‘ನಮ್ಮ ಸಿನಿಮಾದ ಕಥೆಯೇ ರೆಟ್ರೋ ಆಗಿರುವುದರಿಂದ ಹಾಗೂ ‘ಗಂಧದ ಗುಡಿ’, ‘ಶೋಲೆ’ ಚಿತ್ರಗಳು ತೆರೆ ಕಂಡಿದ್ದ ಸಮಯದಲ್ಲೂ ನಮ್ಮ ಚಿತ್ರದ ಕಥೆ ಸಾಗುವುದರಿಂದ, ಅದರಲ್ಲಿ ಬಳಸಿದ್ದ ಪಿಸ್ತೂಲನ್ನೇ ‘ಕಬ್ಜ’ಗೂ ಬಳಸಿಕೊಳ್ಳಲಾಗಿದೆ’ ಎನ್ನುತ್ತಾರೆ ನಿರ್ದೇಶಕ ಆರ್.ಚಂದ್ರು. ‘‘ಶೋಲೆ’ ಬೆಂಗಳೂರು ಸಮೀಪದ ರಾಮನಗರದಲ್ಲಿ ಶೂಟಿಂಗ್ ಆಗಿತ್ತು. ಹೀಗಾಗಿ ‘ಗಂಧದ ಗುಡಿ’ಯಲ್ಲಿ ಡಾ.ರಾಜ್ ಬಳಸಿದ್ದ ಪಿಸ್ತೂಲನ್ನೇ ಅಮಿತಾಭ್ ಬಳಸಿದ್ದರು. ಇವೆರಡೂ ಚಿತ್ರಗಳಿಗೆ ಬೆಂಗಳೂರು ಗನ್ ಹೌಸ್ ಆ ಪಿಸ್ತೂಲ್ ನೀಡಿತ್ತು. ಆ ಬಳಿಕ ಯಾವುದೇ ಚಿತ್ರದಲ್ಲೂ ಆ ಪಿಸ್ತೂಲ್ ಬಳಸಲಾಗಿಲ್ಲ’ ಎನ್ನುವ ಚಂದ್ರು, ‘ಶೂಟಿಂಗ್ ಬಳಿಕ ಆ ಪಿಸ್ತೂಲನ್ನು ಬೆಂಗಳೂರು ಗನ್ ಹೌಸ್ಗೆ ಮರಳಿಸಲಾಗುವುದು’ ಎನ್ನುತ್ತಾರೆ. ‘ಉಪೇಂದ್ರ ಕೂಡ ಈ ಪಿಸ್ತೂಲ್ ಹಿಡಿದು ರೋಮಾಂಚಿತರಾಗಿದ್ದು, ಆ ಕುರಿತ ವಿಶೇಷ ಅನುಭವ ಹೇಳಿಕೊಂಡಿದ್ದಾರೆ. ಮಾತ್ರವಲ್ಲ, ಅದನ್ನು ಸೋಷಿಯಲ್ ಮೀಡಿಯಾದಲ್ಲೂ ಹಂಚಿಕೊಂಡಿದ್ದಾರೆ’ ಎನ್ನುತ್ತಾರೆ ಚಂದ್ರು. ಸದ್ಯ, ಸಿನಿಮಾದ ಎರಡನೇ ಹಂತದ ಶೂಟಿಂಗ್ ಬೆಂಗಳೂರಿನಲ್ಲಿ ಹಾಕಲಾಗಿರುವ ಸೆಟ್ಗಳಲ್ಲಿ ನಡೆಯುತ್ತಿದೆ. ಒಟ್ಟು ಐದು ಹಂತಗಳಲ್ಲಿ ಶೂಟಿಂಗ್ ನಡೆಯಲಿದೆ.
