Jananayagan Release - ಚೆನ್ನೈಗಿಂತಲೂ ಬೆಂಗಳೂರಿನಲ್ಲೇ ತಮಿಳಿನ ಜನನಾಯಗನ್ ಅಬ್ಬರ ಜೋರು!

Jananayagan -

ತಮಿಳು ನಾಡು ಸಿಎಂ ವಿಜಯ್​ ನಟಿಸಿರುವ ಕೊನೆಯ ಸಿನಿಮಾ, ಎಚ್​. ವಿನೋದ್​ ನಿರ್ದೇಶನದ, ಕನ್ನಡದ ಕೆವಿಎನ್​ ಪ್ರೊಡಕ್ಷನ್ಸ್​ ಬ್ಯಾನರ್​ನಲ್ಲಿ ವೆಂಕಟ್​ ಕೆ. ನಾರಾಯಣ್​ ನಿರ್ಮಿಸಿರುವ ಪೊಲಿಟಿಕಲ್​ ಆ್ಯಕ್ಷನ್​ ಡ್ರಾಮಾ "ಜನನಾಯಗನ್​' ಇದೇ ಗುರುವಾರ (ಜು. 23) ವಿಶ್ವಾದ್ಯಂತ ರಿಲೀಸ್​ ಆಗಲಿದೆ. ದೊಡ್ಡ ಸಿನಿಮಾಗಳ ರಿಲೀಸ್​ ದಿನಾಂಕ ಮುಹೂರ್ತದ ದಿನ ಅಥವಾ ಬಿಡುಗಡೆಗೂ ಆರೇಳು ತಿಂಗಳು ಮುನ್ನ ಘೋಷಣೆಯಾಗುವುದು ಸಾಮಾನ್ಯ. ಆದರೆ, ಸೆನ್ಸಾರ್​ ಸಮಸ್ಯೆಗೆ ಒಳಗಾಗಿದ್ದ "ಜನನಾಯಗನ್​' ಬಿಡುಗಡೆ ದಿನಾಂಕ ಕೇವಲ ಎರಡು ವಾರ ಮುನ್ನವಷ್ಟೇ ಘೋಷಣೆಯಾಗಿದ್ದು, ಕಳೆದ ಗುರುವಾರ (ಜು. 16)ರಿಂದ ಆನ್​ಲೈನ್​ ಬುಕ್ಕಿಂಗ್​ ಪ್ರಾರಂಭವಾಗಿದೆ. ಭಾರತದಲ್ಲಿ ನಾಲ್ಕು ಸಾವಿರ ಸ್ಕ್ರೀನ್ಸ್​ ಸೇರಿ ವಿಶ್ವಾದ್ಯಂತ ಎಂಟು ಸಾವಿರಕ್ಕೂ ಅಧಿಕ ಸ್ಕ್ರೀನ್​ಗಳಲ್ಲಿ ಸಿನಿಮಾ ರಿಲೀಸ್​ ಆಗಲಿದೆ. 183 ನಿಮಿಷಗಳ ಈ ಸುದೀರ್ಘ ಚಿತ್ರಕ್ಕೆ ಸೆನ್ಸಾರ್​ ಮಂಡಳಿಯು "ಎ' ಪ್ರಮಾಣಪತ್ರ ನೀಡಿದೆ. ಚಿತ್ರದಲ್ಲಿ ವಿಜಯ್​ಗೆ ಪೂಜಾ ಹೆಗ್ಡೆ ನಾಯಕಿಯಾಗಿದ್ದು, ಬಾಬಿ ಡಿಯೋಲ್​, ಮಮಿತಾ ಬೈಜು, ಪ್ರಕಾಶ್​ ರಾಜ್​, ಗೌತಮ್​ ಮೆನನ್​, ಪ್ರಿಯಾಮಣಿ ಮುಖ್ಯ ಭೂಮಿಕೆಯಲ್ಲಿ ನಟಿಸಿದ್ದಾರೆ.

ತಮಿಳುನಾಡು ಮಾತ್ರವಲ್ಲದೇ ಕರ್ನಾಟಕದಲ್ಲೂ ಕೆಲವೆಡೆ ಬೆಳಗ್ಗೆ 6 ಗಂಟೆಗೇ "ಜನನಾಯಗನ್​' ಪ್ರದರ್ಶನ ಆರಂಭವಾಗಲಿದೆ. ಮುಂಜಾನೆ ಸ್ಪೆಷಲ್​ ಶೋಗಳಿಗೆ ₹800ರಿಂದ ₹2400ವರೆಗೆ ಟಿಕೆಟ್​ ದರ ನಿಗದಿಪಡಿಸಲಾಗಿದ್ದು, ನಂತರದ ಶೋಗಳ ದರ ಕಡಿಮೆ ಇರಲಿದೆ. ಬೆಂಗಳೂರಿನಲ್ಲಿ ಜನನಾಯಗನ್​ ಸದ್ಯ 95ಕ್ಕೂ ಹೆಚ್ಚು ಸ್ಕ್ರೀನ್​ಗಳಲ್ಲಿ 470ಕ್ಕೂ ಅಧಿಕ ಶೋಗಳು ಇರಲಿವೆ. ಇದು ತಮಿಳು ಅವತರಣಿಕೆ ಮಾತ್ರವಾಗಿದ್ದು, ರಿಲೀಸ್​ ಹತ್ತಿರವಾದಂತೆ ತಮಿಳು, ಕನ್ನಡ ಸೇರಿ ಇತರೆ ಭಾಷೆಗಳಲ್ಲಿ ಸ್ಕ್ರೀನ್​ ಮತ್ತು ಶೋಗಳ ಸಂಖ್ಯೆ ಏರಿಕೆಯಾಗುವ ನಿರೀಕ್ಷೆಯಿದೆ.

ಸಾಮಾನ್ಯವಾಗಿ ಪ್ರಾದೇಶಿಕ ಸಿನಿಮಾಗಳಿಗೆ (ಕರ್ನಾಟಕ ಹೊರತುಪಡಿಸಿ!) ಆಯಾ ರಾಜ್ಯಗಳಲ್ಲಷ್ಟೇ ಮುಂಜಾನೆ 6 ಗಂಟೆಗೆ ಶೋಗಳನ್ನು ನೀಡಲಾಗುತ್ತದೆ. ಕೆಲವೊಮ್ಮೆ ಬಾಲಿವುಡ್​ ಚಿತ್ರಗಳಿಗೆ ವಿವಿಧ ರಾಜ್ಯಗಳಲ್ಲಿ ಬೆಳಗಿನ ಶೋಗಳನ್ನು ನೀಡಿದ್ದಾರೆ. ಆದರೆ, ಇದೇ ಮೊದಲ ಬಾರಿಗೆ "ಜನನಾಯಗನ್​' ಚೆನ್ನೈ, ಬೆಂಗಳೂರು ಮಾತ್ರವಲ್ಲ ದೆಹಲಿ, ಮುಂಬೈ, ಪುಣೆ, ಅಹಮದಾಬಾದ್​, ಕೊಚ್ಚಿ, ಕೋಲ್ಕತ್ತಾ ಸೇರಿ ಹಲವು ನಗರಗಳಲ್ಲಿ ಬೆಳಗ್ಗೆ 6 ಗಂಟೆಗೆ ಪ್ರದರ್ಶನ ನೀಡಿರುವುದು ವಿಶೇಷ.

ಬೆಂಗಳೂರಿನಲ್ಲಿ ಬೆಳಗ್ಗೆ 6 ಗಂಟೆಯಿಂದಲೇ ಶೋಗಳು ಪ್ರಾರಂಭವಾಗುತ್ತಿದ್ದರೆ, ಅತ್ತ ಚೆನ್ನೈನಲ್ಲಿ ಬೆ. 9ಗಂಟೆಯಿಂದ ಶೋಗಳನ್ನು ಪ್ಲ್ಯಾನ್​ ಮಾಡಲಾಗಿದೆ. ಹಾಗೇ ಬೆಂಗಳೂರಿನಲ್ಲಿ ಸಿಂಗಲ್​ ಸ್ಕ್ರೀನ್​ಗಳಲ್ಲಿ ಟಿಕೆಟ್​ ದರ ₹800ರಿಂದ ಶುರುವಾಗಿದ್ದು, ಚೆನ್ನೈನಲ್ಲಿ ಕೇವಲ ₹54.35 ಟಿಕೆಟ್​ ದರ ನಿಗದಿಪಡಿಸಲಾಗಿದೆ. ಬೆಂಗಳೂರು ಮಲ್ಟಿಪ್ಲೆಕ್ಸ್​ಗಳಲ್ಲಿ ಅತಿ ಹೆಚ್ಚು ಎಂದರೆ ₹2400 ಟಿಕೆಟ್​ ದರವಿದ್ದು, ಚೆನ್ನೈ ಮಲ್ಟಿಪ್ಲೆಕ್ಸ್​ಗಳಲ್ಲಿ ಕೇವಲ ₹190ಕ್ಕೆ ನಿಗದಿ ಮಾಡಲಾಗಿದೆ. ಹೀಗಾಗಿ ತಮಿಳು ಚಿತ್ರಕ್ಕೆ ತಮಿಳುನಾಡಿನಲ್ಲೇ ನೀಡದಿರುವ ಮಾನ್ಯತೆಯನ್ನು ಕರ್ನಾಟಕದಲ್ಲಿ ನೀಡುತ್ತಿರುವ ಬಗ್ಗೆ ಜಾಲತಾಣದಲ್ಲಿ ಚರ್ಚೆಗಳು ಶುರುವಾಗಿವೆ.

ಇನ್ನು "ಜನನಾಯಗನ್​' ಚಿತ್ರವನ್ನು ನಿರ್ಮಿಸಿ, ವಿತರಿಸುತ್ತಿರುವ ಕೆವಿಎನ್​ ಪ್ರೊಡಕ್ಷನ್ಸ್​ ಸಂಸ್ಥೆಯೇ ಕನ್ನಡದ "ಕರಾವಳಿ'ಯನ್ನೂ ವಿತರಿಸುತ್ತಿದೆ. ಹೀಗಿರುವಾಗ ಕರ್ನಾಟಕದಲ್ಲಿ ಕನ್ನಡ ಚಿತ್ರಕ್ಕೆ ಸಮಸ್ಯೆ ಆಗುವುದಿಲ್ಲವೇ ಎಂದರೆ, ಕೆವಿಎನ್​ನ ಕ್ರಿಯೇಟಿವ್​ ಹೆಡ್​ ಸುಪ್ರೀತ್​, "ಕನ್ನಡದ ಎರಡು ದೊಡ್ಡ ಸಿನಿಮಾಗಳು ಬಂದಾಗ ಥಿಯೇಟರ್​ ಸಮಸ್ಯೆ ಆಗುತ್ತದೆ. ಆದರೆ, ಕನ್ನಡದಲ್ಲಿ ಒಂದು ದೊಡ್ಡ ಸಿನಿಮಾ ಜತೆಗೆ ಪರಭಾಷೆಯ ಬಿಗ್​ ಬಜೆಟ್​ ಚಿತ್ರ ಬಂದರೆ ಸಮಸ್ಯೆ ಆಗುವುದಿಲ್ಲ. "ಧುರಂಧರ್​ 2' ಮತ್ತು "ಲವ್​ ಮಾಕ್ಟೇಲ್​ 3' ಚಿತ್ರಗಳು ಅದಕ್ಕೆ ಉದಾಹರಣೆ. ಕರ್ನಾಟಕದಲ್ಲಿ "ಜನನಾಯಗನ್​' ತಮಿಳು ವರ್ಷನ್​ಗೆ 150ರಿಂದ 170 ಸ್ಕ್ರೀನ್ಸ್​ ಸಾಕು. ಉಳಿದಂತೆ ತೆಲುಗು, ಕನ್ನಡ ಮತ್ತು ಹಿಂದಿ ವರ್ಷನ್​ಗೆ ಕೆಲ ಸ್ಕ್ರೀನ್​ಗಳು ಬೇಕಾಗುತ್ತವೆ. ಇನ್ನುಳಿದ ಸ್ಕ್ರೀನ್​ಗಳಲ್ಲಿ "ಕರಾವಳಿ' ಪ್ಲ್ಯಾನ್​​ ಮಾಡಲಿದ್ದೇವೆ' ಎಂದು ಮಾಹಿತಿ ನೀಡುತ್ತಾರೆ.