ಭುವನಕ್ಕೇ ಒಡೆಯನಾದರೂ, ಜನ್ಮಭೂಮಿಯಲ್ಲಿ ಸ್ವಂತಕ್ಕೊಂದು ಮಂದಿರವಿಲ್ಲದೆ ಶತಮಾನಗಳ ‘ವನವಾಸ’ ಅನುಭವಿಸಿದ್ದ ಪ್ರಭು ರಾಮಚಂದ್ರ ಕೊನೆಗೂ ಭವ್ಯ ಮಂದಿರದಲ್ಲಿ ವಿರಾಜಮಾನನಾಗಿದ್ದಾನೆ. ಹಲವು ದಶಕಗಳಿಂದ ಪುಟ್ಟ ಗುಡಾರದಲ್ಲಿದ್ದ ಬಾಲರಾಮ ಕೊನೆಗೂ ಅಯೋಧ್ಯೆಯಲ್ಲಿ ಭವ್ಯ, ದಿವ್ಯ ಮಂದಿರದಲ್ಲಿ ಪುನಃ ಪ್ರತಿಷ್ಠಾಪನೆಗೊಂಡಿದ್ದು, ಕೋಟ್ಯಂತರ ರಾಮಭಕ್ತರ ಪ್ರಾರ್ಥನೆ ಫಲಿಸಿದೆ. ಪ್ರಧಾನಿ ನರೇಂದ್ರ ಮೋದಿ ಅವರ ಯಾಜಮಾನ್ಯದಲ್ಲಿ ಸೋಮವಾರ ಪ್ರಾಣಪ್ರತಿಷ್ಠಾಪನೆ ಸಂಪನ್ನಗೊಳ್ಳುತ್ತಿದ್ದಂತೆಯೇ ಬಾಲರಾಮನ ದಿವ್ಯದರ್ಶನವನ್ನು ನೂರಾರು ಕೋಟಿ ಕಂಗಳು ಕಣ್ತುಂಬಿಕೊಂಡವು. ಅಯೋಧ್ಯೆಯಲ್ಲಿ 8000ಕ್ಕೂ ಅಧಿಕ ಗಣ್ಯರು, ಸಹಸ್ರಾರು ಭಕ್ತರು ಹಾಜರಿದ್ದರೆ, ನೂರಾರು ದೇಶಗಳ ಭಕ್ತರು ತಾವಿದ್ದಲ್ಲಿಂದಲೇ ಕಾರ್ಯಕ್ರಮ ವೀಕ್ಷಿಸಿದರು. ಮೆಕ್ಸಿಕೋ ಸೇರಿ ವಿವಿಧೆಡೆ ರಾಮಮಂದಿರಗಳು ಉದ್ಘಾಟನೆಗೊಂಡವು. ದೇಶಾದ್ಯಂತ ರಾಮತಾರಕ ಯಜ್ಞ, ವಿಶೇಷ ಪೂಜೆ, ಹೋಮ-ಹವನ ನಡೆಸಲಾಯಿತು.
