ವಿಕಲತೆಗೆ ಸೆಡ್ಡು ಹೊಡೆದ ಈ ಸಂಸಾರ ಕಾಣಸಿಗುವುದು ಹರಿಹರ ತಾಲೂಕಿನ ಅಮರಾವತಿ ಕಾಲನಿಯ ಆಂಜನೇಯ ಬಡಾವಣೆಯಲ್ಲಿ. ಬಂಡ್ರಿ ನಾಗರಾಜ ಈ ಮನೆಯ ಯಜಮಾನ. ಪೋಲಿಯೋ ಬಾಧಿತರಾಗಿ ಜನ್ಮತಃ ಎರಡೂ ಕಾಲುಗಳ ಸ್ವಾಧೀನ ಇಲ್ಲದಿದ್ದರೂ ಮನೆ ಬಳಿ ಬೀಡಿ ವ್ಯಾಪಾರ ಮಾಡುತ್ತಾರೆ. ದಾವಣಗೆರೆಯಿಂದ ಸೊಪ್ಪು ಖರೀದಿಸಿ ತಂದು ಮಾರಾಟ ಮಾಡುತ್ತಾರೆ. ಇವರ ದುಡಿಮೆ ಜತೆಗೆ ನಾಲ್ವರು ಸದಸ್ಯರಿಗೆ ಸಿಗುವ ಮಾಸಾಶನವೇ ಈ ಕುಟುಂಬಕ್ಕೆ ಆಧಾರ.ಮನೆಯೊಡತಿ, ಅಂಧೆ ಮಲ್ಲಮ್ಮಗೆ ಅಡುಗೆ ಮನೆಯ ಉಸಾಬರಿ ಬಿಟ್ಟರೆ ಬೇರಾವ ಪರಿಚಯವಿಲ್ಲ. ಈ ದಂಪತಿಗೆ ಒಟ್ಟು ಐವರು ಮಕ್ಕಳು. ಈ ಪೈಕಿ ಮೂವರು ಹೆಣ್ಣುಮಕ್ಕಳಿಗೆ ದೃಷ್ಟಿಭಾಗ್ಯವಿಲ್ಲ. ಮಗ ಕಾರ್ತೀಕ (17), ಮಗಳು ರೇಣುಕಾ (10) ಮಾತ್ರ ಆರೋಗ್ಯವಂತರಾಗಿದ್ದು ಕ್ರಮವಾಗಿ ಎಸ್ಸೆಸ್ಸೆಲ್ಸಿ ಹಾಗೂ ಐದನೇ ತರಗತಿ ಓದುತ್ತಿದ್ದಾರೆ. ಹಿರಿಮಗಳು ಮಂಜುಳಾ (20) ಮತ್ತು ಶಾರದಾ (19) ಎಸ್ಸೆಸ್ಸೆಲ್ಸಿ, ಪಿಯುಸಿಯಲ್ಲಿ ಶೇ.80ಕ್ಕೂ ಹೆಚ್ಚು ಅಂಕ ಗಳಿಸಿ, ದಾವಣಗೆರೆಯ ಮಹಿಳಾ ಕಾಲೇಜಲ್ಲಿ ಪ್ರಥಮ ಬಿಎ ಓದುತ್ತಿದ್ದಾರೆ. ಇಬ್ಬರ ವ್ಯಾಸಂಗಕ್ಕೆ ಸ್ಕಾಲರ್ಶಿಪ್ ಹಣವೇ ಜಂಘಾಬಲ. ಪರಿಶ್ರಮಕ್ಕೆ ಇಲಾಖೆಯಿಂದ ಸಿಕ್ಕ ಟಾಕಿಂಗ್ ಲ್ಯಾಪ್ಗಳ ಮೂಲಕವೇ ನಿತ್ಯಾಭ್ಯಾಸ ಮಾಡುತ್ತಿದ್ದಾರೆ. ಮತ್ತೊಬ್ಬ ಬಾಲಕಿ ದೇವಿಕಾ (15) ಸರ್ಕಾರಿ ಅಂಧ ಹೆಣ್ಣುಮಕ್ಕಳ ವಸತಿ ಶಾಲೆಯಲ್ಲಿ ಎಂಟನೇ ತರಗತಿ ಓದುತ್ತಿದ್ದಾಳೆ. ‘ನಾವು ಮೂವರೂ ಹಾಡುತ್ತೇವೆ. ಸಂಗೀತದಲ್ಲಿ ಆಸಕ್ತಿ ಇದೆ. ಅದನ್ನು ಮುಂದುವರಿಸುವ ಅವಕಾಶ ಸಿಕ್ಕಿಲ್ಲ. ಬಿಎ, ಬಿಇಡಿ ಮಾಡುವಾಸೆ ಇದೆ’ ಎನ್ನುತ್ತಾಳೆ ಮಂಜುಳಾ.
