇಂದ್ರ ಮೋದಿ ಟ್ವೀಟ್ ಮೂಲಕ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ, ‘ಸರ್ಕಾರದ ನಿಯಮಗಳನ್ನು ಗಂಭೀರವಾಗಿ ಪಾಲಿಸಿ, ನಿಮ್ಮನ್ನು, ನಿಮ್ಮ ಕುಟುಂಬದವರನ್ನು ರಕ್ಷಿಸಿಕೊಳ್ಳಿ’ ಎಂದು ಜನರಲ್ಲಿ ಮನವಿ ಮಾಡಿದ್ದಾರೆ. ದೇಶದ 80ಕ್ಕೂ ಹೆಚ್ಚು ಜಿಲ್ಲೆಗಳಲ್ಲಿ ಲಾಕ್ಡೌನ್ ಜಾರಿಯಲ್ಲಿದ್ದರೂ, ಇದನ್ನು ಉಲ್ಲಂಘಿಸಿ ಜನರು ಗುಂಪಾಗಿ ಓಡಾಡುತ್ತಿರುವುದು, ರಜೆ ಘೋಷಿಸಲಾಗಿದ್ದರೂ ಅನವಶ್ಯಕ ಓಡಾಟದಲ್ಲಿ ತೊಡಗಿಕೊಂಡಿರುವುದು ಕಂಡುಬಂದಿದೆ. ಇದು ಖಂಡಿತ ಅಪಾಯಕಾರಿ ಬೆಳವಣಿಗೆ. ಭಾನುವಾರ ಸಂಜೆ ಕೂಡ ಇಂಥ ಅಪಸವ್ಯಗಳು ಕಂಡುಬಂದವು. ಕರೊನಾ ಹೊತ್ತಲ್ಲಿ ತುರ್ತು ಸೇವೆ ಸಲ್ಲಿಸುತ್ತಿರುವವರಿಗೆ ತಮ್ಮ ಮನೆಬಾಲ್ಕನಿಗಳಲ್ಲಿ ನಿಂತು ಕೃತಜ್ಞತೆ ಸಲ್ಲಿಸಲು ಜನರಿಗೆ ಕೋರಲಾಗಿತ್ತು. ಆದರೆ, ಎಷ್ಟೋ ಜನ ಸಾಮಾಜಿಕ ಅಂತರ ಕಾಯ್ದುಕೊಳ್ಳದೆ, ಗುಂಪುಗೂಡಿದರು.
