ಗಡಿ ತಂಟೆ ಇತ್ಯರ್ಥಕ್ಕೆ 3 ಸೂತ್ರ : ವಿವಾದಿತ ಪ್ರದೇಶದಿಂದ ಸೇನೆ ಹಿಂಪಡೆಯಲು ಭಾರತ-ಚೀನಾ ಸಮ್ಮತಿ

ನವದೆಹಲಿ: ಪೂರ್ವ ಲಡಾಖ್​ನ ಎಲ್​ಎಸಿ ಗಡಿಯಲ್ಲಿ ಕಳೆದ ಕೆಲ ತಿಂಗಳುಗಳಿಂದ ನಡೆಯುತ್ತಿರುವ ತಿಕ್ಕಾಟವನ್ನು ಕೊನೆಗೊಳಿಸಲು ಭಾರತೀಯ ಸೇನೆ ಹಾಗೂ ಚೀನಾ ಸೇನೆ ಸಹಮತಕ್ಕೆ ಬಂದಿವೆ ಎಂದು ಸೇನೆಯ ಉನ್ನತ ಮೂಲಗಳಿಂದ ತಿಳಿದುಬಂದಿದೆ.

ಕಳೆದ ಮೇ ತಿಂಗಳಿನಲ್ಲಿ ವಿವಾದವೇರ್ಪಟ್ಟಿದ್ದ ಪ್ರದೇಶವನ್ನು ಮೂರು ಹಂತಗಳಲ್ಲಿ ತೊರೆಯಲು ಉಭಯ ಸೇನಾಪಡೆಗಳು ಒಪ್ಪಿಗೆ ಸೂಚಿಸಿವೆ. ನವೆಂಬರ್ 6ರಂದು ಚುಶುಲ್​ನಲ್ಲಿ ನಡೆದ ಕೋರ್ ಕಮಾಂಡರ್ ಮಟ್ಟದ ಸಭೆಯಲ್ಲಿ ಈ ಕುರಿತು ನಿರ್ಣಯ ಕೈಗೊಳ್ಳಲಾಗಿದ್ದು, ಮುಂದಿನ ಏಪ್ರಿಲ್ ವೇಳೆ ಉಭಯ ಪಡೆಗಳು ಯಾವ್ಯಾವ ಪ್ರದೇಶಗಳಲ್ಲಿದ್ದವೋ ಅಲ್ಲಿಗೆ ಮರಳಲು ಒಪ್ಪಿಗೆ ನೀಡಲಾಗಿದೆ ಎಂದು ತಿಳಿದುಬಂದಿದೆ. ವಿದೇಶಾಂಗ ಸಚಿವಾಲಯದ ಜಂಟಿ ಕಾರ್ಯದರ್ಶಿ ನವೀನ್ ಶ್ರೀವಾತ್ಸವ ಮತ್ತು ಮಿಲಿಟರಿ ಕಾರ್ಯಾಚರಣೆಗಳ ನಿರ್ದೇಶನಾಲಯದ ಬ್ರಿಗೇಡಿಯರ್ ಘಾಯ್ ಈ ಸಭೆಯಲ್ಲಿ ಭಾಗವಹಿಸಿದ್ದರು. ಆದಾಗ್ಯೂ ಈ ಕುರಿತು ಅಧಿಕೃತವಾಗಿ ಉಭಯ ಸೇನೆಗಳು ಯಾವುದೇ ಲಿಖಿತ ಒಪ್ಪಂದ ಮಾಡಿಕೊಂಡಿಲ್ಲ ಎಂದು ಮೂಲಗಳು ತಿಳಿಸಿವೆ. ಎಲ್​ಎಸಿಯ ವಿವಾದಿತ ಪ್ರದೇಶದಿಂದ ಉಭಯ ಸೇನೆಗಳು ಮುಂದಿನ ವಾರ 3 ಹಂತಗಳಲ್ಲಿ ಯುದ್ಧ ಟ್ಯಾಂಕ್​ಗಳು, ಶಸ್ತ್ರಸಜ್ಜಿತ ವಾಹನಗಳು ಹಾಗೂ ಸೇನಾಪಡೆಗಳನ್ನು ಹಿಂಪಡೆಯಲಿವೆ.

ಗಲ್ವಾನ್ ಕಣಿವೆ ವಿವಾದದ ಹಾದಿ * ಮೇ 5 ರಂದು ಪೂರ್ವ ಲಡಾಖ್​ನಲ್ಲಿ ಉಭಯ ದೇಶಗಳ ಸುಮಾರು 200 ಸೈನಿಕರು ಮುಖಾಮುಖಿಯಾಗಿ, ಕೈಕೈ ಮಿಲಾಯಿಸಿದ್ದರು. * ಮೇ 9 ರಂದು ಉತ್ತರ ಸಿಕ್ಕಿಂನಲ್ಲಿ ಉಭಯ ಕಡೆಗಳ 150 ಸೈನಿಕರು ಮಧ್ಯೆ ಘರ್ಷಣೆ ನಡೆದಿತ್ತು. * ಚೀನಾ ಲಡಾಖ್ ಗಡಿಗೆ ಹೆಲಿಕಾಪ್ಟರ್​ಗಳನ್ನು ಕಳುಹಿಸುವ ಮೂಲಕ ಪರಿಸ್ಥಿತಿಯ ಕಾವನ್ನು ಏರಿಸಿತು. * ಬಳಿಕ ಉಭಯ ಸೇನೆಗಳ ಅಧಿಕಾರಿಗಳ ಮಾತುಕತೆಯ ಅನ್ವಯ ವಿವಾದಿತ ಪ್ರದೇಶದಿಂದ ಎರಡೂ ಸೇನೆಗಳು ಹಿಂದಿರುಗಲು ಒಪ್ಪಿದವು. * ಮಾತುಕತೆಯ ಅನ್ವಯ ಚೀನಾ ಸೇನೆ ಹಿಂದಿರುಗಿದೆ ಎಂಬುದನ್ನು ಖಚಿತ ಪಡಿಸಿಕೊಳ್ಳಲು ಜೂನ್ 15ರಂದು ಭಾರತದ ಕರ್ನಲ್ ನೇತೃತ್ವದ ಪಡೆ ತೆರಳಿತ್ತು. * ಚೀನಾದ ಒಂದು ಟೆಂಟ್ ತೆರವುಗೊಳಿಸುವ ಸಂಬಂಧ ಉಭಯ ಸೈನಿಕರ ಮಧ್ಯೆ ಸಂಘರ್ಷವೇರ್ಪಟ್ಟು, ರಾತ್ರಿಯಿಡಿ ಸೈನಿಕರು ಬಡಿದಾಡಿಕೊಂಡರು. * ಭೀಕರ ಮಾರಾಮಾರಿಯಲ್ಲಿ ಭಾರತ ಕರ್ನಲ್ ಸೇರಿ 20 ಸೈನಿಕರು ಹುತಾತ್ಮರಾದರು. ಚೀನಾದ ಕಡೆಯಲ್ಲೂ ಅಪಾರ ಸಾವು-ನೋವು ಸಂಭವಿಸಿದ್ದು, ಅವರು ಅದರ ಮಾಹಿತಿಯನ್ನು ರಹಸ್ಯವಾಗಿಟ್ಟರು.

ಡ್ರೋನ್​ಗಳ ಮೂಲಕ ಪರಿಶೀಲನೆ

ಮೂರು ಹಂತಗಳ ಒಪ್ಪಂದ ಅನ್ವಯ ಸೇನೆ ಹಿಂಪಡೆಯುವಿಕೆಯನ್ನು ಉಭಯ ಪಡೆಗಳು ಡ್ರೋನ್​ಗಳ ಮೂಲಕ ಪರಿಶೀಲನೆ ನಡೆಸುವ ಜಂಟಿ ಕಾರ್ಯವಿಧಾನಕ್ಕೆ ಸಮ್ಮತಿ ಸೂಚಿಸಿವೆ. ಈ ಯೋಜನೆಯು ಕಳೆದ ಜೂನ್​ನಲ್ಲಿ ಉಭಯ ಪಡೆಗಳ ಮಧ್ಯೆ ನಡೆದ ಮುಖಾಮುಖಿಯಂತಹ ಉದ್ವಿಗ್ನತೆ ಮರುಕಳಿಸದಿರುವಂತೆ ತಡೆಯಲು ಸಹಾಯಕವಾಗಲಿದೆ.

ಒಪ್ಪಂದದ ಹೊರತಾಗಿಯೂ ಭಾರತ ಸನ್ನದ್ಧ

ಚೀನಾ ಪದೇ ಪದೆ ಮಾತು ತಪ್ಪಿ ಗಡಿಯಲ್ಲಿ ಕ್ಯಾತೆ ತೆಗೆಯುವ ಕುತಂತ್ರ ಬುದ್ಧಿ ತೋರಿಸುವುದರಿಂದಾಗಿ ಭಾರತೀಯ ಸೇನೆ ಹೆಚ್ಚು ಜಾಗರೂಕವಾಗಿದೆ. ಗಲ್ವಾನ್ ಕಣಿವೆ ಸಂಘರ್ಷದ ಬಳಿಕ ಚೀನಾದ ಮೇಲೆ ವಿಶ್ವಾಸ ಕಳೆದುಕೊಂಡಿರುವ ಭಾರತೀಯ ಸೇನೆ ಸಂಭಾವ್ಯ ಸಂಘರ್ಷಗಳಿಗೂ ಸನ್ನದ್ಧವಾಗಿದೆ ಎಂದು ತಿಳಿದುಬಂದಿದೆ.

https://www.vijayavani.net/govt-tightens-rules-for-ngos-intending-to-receive-funds-from-abroad/