ಬೆಂಗಳೂರು: ಅಜೀಂ ಪ್ರೇಮ್‌ಜಿ ವಿಶ್ವವಿದ್ಯಾಲಯ, ಬೆಂಗಳೂರು ಇಂಟರ್‌ನ್ಯಾಷನಲ್ ಸೆಂಟರ್ ಸಹಯೋಗದಲ್ಲಿ ಆಯೋಜಿಸಿದ್ದ ‘ಕೃಷ್ಣೆಯಿಂದ ಕಾವೇರಿವರೆಗೆ’ ಕಾರ್ಯಕ್ರಮದಲ್ಲಿ ನಾಡಿನ ಸಾಹಿತ್ಯ, ಕಲೆ, ಸಂಸ್ಕೃತಿ ಪರಂಪರೆ ಅನಾವರಣಗೊಂಡಿತ್ತು.
ಅಜೀಂ ಪ್ರೇಮ್‌ಜಿ ವಿಶ್ವವಿದ್ಯಾಲಯದ ಕಥಾವನ ಮಕ್ಕಳ ಪುಸ್ತಕ ಸರಣಿ-1ರ 10 ಪುಸ್ತಕಗಳನ್ನು ಚಿತ್ರ ನಿರ್ದೇಶಕ ಪಿ.ಶೇಷಾದ್ರಿ ಬಿಡುಗಡೆ ಮಾಡಿದರು. ರಾಜ್ಯದ ಸಾಂಪ್ರದಾಯಿಕ ಕರಕುಶಲ ಕಲೆಗಳು ಮತ್ತು ನೇಯ್ಗೆ ಪರಂಪರೆಯ ಕುರಿತ ಸಂವಾದ ನಡೆಯಿತು. ಕಲಾಗಂಗೋತ್ರಿ ತಂಡದವರು, ಕವಿ ಕೆ. ಎಸ್.ನರಸಿಂಹಸ್ವಾಮಿ ಅವರ ಕವಿತೆ ಆಧರಿಸಿದ ಸಂಗೀತ ನಾಟಕ ‘ಮೈಸೂರು ಮಲ್ಲಿಗೆ’ ಪ್ರದರ್ಶಿಸಿದರು. ಮೇಘಾ, ಸುಬ್ರಹ್ಮಣ್ಯ ಕುಮಾರ, ವೈಶಾಲಿ ಜಾಧವ್ ಹಾಗೂ ಸದಾಶಿವ ನಾಯ್ಕ, ಕರ್ನಾಟಕದ ಸಾಂಪ್ರದಾಯಿಕ ತಿನಿಸುಗಳ ಸಾಂಸ್ಕೃತಿಕ, ಪೌಷ್ಠಿಕ ಮತ್ತು ಆಯುರ್ವೇದ ಮಹತ್ವವನ್ನು ಪರಿಚಯಿಸಿದರು.
‘ಜಗವೆಲ್ಲ ತೊಯ್ದ ಬೆಳಕು ರಾಜ್’ ಸಾಕ್ಷ್ಯಚಿತ್ರದ ಪ್ರದರ್ಶನ ಮತ್ತು ಚರ್ಚೆ ಮೂಲಕ ಡಾ. ರಾಜ್‌ಕುಮಾರ್ ಅವರ ಸಾಂಸ್ಕೃತಿಕ ಪರಂಪರೆ, ಸಮಾಜದ ಮೇಲೆ ಅವರು ಬೀರಿದ ಪ್ರಭಾವವನ್ನು ವಿಶ್ಲೇಷಿಸಲಾಯಿತು. ಅಪ್ಪಗೆರೆ ತಿಮ್ಮರಾಜು ಅವರ ಜನಪದ ಸಂಗೀತ ಸಂಭ್ರಮವು ವಿಶೇಷ ಗಮನ ಸೆಳೆಯಿತು. ನಾಡಿನ ಜನಪದ ಸಂಗೀತ ಪರಂಪರೆಯ ವೈವಿಧ್ಯವನ್ನು ಪರಿಚಯಿಸಿತು. ಕೃತಕ ಬುದ್ಧಿಮತ್ತೆ(ಎಐ) ಯುಗದಲ್ಲಿ ಕನ್ನಡಿಗರ ಉದ್ಯಮಶೀಲತೆಗೆ ಲಭ್ಯವಿರುವ ಅವಕಾಶಗಳು ಮತ್ತು ಸವಾಲುಗಳ ಕುರಿತು ವಸಂತ ಶೆಟ್ಟಿ, ಸಂಜಯ್ ಆನಂದರಾಮ್, ಸಚಿನ್ ನಾಯ್ಕ್ ಅವರೊಂದಿಗೆ ಸಂವಾದ ನಡೆಯಿತು.
