ಪರಿಷತ್ಗೆ ಚುನಾವಣೆ ಮೂಲಕವೇ ಉದ್ಧವ್ ಆಯ್ಕೆ ಆಗಬೇಕೆಂದಿಲ್ಲ. ಖಾಲಿ ಇರುವ ಸ್ಥಾನಕ್ಕೆ ನಾಮ ನಿರ್ದೇಶನ ಮಾಡುವ ವಿವೇಚನಾಧಿಕಾರ ರಾಜ್ಯಪಾಲರಿಗಿದೆ. ಸಾಹಿತ್ಯ, ಕಲೆ, ವಿಜ್ಞಾನ, ಸಹಕಾರ ಚಳವಳಿ ಅಥವಾ ಸಾಮಾಜಿಕ ಸೇವೆಗಳ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ ವ್ಯಕ್ತಿಗಳನ್ನು ಗುರುತಿಸಿ ಸಂವಿಧಾನದ ಆರ್ಟಿಕಲ್ 171(5)ರ ಅಡಿ ರಾಜ್ಯಪಾಲರು ನಾಮ ನಿರ್ದೇಶನ ಮಾಡಬಹುದು. ರಾಜಕಾರಣವೂ ಸಾಮಾಜಿಕ ಸೇವೆ ವ್ಯಾಪ್ತಿಯಲ್ಲೇ ಬರುತ್ತದೆ ಎಂದು ಕೆಲ ನ್ಯಾಯಾಲಯಗಳೂ ತೀರ್ಪು ನೀಡಿವೆ. ಹೀಗಾಗಿ, ಉದ್ಧವ್ ನಾಮನಿರ್ದೇಶನಕ್ಕೆ ಅರ್ಹರಾಗಿದ್ದಾರೆ ಎಂದು ಮಹಾಮೈತ್ರಿ ಮುಖಂಡರು ಕೋರಿದ್ದಾರೆ. 78 ಸದಸ್ಯರುಳ್ಳ ಮಹಾರಾಷ್ಟ್ರ ಪರಿಷತ್ಗೆ 12 ನಾಮ ನಿರ್ದೇಶಿತ ಸದಸ್ಯರನ್ನು ನೇಮಿಸಬಹುದು. ಜೂನ್ 6ಕ್ಕೆ ಈ ಎಲ್ಲ 12 ಸ್ಥಾನಗಳ ಅವಧಿ ಪೂರ್ಣಗೊಳ್ಳಲಿದೆ. ಪರಿಷತ್ನಲ್ಲಿದ್ದ ಇಬ್ಬರು ಎನ್ಸಿಪಿ ಸದಸ್ಯರಾದ ರಾಹುಲ್ ನಾರ್ವೆಕರ್ ಮತ್ತು ರಾಮ್ ರಾವ್ ವಾದ್ಕೂಟ್ ವಿಧಾನಸಭೆ ಚುನಾವಣೆ ವೇಳೆ ಬಿಜೆಪಿ ಸೇರಿದ್ದರಿಂದ ಈ 2 ಖಾಲಿ ಸ್ಥಾನಗಳನ್ನು ಭರ್ತಿ ಮಾಡಬಹುದು. ಆದರೆ, ಖಾಲಿ ಇರುವ ಸ್ಥಾನಗಳ ಅವಧಿ 6 ತಿಂಗಳಿಗಿಂತ ಕಡಿಮೆಯಿದ್ದಾಗ ರಾಜ್ಯಪಾಲರಿಗೆ ವಿವೇಚನಾಧಿಕಾರದ ಮೂಲಕ ನಾಮನಿರ್ದೇಶನ ಮಾಡುವ ಅಧಿಕಾರ ಇರುವುದಿಲ್ಲ. ಆ ಅವಧಿ ಒಂದು ವರ್ಷ ಅಥವಾ ಅದಕ್ಕಿಂತ ಹೆಚ್ಚಿರಬೇಕಾಗುತ್ತದೆ ಎಂದು ಬಿಜೆಪಿ ಮುಖಂಡರು ವಾದಿಸುತ್ತಿದ್ದಾರೆ. ಬಹುಶಃ ಇದೇ ಕಾರಣಕ್ಕೆ ರಾಜ್ಯಪಾಲರು ಮಹಾಮೈತ್ರಿ ಮನವಿಗೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ ಎನ್ನಲಾಗುತ್ತಿದೆ. ಕಾನೂನು ತಜ್ಞ ಮತ್ತು ಕಾಂಗ್ರೆಸ್ ನಾಯಕ ಕಪಿಲ್ ಸಿಬಲ್, ‘ರಾಜ್ಯ ಕ್ಯಾಬಿನೆಟ್ ಶಿಫಾರಸಿಗೆ ರಾಜ್ಯಪಾಲರು ಸಮ್ಮತಿಸಲೇಬೇಕು’ ಎಂದು ಹೇಳುತ್ತಿದ್ದಾರೆ. ಈ ಗೊಂದಲಗಳಿಂದಾಗಿಯೇ, ಸಿಎಂ ಉದ್ಧವ್ ಠಾಕ್ರೆ ಅನಿವಾರ್ಯವಾಗಿ ಪ್ರಧಾನಿ ನರೇಂದ್ರ ಮೋದಿಗೆ ದೂರವಾಣಿ ಮೂಲಕ ಮಾತನಾಡಿ, ಬಿಕ್ಕಟ್ಟನ್ನು ನಿವಾರಣೆ ಮಾಡಿ ಎಂದು ವಿನಂತಿಸಿಕೊಂಡಿದ್ದಾರೆ.
