ಭಗವಾನ್ ಸೂರ್ಯ ದೇವರು ಹಾಗೂ ಛಾಯಾದೇವಿಯ ಪುತ್ರನಾಗಿ ಶನಿ ದೇವರು ಜನಿಸಿದ್ದು ಜ್ಯೇಷ್ಠ ಮಾಸದ ಅಮಾವಾಸ್ಯೆ ದಿನದಂದು ಅಂದರೆ ಈ ಬಾರಿ ಜೂನ್ 10. ಒಂದು ರಾಶಿಯಲ್ಲಿ ಶನಿ ದೇವರು 2.5 ವರುಷ ಇರುತ್ತಾನೆ ಹಾಗೂ ಇರುವ ರಾಶಿ, ಅದರ ಹಿಂದಿನ ರಾಶಿ ಹಾಗೂ ಮುಂದಿನ ರಾಶಿಯವರ ಮೇಲೆ ವಿಶೇಷ ಪ್ರಭಾವ ಇರುತ್ತದೆ. ಅದಕ್ಕಾಗಿಯೇ ನಿಮ್ಮ ರಾಶಿಯ ಹಿಂದಿನ ರಾಶಿಗೆ ಸ್ವಾಮಿಯ ಪ್ರವೇಶ ಆದಲ್ಲಿ ಅಲ್ಲಿ 2.5 ವರ್ಷ, ನಂತರ ನಿಮ್ಮ ರಾಶಿಯಲ್ಲಿ 2.5 ವರ್ಷ ಹಾಗೂ ಮುಂದಿನ ರಾಶಿಯಲ್ಲಿ 2.5 ವರ್ಷ ಎಲ್ಲ ಸೇರಿ 7.5 ವರ್ಷ ಸ್ವಾಮಿಯ ಪ್ರಭಾವ ನಿಮ್ಮ ಮೇಲೆ ಇರುತ್ತದೆ. ಇದನ್ನೇ ಹಿಂದಿ ಭಾಷೆಯಲ್ಲಿ "ಸಾಡೆಸಾತ್' ಪ್ರಭಾವ ಎಂದು ಕರೆಯುತ್ತಾರೆ. ಇನ್ನು ನಿಮ್ಮ ರಾಶಿಯಿಂದ 4ರಲ್ಲಿ ಇದ್ದರೆ ಅರ್ಧಾಷ್ಟಮ ಶನಿ, 5ರಲ್ಲಿ ಇದ್ದಾಗ ಪಂಚಮ ಶನಿ ಹಾಗೂ 8ನೇ ರಾಶಿಯಲ್ಲಿ ಇದ್ದಾಗ ಅಷ್ಟಮ ಶನಿ ಪ್ರಭಾವ ಎಂದು ಪರಿಗಣಿಸಬೇಕು.
