ರಾಜ್ಯ ಸರ್ಕಾರ ಕೊನೆಗೂ ಶಿಕ್ಷಕಸ್ನೇಹಿ ಕ್ರಮಕ್ಕೆ ಮುನ್ನುಡಿ ಬರೆದಿದ್ದು, ‘ರಾಜ್ಯ ಸಿವಿಲ್ ಸೇವೆಗಳು (ಶಿಕ್ಷಕರ ವರ್ಗಾವಣೆ ನಿಯಂತ್ರಣ) ವಿಧೇಯಕ-2020 ವಿಧಾನಸಭೆಯಲ್ಲಿ ಮಂಗಳವಾರ ಮಂಡನೆ ಮಾಡಿದೆ. ಬಜೆಟ್ ಅಧಿವೇಶನದಲ್ಲಿ ಈ ವಿಧೇಯಕದ ಬಗ್ಗೆ ವಿವರವಾದ ಚರ್ಚೆ ನಡೆದು, ಆ ಬಳಿಕ ಅಂಗೀಕಾರಗೊಳ್ಳುವ ಸಾಧ್ಯತೆಯಿದೆ. ಹಾಗಾಗಿ, ಮುಂದಿನ ವರ್ಗಾವಣೆಗೆ ಹೊಸ ಕಾನೂನು ಜಾರಿಯಾಗುವ ದಿನಗಳು ಸಮೀಪಿಸಿವೆ ಎನ್ನಬಹುದು. ವರ್ಗಾವಣೆಗೆ ನಿಯಮಗಳನ್ನು ಸಡಿಲಗೊಳಿಸುವ ಜತೆಗೆ, ಸ್ಪಷ್ಟತೆಗೂ ಬರಲಾಗಿದೆ. ಒಂದು ಶಾಲೆಯಲ್ಲಿ ಕನಿಷ್ಠ ಮೂರು ವರ್ಷ ಸೇವಾವಧಿ ಪೂರ್ಣಗೊಳಿಸಿದರೆ ಮಾತ್ರ ವರ್ಗಾವಣೆ ಕೋರಲು ಅವಕಾಶವಿದ್ದು, ಅಂಗವಿಕಲ ಶಿಕ್ಷಕರಿಗೆ ವಿನಾಯಿತಿ ನೀಡಲಾಗಿದೆ. ಅಲ್ಲದೆ, 50 ವರ್ಷ ದಾಟಿದ ಶಿಕ್ಷಕಿಯರು ಮತ್ತು 55 ವರ್ಷ ದಾಟಿದ ಶಿಕ್ಷಕರಿಗೆ ವಲಯವಾರು ವರ್ಗಾವಣೆಗಳಿಂದ ವಿನಾಯತಿ ಕಲ್ಪಿಸಲಾಗಿದೆ. ಹೊಸ ವಿಧೇಯಕ ಶಿಕ್ಷಕರ ಪ್ರಾಯೋಗಿಕ ಸಮಸ್ಯೆಗಳ ಬಗ್ಗೆ ಗಮನ ಹರಿಸಿರುವುದು ವಿಶೇಷ. ಏಪ್ರಿಲ್ ಮತ್ತು ಮೇನಲ್ಲಿ ಸಾರ್ವತ್ರಿಕ ಗಣಕೀಕೃತ ಕೌನ್ಸೆಲಿಂಗ್ ಮೂಲಕ ನಡೆಸಲಾಗುವ ಶಿಕ್ಷಕರ ವರ್ಗಾವಣೆ ಪ್ರಕ್ರಿಯೆ ವಿಶೇಷ ಸನ್ನಿವೇಶದಲ್ಲಿ ಸರ್ಕಾರದ ನಿರ್ದೇಶನದ ಮೇರೆಗೆ ಮಾಡುವ ಅಂಶವನ್ನೂ ವಿಧೇಯಕ ಒಳಗೊಂಡಿದೆ. ಸರ್ಕಾರಿ ಪ್ರಾಥಮಿಕ, ಪ್ರೌಢಶಾಲೆಗಳಲ್ಲಿ ಶಿಕ್ಷಕರ ಲಭ್ಯತೆ, ಪಾರದರ್ಶಕತೆ ಖಚಿತಪಡಿಸಿಕೊಳ್ಳಲು ಮತ್ತು ಬದಲಾದ ಸ್ವರೂಪದಲ್ಲಿ ಶಿಕ್ಷಕರ ವರ್ಗಾವಣೆ ನಿಯಂತ್ರಿಸುವುದು ವಿಧೇಯಕದ ಉದ್ದೇಶವಾಗಿದೆ. ಈ ಬಗ್ಗೆ ಸದನದಲ್ಲಿ ಶಾಸಕರು ವಿಸõತವಾಗಿ ಚರ್ಚೆ ನಡೆಸಲಿ. ಹೊಸ ಕಾನೂನಿನಲ್ಲಿ ಹಳೆ ಸಮಸ್ಯೆಗಳು ನುಸುಳದಂತೆ ಮತ್ತು ಹೊಸ ಅಪಸವ್ಯಗಳು ಸೃಷ್ಟಿ ಆಗದಂತೆ ಕಾಳಜಿ ವಹಿಸಲಿ. ಆಗಲೇ, ಈ ಪ್ರಯತ್ನಗಳು ಸಾರ್ಥಕಗೊಂಡು, ಶಿಕ್ಷಕ ಸಮುದಾಯ ನಿರಾಳವಾಗಲು ಸಾಧ್ಯ.
