ಬೆಂಗಳೂರು: ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (ಕೆಇಎ) ಇತ್ತೀಚೆಗೆ ನಡೆಸಿದ ಸಾಮಾನ್ಯ ಪ್ರವೇಶ ಪರೀಕ್ಷೆ (ಸಿಇಟಿ) ಪ್ರಶ್ನೆ ಪತ್ರಿಕೆಯಲ್ಲಿ ಕೆಲವು ಲೋಪದೋಷ ಕಂಡು ಬಂದಿರುವುದರಿಂದ ವಿದ್ಯಾರ್ಥಿಗಳಿಗೆ 8 ಕೃಪಾಂಕ ನೀಡಲು ನಿರ್ಧರಿಸಿದೆ. ಆ. 28ರಿಂದ 30ವರೆಗೆ ನಡೆದಿದ್ದ ಸಿಇಟಿಯನ್ನು 2,01,834 ವಿದ್ಯಾರ್ಥಿಗಳು ತೆಗೆದುಕೊಂಡಿದ್ದರು. ಸೆ. 20ರಂದು ಫಲಿತಾಂಶ ಪ್ರಕಟವಾಗಲಿದೆ. ಭೌತಶಾಸ್ತ್ರ(2), ರಸಾಯನಶಾಸ್ತ್ರ (ಎ1 ಶ್ರೇಣಿಯಲ್ಲಿ 24ನೇ ಪ್ರಶ್ನೆಗೆ ಬಿ ಮತ್ತು ಸಿ ಎರಡೂ ಉತ್ತರಗಳು ಸರಿ ಇದೆ), ಗಣಿತದಲ್ಲಿ (2 ಕೃಪಾಂಕ ಹಾಗೂ ಎ ಶ್ರೇಣಿಯ ಪ್ರಶ್ನೆ 21 ಮತ್ತು 37ಕ್ಕೆ ಉತ್ತರಗಳ ಗೊಂದಲ ಇದೆ), ಜೀವಶಾಸ್ತ್ರದಲ್ಲಿ (ಎ1 ಶ್ರೇಣಿಯ 40ನೇ ಪ್ರಶ್ನೆ ಬಿ ಮತ್ತು ಡಿ ಆಯ್ಕೆಗಳೆರಡೂ ಸರಿ ಇದೆ). ಈ ರೀತಿ ಸ್ವಯಂ ಘೋಷಿತವಾಗಿ ಕೆಇಎ 4 ದೋಷಗಳನ್ನು ಕಂಡು ಹಿಡಿದು ಅದಕ್ಕೆ ಕೃಪಾಂಕ ಘೋಷಣೆ ಮಾಡಿದೆ. ಸದ್ಯ ಘೋಷಣೆ ಮಾಡಿರುವ 4 ಹಾಗೂ ಮಾಡಬೇಕಿರುವ 4 ಸೇರಿ ಒಟ್ಟಾರೆ 8 ಕೃಪಾಂಕ ವಿದ್ಯಾರ್ಥಿಗಳ ಖಾತೆಗೆ ಜಮೆ ಆಗುವುದು ಖಚಿತವಾಗಿದೆ.
