ಮಂಗಳೂರಿನಲ್ಲಿ ವರುಣನ ಅಬ್ಬರ

ಗುರುವಾರ ರಾತ್ರಿಯಿಂದ ಆರಂಭವಾದ ಮಳೆ ಶುಕ್ರವಾರ ಬೆಳಗಿನ ಜಾವದ ವೇಳೆಗೆ ತೀವ್ರಗೊಂಡಿತು. ಪರಿಣಾಮವಾಗಿ ನಗರದ ಹೃದಯಭಾಗಗಳಾದ ಜ್ಯೋತಿ ವೃತ್ತ, ಕೊಡಿಯಾಲಬೈಲ್, ಕೊಟ್ಟಾರ ಸೇರಿದಂತೆ ತಗ್ಗು ಪ್ರದೇಶಗಳು ಅಲ್ಪಕಾಲ ಜಲಾವೃತಗೊಂಡವು. ಸಮರ್ಪಕವಾಗಿ ಮಳೆನೀರು ಹರಿದುಹೋಗದ ಕಾರಣ ರಸ್ತೆಗಳ ಮೇಲೆ ಮೊಣಕಾಲುದ್ದ ನೀರು ನಿಂತು ವಾಹನ ಸವಾರರು ತೀವ್ರ ಸಂಕಷ್ಟ ಎದುರಿಸಿದರು. ಜ್ಯೋತಿ ಹಾಗೂ ಕೊಡಿಯಾಲಬೈಲ್ ಸುತ್ತಮುತ್ತಲಿನ ಚರಂಡಿಗಳು ಬ್ಲಾಕ್ ಆಗಿದ್ದರಿಂದ ಕೊಳಚೆ ನೀರು ರಸ್ತೆಯ ಮೇಲೆಯೇ ಹರಿಯುವಂತಾಗಿತ್ತು.

*ಮ್ಯಾನ್‌ಹೋಲ್‌ಗಳಿಂದ ಚಿಮ್ಮಿದ ನೀರು!

ನಗರದ ಬಹುತೇಕ ಜನವಸತಿ ಪ್ರದೇಶಗಳಲ್ಲಿ ಮಳೆನೀರು ಹರಿದುಹೋಗುವ ಪೈಪ್‌ಲೈನ್‌ಗಳನ್ನು ಒಳಚರಂಡಿ (ಮ್ಯಾನ್‌ಹೋಲ್) ವ್ಯವಸ್ಥೆಗೆ ಕಾನೂನುಬಾಹಿರವಾಗಿ ಸಂಪರ್ಕಿಸಿರುವುದು ಈ ಬಾರಿ ದೊಡ್ಡ ಸಮಸ್ಯೆಯಾಗಿ ಪರಿಣಮಿಸಿತು. ಮಳೆಯ ನೀರು ಮ್ಯಾನ್‌ಹೋಲ್‌ಗೆ ನುಗ್ಗಿದ ತಕ್ಷಣ, ಒತ್ತಡ ತಡೆಯಲಾರದೆ ನಗರದ ಹಲವೆಡೆ ರಸ್ತೆ ಮಧ್ಯದಲ್ಲಿದ್ದ ಮ್ಯಾನ್‌ಹೋಲ್‌ಗಳಿಂದ ಕಾರಂಜಿಯಂತೆ ನೀರು ಹೊರಚೆಲ್ಲುವ ದೃಶ್ಯಗಳು ಸಾಮಾನ್ಯವಾಗಿದ್ದವು.

ಕೊಡಿಯಾಲಬೈಲ್ ಸಮೀಪ ಮುಖ್ಯ ವಿದ್ಯುತ್ ಲೇನ್ ಮೇಲೆಯೇ ಬೃಹತ್ ಮರ ಕಡಿದು ಬಿದ್ದ ಪರಿಣಾಮ, ಸಾಲು ಸಾಲು ವಿದ್ಯುತ್ ಕಂಬಗಳು ಮುರಿದು ಬಿದ್ದಿವೆ. ಇದರೊಂದಿಗೆ ನಗರದ ವಿವಿಧೆಡೆ ಮರದ ಗೆಲ್ಲುಗಳು ವಿದ್ಯುತ್ ತಂತಿಗಳ ಮೇಲೆ ಬಿದ್ದು ವಿದ್ಯುತ್ ಸಂಪರ್ಕ ಕಡಿತಗೊಂಡಿದೆ. ಮೆಸ್ಕಾಂ ಸಿಬ್ಬಂದಿ ಸಮರೋಪಾದಿಯಲ್ಲಿ ಕಾರ್ಯಾಚರಣೆ ನಡೆಸುತ್ತಿದ್ದರೂ, ಹಲವು ವಾರ್ಡ್‌ಗಳು ಶುಕ್ರವಾರವಿಡೀ ಕತ್ತಲಲ್ಲಿ ಕಳೆಯುವಂತಾಯಿತು. ಕಳೆದ ರಾತ್ರಿ ಸುರಿದ ಭಾರೀ ಮಳೆಗೆ ಸೇಂಟ್ ಆಗ್ನೇಸ್ ಜನವಸತಿ ಪ್ರದೇಶದ ಬಳಿ ವಿದ್ಯುತ್ ಪರಿವರ್ತಕ (ಟ್ರಾನ್ಸ್‌ಫಾರ್ಮರ್) ಸಂಪೂರ್ಣವಾಗಿ ನೆಲಕ್ಕುರುಳಿದೆ. ಅದೃಷ್ಟವಶಾತ್ ಈ ವೇಳೆ ರಸ್ತೆಯಲ್ಲಿ ಯಾರೂ ಇಲ್ಲದ ಕಾರಣ ಭಾರೀ ಪ್ರಾಣಾಪಾಯವೊಂದು ತಪ್ಪಿದೆ.

*ಹೆದ್ದಾರಿಯುದ್ದಕ್ಕೂ ಟ್ರಾಫಿಕ್ ಜಾಮ್!