ಯೋಗಿ ಸಂಪುಟ ಸಹೋದ್ಯೋಗಿಗೆ ಜೀವ ಬೆದರಿಕೆ; FIR ದಾಖಲು

ಉತ್ತರಪ್ರದೇಶ: ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್​ ಸರ್ಕಾರದ ಸಂಪುಟ ಸಚಿವರಾದ ನಂದ ಗೋಪಾಲ್ ಗುಪ್ತಾ ಅಲಿಯಾಸ್​ ನಂದಿ ಅವರಿಗೆ ಏಪ್ರಿಲ್​​ 19 ರಂದು ಅಪರಿಚಿತ ವ್ಯಕ್ತಿಯಿಂದ ಜೀವ ಬೆದರಿಕೆ ಕರೆ ಬಂದಿದ್ದು, ಘಟನೆ ನಡೆದ ಎರಡು ವಾರಗಳ ಬಳಿಕ ಕರೆ ಮಾಡಿದ ಆರೋಪಿ ವಿರುದ್ಧ ಎಫ್​ಐಆರ್​ ದಾಖಲಾಗಿದೆ.

ಉತ್ತರ ಪ್ರದೇಶದ ಕೈಗಾರಿಕಾ ಅಭಿವೃದ್ಧಿ, ರಫ್ತು ಉತ್ತೇಜನ, ಎನ್‌ಆರ್‌ಐ ಮತ್ತು ಹೂಡಿಕೆ ಉತ್ತೇಜನ ಸಚಿವರಾದ ನಂದ ಗೋಪಾಲ್ ಗುಪ್ತಾ ಅವರ ಮೊಬೈಲ್ ಫೋನಿಗೆ ನೇರವಾಗಿ ಕೊಲೆ ಬೆದರಿಕೆಯ ಕರೆ ಬಂದಿತ್ತು ಎನ್ನಲಾಗಿದೆ. ಏಪ್ರಿಲ್ 19 ರಂದು ಸಂಜೆ 5.55 ಮತ್ತು 6.05 ರ ಸುಮಾರಿಗೆ ಸಚಿವರಿಗೆ ಎರಡು ವಿಭಿನ್ನ ಫೋನ್ ನಂಬರ್​ಗಳಿಂದ ಕೊಲೆ ಬೆದರಿಕೆಗಳು ಬಂದಿವೆ ಎಂದು ಎಫ್‌ಐಆರ್‌ನಲ್ಲಿ ಹೇಳಲಾಗಿದೆ.

ಈ ವೇಳೆ ಗುಪ್ತಾ ಅವರ ಆಪ್ತ ಸಹಾಯಕ ಶೈಲೇಂದ್ರ ಸಿಂಗ್ ಅಪರಿಚಿತ ಕರೆಯನ್ನು ಸ್ವೀಕರಿಸಿ ಮಾತನಾಡಿದ್ದರು ಎಂದು ಇನ್ಸ್‌ಪೆಕ್ಟರ್ ಅಖಿಲೇಶ್ ಮಿಶ್ರಾ ತಿಳಿಸಿದ್ದಾರೆ. ಆದರೆ ಘಟನೆ ನಡೆದ ಸುಮಾರು ಎರಡು ವಾರಗಳ ನಂತರ ಮೇ 3 ರಂದು ಭಾರತೀಯ ದಂಡ ಸಂಹಿತೆ ಸೆಕ್ಷನ್ 507 ರ ಅಡಿಯಲ್ಲಿ ಅಪರಿಚಿತ ಕರೆ ಮೂಲಕ ಜೀವ ಬೆದರಿಕೆ ಹಾಕಿದ್ದಕ್ಕಾಗಿ ಲಕ್ನೋ ಹಜರತ್‌ಗಂಜ್ ಪೊಲೀಸ್ ಠಾಣೆಯಲ್ಲಿ ಎಫ್‌ಐಆರ್ ದಾಖಲಿಸಲಾಗಿದೆ.

ಇದನ್ನೂ ಓದಿ: ಜಾಗದ ಜಗಳಕ್ಕೆ ಹಾಡಹಗಲೇ 6 ಜನರನ್ನು ಗುಂಡಿಟ್ಟು ಕೊಂದ ಕಿರಾತಕರು

ಇನ್ನೂ ಅಪರಿಚಿತ ಕರೆ ಮಾಡಿದವರ ಕರೆ ವಿವರಗಳ ದಾಖಲೆಗಳನ್ನು ಪತ್ತೆಹಚ್ಚಿ ಅವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವಂತೆ ಸಚಿವರು ಎಫ್‌ಐಆರ್‌ನಲ್ಲಿ ಪೊಲೀಸರನ್ನು ಒತ್ತಾಯಿಸಿದ್ದು, ಶೀಘ್ರದಲ್ಲೇ ಆರೋಪಿಯನ್ನು ಕಂಡು ಹಿಡಿಯುತ್ತೇವೆ ಎಂದು ಪೊಲೀಸರು ತಿಳಿಸಿದ್ದಾರೆ.

https://www.vijayavani.net/55-year-old-man-married-to-25-year-young-woman

https://www.vijayavani.net/gold-worth-42-2-lakh-hidden-in-rectum-seized-at-hyderabad-airport