ನಿರೀಕ್ಷೆಯಂತೆ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಈಗ ಮತ್ತೆ ಬಡ್ಡಿ ದರ ಹೆಚ್ಚಳವನ್ನು ಘೊಷಿಸಿದೆ. ಈ ಬಾರಿ 35 ಮೂಲಾಂಶ ಏರಿಕೆ ಮಾಡುವುದರೊಂದಿಗೆ ಸಾಲಗಾರರ ಮೇಲಿನ ಹೊರೆಯನ್ನು ಮತ್ತಷ್ಟು ಹೆಚ್ಚಿಸಲಾಗಿದೆ. ಪ್ರಸ್ತುತ ಏರಿಕೆಯೊಂದಿಗೆ ರೆಪೊ ದರವು ಶೇ. 6.25ಕ್ಕೆ ತಲುಪಿದೆ. ಇದೇ ವೇಳೆ ಸ್ಥಾಯಿ ಠೇವಣಿ ಸೌಲಭ್ಯ (ಎಸ್ಡಿಎಫ್) ದರವನ್ನು ಶೇ. 5.65ರಿಂದ ಶೇ. 6ಕ್ಕೆ ಹೆಚ್ಚಳ ಮಾಡಲಾಗಿದೆ. ಬ್ಯಾಂಕ್ಗಳಲ್ಲಿ ಹೆಚ್ಚುವರಿಯಾಗಿರುವ ಹಣವನ್ನು ಆರ್ಬಿಐನಲ್ಲಿ ಠೇವಣಿ ಮಾಡಿದರೆ ಸಿಗುವ ಬಡ್ಡಿ ದರ ಇದಾಗಿದೆ. ಆದರೆ, ಇದಕ್ಕೆ ಅನುಗುಣವಾಗಿ ಬ್ಯಾಂಕ್ಗಳು ಕೂಡ ತಮ್ಮಲ್ಲಿ ಠೇವಣಿ ಇಡುವವರಿಗೆ ನೀಡುವ ಬಡ್ಡಿ ದರದಲ್ಲಿ ಹೆಚ್ಚಳ ಮಾಡಲಿವೆಯೇ ಎಂಬುದು ಸ್ಪಷ್ಟವಾಗಬೇಕಿದೆ. ಪ್ರಸ್ತುತ ಹಣಕಾಸು ವರ್ಷದಲ್ಲಿ ಮೇ ತಿಂಗಳಿನಿಂದ ಇದುವರೆಗೆ ಕೈಗೊಳ್ಳಲಾದ ಐದನೇ ರೆಪೊ ದರ ಏರಿಕೆ ಇದಾಗಿದ್ದು, ಒಟ್ಟಾರೆಯಾಗಿ ಶೇ. 2.25 ಬಡ್ಡಿ ದರ ಹೆಚ್ಚಳ ಮಾಡಲಾಗಿದೆ. ಈ ವರ್ಷದ ಮೇ 4ರಂದು 40 ಮೂಲಾಂಶಗಳಷ್ಟು ಬಡ್ಡಿ ದರವನ್ನು ಹೆಚ್ಚಳ ಮಾಡಿತ್ತು. ನಂತರ ಜೂನ್, ಆಗಸ್ಟ್ ಮತ್ತು ಸೆಪ್ಟೆಂಬರ್ನಲ್ಲಿ ಮೂರು ಬಾರಿ ತಲಾ ಮೂಲಾಂಶ ಏರಿಸಲಾಯಿತು. 2023ರ ಮಾರ್ಚ್ ವೇಳೆಗೆ ಬಡ್ಡಿ ದರವು ಶೇ. 6.5ಕ್ಕೆ ಏರಿಕೆಯಾಗಲಿದೆ ಎಂದು ಬ್ಯಾಂಕ್ ಆಫ್ ಬರೋಡಾ ಹಣಕಾಸು ನೀತಿ ಸಭೆಯ ವರದಿಯಲ್ಲಿ ಪ್ರಸ್ತಾಪಿಸಿರುವುದು ಮತ್ತೊಂದು ಸುತ್ತಿನ ಏರಿಕೆಯ ಸ್ಪಷ್ಟ ಮುನ್ಸೂಚನೆಯಾಗಿದೆ.
