ನವದೆಹಲಿ: ಕರೊನಾ 2ನೇ ಅಲೆಯ ಕಾಟದಿಂದಾಗಿ ಏಪ್ರಿಲ್ ತಿಂಗಳಲಿ 70 ಲಕ್ಷ ಜನರು ನಿರುದ್ಯೋಗಿಗಳಾಗಿದ್ದು ಮಾರ್ಚ್ನಲ್ಲಿದ್ದ ಶೇ. 6.5 ನಿರುದ್ಯೋಗ ದರ ಈಗ ಶೇ. 7.97ಕ್ಕೆ ಜಿಗಿದಿದೆ. ನಿರುದ್ಯೋಗ ದರ ನಾಲ್ಕು ತಿಂಗಳಲ್ಲೇ ಗರಿಷ್ಠ ಪ್ರಮಾಣ ತಲುಪಿದೆ ಎಂದು ಖಾಸಗಿ ಸಂಸ್ಥೆ ಸೆಂಟರ್ ಫಾರ್ ಮಾನಿಟರಿಂಗ್ ಇಂಡಿಯನ್ ಇಕಾನಮಿ (ಸಿಎಂಐಇ) ಹೇಳಿದೆ. ರಾಜ್ಯ ಸರ್ಕಾರಗಳು ಲಾಕ್ಡೌನ್ ವಿಸ್ತರಿಸುತ್ತಿರುವುದರಿಂದ ಭವಿಷ್ಯ ಇನ್ನೂ ಕರಾಳವಾಗಿದೆ ಎಂದು ಅದು ಅಭಿಪ್ರಾಯ ಪಟ್ಟಿದೆ. ‘ಉದ್ಯೋಗ ಲಭ್ಯತೆ ಪ್ರಮಾಣ ಕುಸಿದಿದೆ. ಲಾಕ್ಡೌನ್ ಇದಕ್ಕೆ ಕಾರಣವಾಗಿರಬಹುದು’ ಎಂದು ಸಿಎಂಐಇ ಆಡಳಿತ ನಿರ್ದೇಶಕ ಮಹೇಶ್ ವ್ಯಾಸ್ ವಿಶ್ಲೇಷಿಸಿದ್ದಾರೆ. ಕಳೆದ ವರ್ಷ ಮಾರ್ಚ್ನಲ್ಲಿ ವಿಧಿಸಿದ ಲಾಕ್ಡೌನನಿಂದಾಗಿ ಲಕ್ಷಾಂತರ ಜನರು ಉದ್ಯೋಗ ಕಳೆದು ಕೊಂಡಿದ್ದರು. ಕೆಲಸಗಾರರ ಸಂಬಳದಲ್ಲಿ ಕಡಿತ ಮಾಡಲಾಗಿತ್ತು. ಉದ್ಯೋಗ ಕ್ಷೇತ್ರದ ಭವಿಷ್ಯ ಮಂಕಾಗಿರುವುದರಿಂದ ಭಾರತ ಈ ವರ್ಷ ಎರಡಂಕಿ ಆರ್ಥಿಕ ಬೆಳವಣಿಗೆ ಸಾಧಿಸುವ ಗುರಿ ತಲುಪುದು ಕಷ್ಟವಿದೆ ಎಂಬ ಭೀತಿ ಎದುರಾಗಿದೆ.
