ದೇಶದ ಸೇನಾಪಡೆಗಳ ಮುಖ್ಯಸ್ಥರು ಸೇರಿ 13 ಜನರು ಹೆಲಿಕಾಪ್ಟರ್ ದುರಂತದಲ್ಲಿ ಮೃತಪಟ್ಟಿರುವುದು ದುಃಖದ ಹಾಗೂ ಆಘಾತಕಾರಿ ಸಂಗತಿ. ಇಂಥದ್ದೊಂದು ಸುದ್ದಿಯನ್ನು ಯಾರೂ ನಿರೀಕ್ಷಿಸಿರುವುದಿಲ್ಲ. ಏಕೆಂದರೆ ವಿಐಪಿಗಳು ಸಂಚರಿಸುವ, ಅದರಲ್ಲೂ ಸೇನಾ ಪಡೆಗಳ ಮುಖ್ಯಸ್ಥರು ಪ್ರಯಾಣಿಸುವ ಹೆಲಿಕಾಪ್ಟರ್ನಲ್ಲಿ ದೋಷ ಇರುವುದನ್ನು ಊಹಿಸಿಕೊಳ್ಳಲೂ ಅಸಾಧ್ಯ. ಪ್ರತಿ ಬಾರಿ ಹೆಲಿಕಾಪ್ಟರ್ ಹಾರಾಟ ನಡೆಸಬೇಕಾದರೂ ‘ಹಾರಾಟ ಪೂರ್ವ ತಪಾಸಣೆ (ಪ್ರಿ ಫ್ಲೈಟ್ ಚೆಕ್) ನಡೆಸಲಾಗುತ್ತದೆ. ಹೆಲಿಕಾಪ್ಟರ್ನ ವಿವಿಧ ಭಾಗಗಳ ಕಾರ್ಯಕ್ಷಮತೆಯನ್ನು ಸಂಪೂರ್ಣ ತಪಾಸಣೆ ನಡೆಸಿ ಸರಿಯಿದ್ದರೆ ಪ್ರಮಾಣೀಕರಿಸಲಾಗುತ್ತದೆ. ಇಷ್ಟೇ ಅಲ್ಲದೆ ವಿಐಪಿಗಳ ಹಾರಾಟ ನಡೆಯುವಾಗ, ಒಂದು ತಂಡ ನಡೆಸಿದ ತಪಾಸಣೆಯನ್ನು ಮತ್ತೊಂದು ತಂಡ ನಡೆಸಿ ಮರುಖಾತ್ರಿ ಮಾಡುತ್ತದೆ. ಇಷ್ಟೆಲ್ಲ ಪರೀಕ್ಷೆಗಳ ನಂತರ ಹಸಿರು ನಿಶಾನೆ ಸಿಕ್ಕರೆ ಮಾತ್ರ ಹೆಲಿಕಾಪ್ಟರ್ ಹಾರಾಟ ನಡೆಸುತ್ತದೆ. ಉಪಕರಣಗಳು ಮಾತ್ರವಲ್ಲದೆ, ವಿಮಾನ ಇಂಧನ(ಎಟಿಎಫ್) ಕಲಬೆರಕೆ ಆಗಿರಬಹುದೆ ಎಂಬುದನ್ನು ಖಾತ್ರಿಪಡಿಸಿಕೊಳ್ಳಲು ಎರಡು ಬಾರಿ ಪರೀಕ್ಷೆ ಮಾಡಲಾಗುತ್ತದೆ.
