ಇರಾನ್ ಇರಾಕ್ನಲ್ಲಿನ ಸೇನಾನೆಲೆಯೊಂದರ ಮೇಲೆ ದಾಳಿ ಮಾಡಿ, ಅದರಲ್ಲಿ ಅಮೆರಿಕ ನಾಗರಿಕ ಹತನಾಗಿದ್ದು, ಬಳಿಕ ಅಮೆರಿಕ ಪ್ರತೀಕಾರದ ಕ್ರಮವಾಗಿ ಇರಾನಿ ಸೇನೆಯ ಖುದ್ಸ್ ಪಡೆಯ ಮುಖ್ಯಸ್ಥ ಖಾಸಿಂ ಸುಲೆಮಾನಿಯನ್ನು ಹತ್ಯೆ ಮಾಡಿದ ಬಳಿಕ ಇರಾನ್-ಅಮೆರಿಕ ನಡುವಿನ ಸ್ಥಿತಿ ಉದ್ವಿಗ್ನವಾಗಿದೆ. ಅಮೆರಿಕ ಸೇನೆಯನ್ನೇ ‘ಭಯೋತ್ಪಾದಕ’ ಎಂದು ಇರಾನ್ ಘೋಷಿಸಿದ್ದು, ರಕ್ತಸಿಕ್ತ ಪ್ರತೀಕಾರ ತೆಗೆದುಕೊಳ್ಳುವುದಾಗಿ ಹೂಂಕರಿಸಿದೆ. ಇರಾಕ್ನಲ್ಲೂ ಪರಿಸ್ಥಿತಿ ತ್ವೇಷಮಯವಾಗಿದ್ದು, ಜರ್ಮನಿ ತನ್ನ ಸೇನೆಗೆ ಅಲ್ಲಿಂದ ವಾಪಸ್ ಆಗಲು ಸೂಚಿಸಿದೆ. ಬುಧವಾರ ಬೆಳಗ್ಗೆ ಮತ್ತೆ ಇರಾಕ್ನ ಅಮೆರಿಕ ಸೇನಾನೆಲೆಗಳ ಮೇಲೆ ಇರಾನ್ ದಾಳಿ ನಡೆಸಿದೆ. 22 ಕ್ಷಿಪಣಿಗಳ ಮೂಲಕ ನಡೆಸಿದ ದಾಳಿಯಲ್ಲಿ ಅಮೆರಿಕದ 80 ಸೈನಿಕರು ಮೃತಪಟ್ಟಿದ್ದಾರೆ ಎಂದು ಇರಾನ್ ಹೇಳಿಕೊಂಡಿದೆ. ಈ ಎಲ್ಲ ಬೆಳವಣಿಗೆಗಳು ಮೂರನೇ ವಿಶ್ವಯುದ್ಧಕ್ಕೆ ಕಾರಣವಾಗಲಿವೆ ಎಂದು ಹೇಳಲಾಗುತ್ತಿದೆಯಾದರೂ, ಆ ವಿಪರೀತಕ್ಕೆ ಹೋಗಲಿಕ್ಕಿಲ್ಲ. ಆದರೆ, ಆತಂಕ ತಲೆದೋರಿರುವುದಂತೂ ಹೌದು.
