ಟ್ರಂಪ್​ ಸುಂಕ ಸಮರ: ಜಗತ್ತು ಕಾಡಿನ ಕಾನೂನಿಗೆ ಮರಳಬಾರದು, ಕ್ಸಿ-ಟ್ರಂಪ್ ಮಾತುಕತೆಗೂ ಮುನ್ನ China ಕೌಂಟರ್​

ಕೌಲಾಲಂಪುರ: ಜಗತ್ತು ವ್ಯಾಪಾರದ ವಿಷಯಕ್ಕೆ ಬಂದಾಗ ಕಾಡಿನ ನಿಯಮಕ್ಕೆ ಮರಳಬಾರದು ಎಂದು ಚೀನಾದ(China) ಪ್ರಧಾನಿ ಲಿ ಕ್ವಿಯಾಂಗ್ ಹೇಳಿದ್ದಾರೆ. ಅಲ್ಲದೆ, ಅಮೆರಿಕದ ಏಕಪಕ್ಷೀಯತೆಯನ್ನು ತೀವ್ರವಾಗಿ ಖಂಡಿಸಿದ್ದಾರೆ.

ಈ ಬಗ್ಗೆ ಕೌಲಾಲಂಪುರದಲ್ಲಿ ನಡೆದ ಪ್ರಾದೇಶಿಕ ಶೃಂಗಸಭೆಯಲ್ಲಿ ಮಾತನಾಡಿದ ಕ್ವಿಯಾಂಗ್, ಚೀನಾ ಸೇರಿದಂತೆ ಹಲವು ದೇಶಗಳ ಮೇಲೆ ಅಮೆರಿಕ ಅಧ್ಯಕ್ಷ ಟ್ರಂಪ್ ವಿಧಿಸಿರುವ ಸುಂಕಗಳನ್ನು ಉಲ್ಲೇಖಿಸಿ, ಆರ್ಥಿಕ ಜಾಗತೀಕರಣ ಮತ್ತು ಬಹುಧ್ರುವೀಯತೆಯನ್ನು ಬದಲಾಯಿಸಲಾಗದು ಎಂದು ಹೇಳಿದ್ದಾರೆ.

ಮುಂದುವರೆದು ಮಾತನಾಡಿದ ಕ್ವಿಯಾಂಗ್​, ಪ್ರಪಂಚವು ಕಾಡಿನ ಕಾನೂನಿಗೆ ಹಿಂತಿರುಗಬಾರದು. ಕಾಡಿನಲ್ಲಿ ಬಲಿಷ್ಠರು ದುರ್ಬಲರನ್ನು ಬೆದರಿಸುತ್ತಾರೆ ಎಂದಿದ್ದಾರೆ. ಅಲ್ಲದೆ, ಜಾಗತಿಕ ಮುಕ್ತ ವ್ಯಾಪಾರ ವ್ಯವಸ್ಥೆಗೆ ಬಲವಾದ ಬದ್ಧತೆಗೆ ಲಿ ಕರೆ ನೀಡಿದ್ದಾರೆ.

ಇದನ್ನೂ ಓದಿ: ವಿಮಾನ ನಿಲ್ದಾಣದಲ್ಲಿ ಬೆಂಕಿ: ಧಗಧಗನೆ ಉರಿದ ಏರ್​ ಇಂಡಿಯಾ ಬಸ್​ Delhi Airport

ಆಸಿಯಾನ್ ಶೃಂಗಸಭೆಯ ಹೊರತಾಗಿ ನಡೆದ ಸಭೆಯಲ್ಲಿ ಮಾತನಾಡಿದ ಲಿ, ಅಮೆರಿಕದ ಏಕಪಕ್ಷೀಯತೆ ಮತ್ತು ರಕ್ಷಣಾ ನೀತಿಯು ಅತಿರೇಕವಾಗುತ್ತಿದೆ. ಅಲ್ಲದೆ, ಈ ಪ್ರದೇಶಕ್ಕೆ ದೊಡ್ಡ ಅಪಾಯಗಳನ್ನು ಒಡ್ಡಿದೆ ಎಂದು ತಿಳಿಸಿದ್ದಾರೆ.

ಅಲ್ಲದೆ, ಮುಂದಿನ ದಿನಗಳಲ್ಲಿ ಟ್ರಂಪ್ ಮತ್ತು ಚೀನಾದ ಅಧ್ಯಕ್ಷ ಕ್ಸಿ, ಗುರುವಾರ ದಕ್ಷಿಣ ಕೊರಿಯಾದಲ್ಲಿ ಭೇಟಿಯಾಗಿ ತಮ್ಮ ನಡುವಿನ ವ್ಯಾಪಾರ ಯುದ್ಧವನ್ನು ಕೊನೆಗೊಳಿಸುವ ಒಪ್ಪಂದಕ್ಕೆ ಬರಲು ಪ್ರಯತ್ನಿಸಲಿದ್ದಾರೆ. ಯುಎಸ್​ನಲ್ಲಿ ಟ್ರಂಪ್​ ಅಧಿಕಾರಕ್ಕೆ ಬಂದ ನಂತರ ಮೊದಲ ಬಾರಿಗೆ ಕ್ಸಿ ಮುಖಾಮುಖಿ ಮಾತುಕತೆ ನಡೆಸಲಿದ್ದಾರೆ.

ಟ್ರಂಪ್ ಮಲೇಷ್ಯಾಕ್ಕೆ ಆಗಮಿಸುವ ಮೊದಲು, ಬೆಸೆಂಟ್ ಮತ್ತು ಚೀನಾದ ಉಪಾಧ್ಯಕ್ಷ ಹೆ ಲಿಫೆಂಗ್ ಎರಡು ದಿನಗಳ ವ್ಯಾಪಾರ ಮಾತುಕತೆ ನಡೆಸಿ, ನವೆಂಬರ್ 1 ರಿಂದ ಜಾರಿಗೆ ಬರಲಿರುವ ಹೆಚ್ಚುವರಿ 100 ಪ್ರತಿಶತ ಸುಂಕಗಳನ್ನು ತಪ್ಪಿಸಲು ಒಪ್ಪಂದವನ್ನು ಕೋರಿದ್ದಾರೆ. ಬೀಜಿಂಗ್ ಮತ್ತು ವಾಷಿಂಗ್ಟನ್‌ ನಡುವೆ ಸಮಲೋಚನೆ ನಡೆಯುತ್ತಿದ್ದು ಚೌಕಟ್ಟನ್ನು ಒಪ್ಪಲಾಗಿದೆ ಎಂದು ದೃಢಪಡಿಸಿದ್ದಾರೆ ಎಂದು ವರದಿಯಾಗಿದೆ.

ನನಗೆ ಅಧ್ಯಕ್ಷ ಕ್ಸಿ ಬಗ್ಗೆ ತುಂಬಾ ಗೌರವವಿದೆ - ಟ್ರಂಪ್

ಅಮೆರಿಕದ ಅಧ್ಯಕ್ಷರು ತಮ್ಮ ಏಷ್ಯನ್ ಪ್ರವಾಸದ ಕೊನೆಯ ಹಂತದಲ್ಲಿ ಟೋಕಿಯೊಗೆ ಬಂದಿಳಿದರು. ಅಲ್ಲದೆ, ಮಾರ್ಗಮಧ್ಯೆ, ಗುರುವಾರ ಕ್ಸಿ ಅವರನ್ನು ಭೇಟಿಯಾದಾಗ ಒಪ್ಪಂದದ ಭರವಸೆ ಇದೆ ಎಂದು ಟ್ರಂಪ್​ಹೇಳಿದರು. ನನಗೆ ಅಧ್ಯಕ್ಷ ಕ್ಸಿ ಬಗ್ಗೆ ತುಂಬಾ ಗೌರವವಿದೆ ಮತ್ತು ನಾವು ಒಂದು ಒಪ್ಪಂದದೊಂದಿಗೆ ಹೊರಬರಲಿದ್ದೇವೆ ಎಂದು ನಾನು ಭಾವಿಸುತ್ತೇನೆ" ಎಂದು ಟ್ರಂಪ್ ಸುದ್ದಿಗಾರರಿಗೆ ತಿಳಿಸಿದರು. 2026 ರ ಮೊದಲ ಭಾಗದಲ್ಲಿ ಚೀನಾಕ್ಕೆ ಹೋಗುವ ಗುರಿಯನ್ನು ಹೊಂದಿರುವುದಾಗಿ ಹೇಳಿದರು. (ಏಜೆನ್ಸೀಸ್)

https://www.vijayavani.net/pak-afghan-peace-talks-no-agreement-on-third-day-pakistan-says-it-will-not-accept-giving-sanctuary-to-terrorists