VIDEO| ತಂದೆಯ ಮುಂದೆಯೇ ಮಗಳ ಜತೆ ಅಸಭ್ಯವಾಗಿ ವರ್ತಿಸಿದ ಪೊಲೀಸ್​ ಅಧಿಕಾರಿ ಅಮಾನತ್ತು..!

ತಿರುವನಂತಪುರಂ: ದೂರು ಕೊಡಲು ಬಂದ ತಂದೆ-ಮಗಳ ಜತೆಯಲ್ಲಿ ತಿರುವನಂತಪುರಂನ ನೆಯ್ಯಡ್ರಾಮ್​ ಠಾಣೆಯ ಪೊಲೀಸ್​ ಅಧಿಕಾರಿಯೊಬ್ಬರು ಅಸಭ್ಯವಾಗಿ ವರ್ತಿಸಿದ ವಿಡಿಯೋವೊಂದು ವೈರಲ್​ ಆದ ಬೆನ್ನಲ್ಲೇ ಅಧಿಕಾರಿಯನ್ನು ಅಮಾನತ್ತು ಮಾಡಲಾಗಿದೆ.

ಗ್ರೇಡ್​ ಅಸಿಸ್ಟೆಂಟ್​ ಸಬ್​ ಇನ್ಸ್​ಪೆಕ್ಟರ್​ ಗೋಪಕುಮಾರ್​ ಅಮಾನತ್ತಾದ ಅಧಿಕಾರಿ. ಶನಿವಾರ ಅಮಾನತ್ತು ಮಾಡಲಾಗಿದ್ದು, ಅಧಿಕಾರಿ ವಿರುದ್ಧ ತನಿಖೆಗೆ ಆದೇಶ ಹೊರಡಿಸಲಾಗಿದೆ.

ನ. 24ರಂದು ತಿರುವನಂತಪುರಂನ ನಿವಾಸಿ ಸುದೇವನ್​ ಮತ್ತು ಆತನ ಮಗಳು ದೂರು ನೀಡಲು ಠಾಣೆಗೆ ಬಂದಿದ್ದರು. ಇನ್ನೊಬ್ಬ ಮಗಳು ನಾಪತ್ತೆಯಾಗಿರುವ ಬಗ್ಗೆ ದೂರು ನೀಡಲು ಬಂದಿದ್ದರು. ಈ ವೇಳೆ ಪ್ರಕರಣ ದಾಖಲಿಸಿಕೊಳ್ಳಲು ಎಸ್​ಐ ಹಿಂದೇಟು ಹಾಕಿದ್ದಾರೆ. ಇದು ವಾಗ್ವಾದಕ್ಕೆ ಕಾರಣವಾಗಿದ್ದು, ಎಸ್​ಐ ಸಂಯಮ ಕಳೆದುಕೊಂಡು ವರ್ತಿಸಿರುವುದನ್ನು ಸುದೇವನ್​ ತಮ್ಮ ಮೊಬೈಲ್​ನಲ್ಲಿ ಸೆರೆಹಿಡಿದಿದ್ದಾರೆ.

ಇದನ್ನೂ ಓದಿ: ಪತ್ನಿಯನ್ನೇ ಬರ್ಬರವಾಗಿ ಕೊಂದ; 9 ವರ್ಷಗಳ ಹಿಂದೆ ಪ್ರೀತಿಸಿ ಮದ್ವೆಯಾಗಿದ್ದವ ಹೀಗೇಕೆ ಮಾಡಿದ?

ವಿಡಿಯೋದಲ್ಲಿ ಏನಿದೆ?: ಮಫ್ತಿಯಲ್ಲಿರುವ ಪೊಲೀಸ್​ ಠಾಣೆಯ ಮುಂಭಾಗ ನಿಂತು ತಂದೆ-ಮಗಳೊಂದಿಗೆ ಅಸಭ್ಯವಾಗಿ ವರ್ತಿಸಿದ್ದಾರೆ. ಪೊಲೀಸರೇ ಬೆದರಿಸಿದರೆ ದೂರು ನೀಡಲು ಯಾರು ಮುಂದೆ ಬರುತ್ತಾರೆ ಎಂದು ಸುದೇವನ್​ ಅಸಹಾಯಕರಾಗಿ ಮಾತನಾಡಿರುವುದು ವಿಡಿಯೋದಲ್ಲಿದೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಎಸ್​ಐ ಹೌದು, ಇಲ್ಲಿ ಇದೇ ದಾರಿ ಎಂದು ದುರಹಂಕಾರದ ಮಾತುಗಳನ್ನಾಡಿದ್ದಾರೆ. ಕೊನೆಯಲ್ಲಿ ಎಸ್​ಐ ಅಸಭ್ಯ ವರ್ತನೆಯಿಂದ ಬೇಸತ್ತ ಸುದೇವನ್​ ಮಗಳು ಅಲ್ಲಿಂದ ಹೊರಡೋಣ ಎಂದು ತಂದೆಗೆ ಹೇಳುವುದು ವಿಡಿಯೋದಲ್ಲಿದೆ. ಅಲ್ಲದೆ, ಮಹಿಳೆ ವಿರುದ್ಧ ಎಸ್​ಐ ಅಶ್ಲೀಲ ಪದಪ್ರಯೋಗ ಮಾಡಿದ್ದು, ಆಕೆಯ ಅಳುತ್ತಿರುವುದು ಸಹ ಸೆರೆಯಾಗಿದೆ.

ದೂರು ದಾಖಲಿಸದೆ ತಂದೆಯ ಮುಂದೆಯೇ ಮಗಳೊಂದಿಗೆ ಅಸಭ್ಯವಾಗಿ ವರ್ತಿಸಿರುವ ಎಸ್​ಐ ನಡವಳಿಕೆ ಸರಿಯಲ್ಲ ಎಂದು ಅಮಾನತ್ತು ಮಾಡಿ ಆದೇಶ ಹೊರಡಿಸಲಾಗಿದೆ. (ಏಜೆನ್ಸೀಸ್​)

https://www.vijayavani.net/didnt-know-it-was-over-dosage/