ಶಿವವ್ರತನಿಷ್ಠರಾದ ಸಾಧಕರಿಗೆ ಪ್ರೇತದ ಭಾವನೆಯು ಎಂದಿಗೂ ಉಂಟಾಗುವುದಿಲ್ಲ. ಪ್ರೇತಭಾವದಿಂದ ಅವರು ಬಿಡುಗಡೆ ಹೊಂದಿರುವುದರಿಂದ ಪ್ರೇತ ಕರ್ಮದ ಲೋಪದ ಪ್ರಶ್ನೆಯು ಉಂಟಾಗದು. ಯಾವ ಭಕ್ತನು ಲಿಂಗಭಾವದಿಂದ ಯುಕ್ತನಾಗಿರುವನೋ ಅಂಥವನಿಗೆ ಅಪಸವ್ಯ ಕರ್ಮವನ್ನು ಮಾಡುವುದು ಯೋಗ್ಯವಲ್ಲ. ಆದ್ದರಿಂದ ಶಿವವ್ರತವನ್ನು ನಿಷ್ಠೆಯಿಂದ ಆಚರಿಸುವ ಭಕ್ತರಿಗೆ ದೇಹಾವಸಾನದ ನಂತರ ಇತರರಿಗೆ ಮಾಡಲಾಗುವ ಯಾವುದೇ ರೀತಿಯ ಪ್ರೇತಕ್ರಿಯೆಗಳನ್ನು ಮಾಡಬೇಕಾದ ಅಗತ್ಯವಿರುವುದಿಲ್ಲ. ಅಪಸವ್ಯವೆಂದರೆ ಅಂತ್ಯ ಸಂಸ್ಕಾರದ ಸಂದರ್ಭದಲ್ಲಿ ಮಾಡಲಾಗುವ ಒಂದು ವಿಶಿಷ್ಟವಾದ ವಿಧಿಯಾಗಿದೆ. ಯಜ್ಞೋಪವೀತವನ್ನು ಎಡ ಭುಜದಿಂದ ಬಲ ಭುಜಕ್ಕೆ ಬದಲಾಯಿಸುವ ಕ್ರಿಯೆಗೆ ‘ಅಪಸವ್ಯ’ ಎಂದು ಹೆಸರು. ಪವಿತ್ರವಾದ ಶಿವದಾರವನ್ನು ಈ ರೀತಿಯಾಗಿ ಬದಲಾಯಿಸುವ ಅವಶ್ಯಕತೆ ಇರುವುದಿಲ್ಲ.
