ಬ್ರಿಟನ್​​ನಲ್ಲಿ ರಕ್ಷಣಾ ಗೌನ್​ಗಳ ಕೊರತೆ; ಆರೋಗ್ಯ ಇಲಾಖೆ ಹೊಸದಾಗಿ ಹೊರಡಿಸಿದ ಮಾರ್ಗಸೂಚಿ ನೋಡಿದರೆ ಕಂಗಾಲಾಗುವುದು ಖಚಿತ

ಲಂಡನ್​: ಕರೊನಾ ವೈರಸ್​ ರೋಗಿಗಳಿಗೆ ಚಿಕಿತ್ಸೆ ನೀಡುವ ವೈದ್ಯರಿಗೆ ಸ್ವಸುರಕ್ಷತಾ ಸಾಧನಗಳು ಅತ್ಯಗತ್ಯವಾಗಿ ಬೇಕಾಗುತ್ತದೆ. ಗುಣಮಟ್ಟದ ಕೈಗವಸು, ಮಾಸ್ಕ್​, ನಿಲುವಂಗಿ (ಗೌನ್​)ಗಳನ್ನು ಅವರಿಗೆ ಒದಗಿಸುವುದು ಸರ್ಕಾರಗಳ ಕರ್ತವ್ಯ.

ಆದರೆ ಕರೊನಾ ವೈರಸ್​ ವ್ಯಾಪಕವಾಗಿ ಪ್ರಸರಣ ಆಗುತ್ತಿರುವಾಗ ಈ ಪಿಪಿಇ(ವೈಯಕ್ತಿಕ ಸುರಕ್ಷತಾ ಸಾಧನಗಳು) ಕಿಟ್​ಗಳ ಕೊರತೆಯೂ ಎದುರಾಗಿದೆ. ಅದೆಷ್ಟೋ ವೈದ್ಯರು ಪಿಪಿಇ ಕಿಟ್​​ಗಳಿಲ್ಲದೆ ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಿದ್ದಾರೆ. ತನ್ಮೂಲಕ ತಮ್ಮ ಜೀವವನ್ನೇ ಅಪಾಯದಲ್ಲಿ ಇಟ್ಟಿದ್ದಾರೆ.

ಬ್ರಿಟನ್​​ನಲ್ಲಿ ಕೂಡ ವೈದ್ಯಕೀಯ ಸಿಬ್ಬಂದಿಗೆ ಸ್ವರಕ್ಷಣಾ ನಿಲುವಂಗಿ (ಗೌನ್​)ಯ ಕೊರತೆ ಎದುರಾಗಿದ್ದು, ಅಲ್ಲಿನ ಆರೋಗ್ಯ ಇಲಾಖೆ ವೈದ್ಯರಿಗೆ ಒಂದು ಬದಲಿ ಮಾರ್ಗಗಳನ್ನು ಕಂಡುಕೊಳ್ಳುವಂತೆ ಸಲಹೆ ನೀಡಿದೆ ಎಂದು ಅಲ್ಲಿನ ಮಾಧ್ಯಮವೊಂದು ವರದಿ ಮಾಡಿದೆ.

ಬ್ರಿಟನ್​​ನಲ್ಲಿ ಆರೋಗ್ಯ ಸಿಬ್ಬಂದಿಗೆ ಅಗತ್ಯ ಇರುವ ಉದ್ದನೆಯ ಸ್ವರಕ್ಷಣಾ ನಿಲುವಂಗಿಯ ಕೊರತೆ ಉಂಟಾಗಿದೆ. ಶುಕ್ರವಾರ 55,000 ಗೌನ್​​ಗಳನ್ನು ಆಮದು ಮಾಡಿಕೊಳ್ಳಲಾಗಿದ್ದರೂ ಇದು ಸಾಕಾಗುತ್ತಿಲ್ಲ ಎಂದು ಆರೋಗ್ಯ ಇಲಾಖೆ ತಿಳಿಸಿದೆ.

ಬ್ರಿಟನ್​​ನ ಬಹುತೇಕ ಆಸ್ಪತ್ರೆಗಳಲ್ಲಿ ಈ ರಕ್ಷಣಾ ಗೌನ್​ಗಳು ಲಭ್ಯವಿಲ್ಲ. ಪೂರೈಕೆ ಆಗುತ್ತಿಲ್ಲ. ಹೀಗಿರುವಾಗ ಇಂಗ್ಲೆಂಡ್​ ಸಾರ್ವಜನಿಕ ಆರೋಗ್ಯ ಇಲಾಖೆ ಮಾರ್ಗಸೂಚಿಗಳಲ್ಲಿ ಬದಲಾವಣೆ ಮಾಡಿದ್ದು, ಕರೊನಾ ಪೀಡಿತರಿಗೆ ಚಿಕಿತ್ಸೆ ನೀಡುವಾಗ ಜಲನಿರೋಧಕವಾದ, ಶಸ್ತ್ರಚಿಕಿತ್ಸಾ ಗೌನ್​ಗಳನ್ನೇ ಬಳಸಿ ಎಂದು ಹೇಳಿದೆ. ಅಷ್ಟೇ ಅಲ್ಲ, ಪ್ಲಾಸ್ಟಿಕ್​ ಏಪ್ರನ್​ಗಳನ್ನೂ ಉಪಯೋಗಿಸಬಹುದು. ಬೇರೆ ಆಸ್ಪತ್ರೆಗಳಲ್ಲಿ ಹೆಚ್ಚಿಗೆ ಇದ್ದರೆ ಅದನ್ನು ತರಿಸಿಕೊಳ್ಳಬಹುದು ಎಂದು ಮಾರ್ಗಸೂಚಿಯಲ್ಲಿ ಹೇಳಲಾಗಿದೆ ಎಂದು ವರದಿಯಾಗಿದೆ.

ಅದೆಷ್ಟರ ಮಟ್ಟಿಗೆ ಕೊರತೆ ಕಾಡುತ್ತಿದೆ ಎಂದರೆ, ಏಕ-ಬಳಕೆ ಗೌನ್​​ಗಳನ್ನು ಮರು ಬಳಕೆ ಮಾಡಿ ಎಂದು ವೈದ್ಯರು, ನರ್ಸ್​ಗಳಿಗೆ ಸರ್ಕಾರ ಸೂಚಿಸುತ್ತಿದೆ. ಈ ಮಾರ್ಗಸೂಚಿಗಳ ಬಗ್ಗೆ ವೈದ್ಯಕೀಯ ಸಿಬ್ಬಂದಿ ಅಸಮಾಧಾನ ವ್ಯಕ್ತಪಡಿಸಿ, ಇದನ್ನು ಬದಲಿಸಿ ಎಂದು ಮನವಿ ಮಾಡಿದ್ದರೂ ಆರೋಗ್ಯ ಇಲಾಖೆ ಮಾನ್ಯ ಮಾಡುತ್ತಿಲ್ಲ.(ಏಜೆನ್ಸೀಸ್​)