ದೇಶದ ಬಾಡಿಗೆ ತಾಯ್ತನದ ಉದ್ಯಮ 28.4 ಶತಕೋಟಿ ರೂಪಾಯಿ ಮೌಲ್ಯವನ್ನು ಮೀರಿದೆ ಎಂಬ ಅಂದಾಜಿದೆ. ಅಲ್ಲದೆ, ಈ ಉದ್ಯಮ ಮಧ್ಯವರ್ತಿಗಳ ಹಿಡಿತದಲ್ಲಿದ್ದು, ಬಾಡಿಗೆ ತಾಯಂದಿರ ಹಾಗೂ ಮಕ್ಕಳ ಶೋಷಣೆ ನಿರಂತರವಾಗಿದೆ. ಅನೇಕ ಸಂದರ್ಭಗಳಲ್ಲಿ ತಾಯಂದಿರ ಪ್ರಾಣಕ್ಕೆ ಕುತ್ತುಂಟಾಗಿದ್ದೂ ಇದೆ. ಕೆಲವು ವಿದೇಶಿಯರು ಮಗುವನ್ನು ಬೇಡ ಎಂದ ಉದಾಹರಣೆಗಳೂ ಇವೆ. ಭಾರತದ ಬಾಡಿಗೆ ತಾಯಂದಿರು ಬಹುತೇಕ ಬಡ ಕುಟುಂಬದ ಹಿನ್ನೆಲೆಯವರು ಅಥವಾ ಅಂಥ ಸನ್ನಿವೇಶಕ್ಕೆ ಒಗ್ಗಿಕೊಳ್ಳಬೇಕಾದ ಪರಿಸ್ಥಿತಿಗೆ ಸಿಲುಕಿದವರು. ನಿರುದ್ಯೋಗ ಸಮಸ್ಯೆ, ಮನೆಯ ಆರ್ಥಿಕತೆಯ ಒತ್ತಡಗಳಿರುವುದರಿಂದ ಬಾಡಿಗೆ ತಾಯಂದಿರಾಗಲು ಒಪ್ಪಿಕೊಂಡುಬಿಡುತ್ತಾರೆ. ಫ್ರಾನ್ಸ್, ಜರ್ಮನಿ, ಇಟಲಿ, ಸ್ಪೇನ್, ಜಪಾನ್ ಮತ್ತು ಸ್ವಿಜರ್ಲೆಂಡ್ಗಳಲ್ಲಿ ಬಾಡಿಗೆ ತಾಯ್ತನದ ಉದ್ಯಮವನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಪ್ರಸ್ತುತ 7,000- 8,000 ಸರೋಗಸಿ ಕ್ಲಿನಿಕ್ಗಳು ದೆಹಲಿಯೊಂದರಲ್ಲೇ ಇವೆ. ಬಹುತೇಕ ಎಲ್ಲವೂ ಅನಧಿಕೃತವಾಗಿದ್ದು, ಗುಟ್ಟಾಗಿ ಬಾಡಿಗೆ ತಾಯ್ತನದ ಮನೆಗಳನ್ನು ನಿರ್ವಹಿಸುತ್ತಿವೆ. ಕರ್ನಾಟಕದಲ್ಲಾದರೆ, ಇಂತಹ ಬಾಡಿಗೆ ತಾಯ್ತನಕ್ಕೆ ಒಳಗಾಗುವವರಿಗೆ ಕನಿಷ್ಠ 40 ಸಾವಿರ ರೂಪಾಯಿಯಿಂದ ಒಂದು ಲಕ್ಷ ರೂಪಾಯಿ ತನಕ ಆದಾಯ ಸಿಗುತ್ತಿದೆ ಎನ್ನಲಾಗಿದೆ. ಆದರೆ, ಬಾಡಿಗೆ ತಾಯ್ತನ ಒಪ್ಪಿಕೊಳ್ಳುವ ಮಹಿಳೆಯರ ಶಾರೀರಿಕ, ಮಾನಸಿಕ ಆರೋಗ್ಯಗಳು ಏರುಪೇರಾಗುತ್ತವೆ. ಅವರ ದಾಂಪತ್ಯ ಜೀವನದ ಮೇಲೂ ಅದು ಪರಿಣಾಮ ಬೀರುತ್ತದೆ. ಆ ಕ್ಷಣಕ್ಕೆ ಅವರಿಗೆ ಹಣ ಸಿಗಬಹುದು. ಬಳಿಕ ಆಗುವ ಮಾನಸಿಕ ಆಘಾತ ಅದಕ್ಕಿಂತಲೂ ಹೆಚ್ಚಿನದು. ಈ ಎಲ್ಲ ಅಂಶಗಳನ್ನು ಅವಲೋಕಿಸಿಕೊಂಡು, ಸಮರ್ಪಕವಾದ ಮಾರ್ಗದಲ್ಲಿ ಸಾಗುವುದು ಈಗಿನ ಅಗತ್ಯ.
